GÉNESIS 27

Isaac Jacobota bendiciashcamanta

1Isaacca yallita yuyacpish, ñahui mana ricucpish cashpami paipac punta churi Esauta cayashpaca:

—¡Ñuca huahua Esaulla!— nirca.

Shina nicpimi Esauca:

—Caipimi cani— nirca.

2Chashna nicpimi Isaacca:

—Ñucaca ña yuyacmi cani, ima punzha huañunatapish mana yachanichu. 3Cunanca, animalta japina flechatapish, arcotapish mochilapi apashpa, sachapi animalta japimugri. 4Ñuca manarac huañushpa bendiciangapac, ñuca munashca shina, chai aichata sumacta yanushpa carai— nirca.

5Rebecaca Isaac paipac churi Esauta imata nicushcataca uyacurcami. Chaimantami Esaú paipac taitaman carangapac sachapi animalta japingapac ricpi, 6Rebecaca paipac quipa huahua Jacobotaca:

—Riqui huahua, cambac taita Isaacca cambac huauqui Esautaca: 7«Ñuca micungapac sachapi animalta japimushpa, yanushpa carai. Ñuca manarac huañushpa, Mandac Diospac ñaupapi bendiciashami» nicuctami uyani. 8Riqui huahua, cunanca ñuca imata nishcata uyai. 9Cunanca, cambac taita munashca shina, sumacta yanushpa, paiman carangapac animalcuna shayanaman rishpa, ishcai maltón chivota apamugri. 10Can chai micunata cambac taitaman cucpi, pai micushpaca, manarac huañushpami canman bendicianga— nirca.

11Shina nicpimi, Jacoboca paipac mama Rebecataca:

—Ñuca huauqui Esauca millmayuc cuerpomi, ñucaca manamari millmayuc canica. 12Ñuca taita maquihuan tuparishpa ricsishpaca, ñuca umashcamanta bendicianapac randica maldiciangami— nirca.

13Shina nicpimi, paipac mama Rebecaca:

—Ñuca huahualla, canta maldicianapac randica, ñucata maldiciachun. Canca ñuca nishcata uyashpa, chai chivocunata apamugri— nirca.

14Chaimantami Jacobo rishpaca, paipac mama Rebecaman chivocunata apamushpa curca. Paipac mamaca Isaac munashca shinami, sumacta yanushpa curca. 15Chai quipaca paipac punta huahuapac huacaichishca, achca valishca sumac churanata llucchishpami, paipac quipa huahua Jacoboman churachirca. 16Chai quipaca Jacobopac maquicunapi, cungapi maipi mana millma tiyashcapimi huahua chivo carahuan pilluchirca. 17Chashna pillushpami, sumacta yanushca aichatapish, tandatapish paipac huahua Jacoboman cushpa cacharca. 18Chaimantami Jacoboca paipac taitapacman rishpaca:

—¡Ñuca taitito!— nishpa cayarca.

Shina cayacpi Isaacca:

—Caipimi cani huahualla, ¿pitac cangui?— nirca.

19Shina nicpimi Jacoboca:

—Ñucaca cambac punta churi Esaumi cani. Cunanca jatari, ñami can nishca shina animalta japishpa, yanushpa apamuni. Cunanca animal aichata micungapac jatari. Chai quipaca ñucata bendiciangui— nirca.

20Shina nicpimi Isaacca:

—Ñuca huahualla, ¿ima shinatac utca japimunguiyari?— nirca.

Shina tapucpimi Jacoboca:

—Canta Mandac Diosllatacmi animalcunata ñuca ñaupapi ricuchirca— nirca.

21Shina nicpimi Isaacca:

—Ñuca churi Esaú cashcata, mana cashcata tuparishpa yachangapac cuchuyai— nirca.

22Shina nicpimi, Jacobo cuchuyacpi, taita Isaac tuparishpaca:

—Rimaica, Jacobopac rimaimi, shinapish maquica Esaupac maquimi— nirca.

23Paipac maqui Esaupac maqui shina, millmayuc cacpimi, Isaacca mana ricsirca. Shinallatac bendiciangapac 24Cutinllatac tapushpaca:

—¿Canca ñuca churi Esauchu cangui?— nirca.

Shina nicpimi Jacoboca:

—Ari, Esaumi cani— nirca.

25Shina nicpica, paipac taitaca:

—Ñuca canta bendiciangapac can japimushca animal aichata carangapac cuchuyai— nirca.

Jacobo cuchuyashpa caracpica, Isaacca micurcami. Vinotapish cucpi ubiarcami. 26Chaimantami paipac taita Isaacca:

—Cunanca huahualla, cuchuyashpa, muchai— nirca.

27Chashna nicpica, Jacoboca cuchuyashpa mucharcami. Shina muchacpi, churanata mutquishpa bendiciashpaca:

«Ñuca churica Dios bendiciashca

pamba shinami ashnan.

28Dios jahua pachamanta

allpapi tamyachishpa pucuchichun.

Achca trigotapish,

achca vinotapish canman cuchun.

29Achca gentecuna canta servichun,

jatun llactacunapi causaccunapish

cambac ñaupapi cumurichun.

Canmi huauquicunataca mandangui.

Cambac mamapac huahuacunapish

cambac ñaupapimi cumuringa.

Canta maldiciaccunataca

maldiciashca cachun.

Cutin canta bendiciaccunataca

bendiciachun» nirca.

30Isaac bendiciashca quipa, Jacobo Isaacpac ñaupamanta llucshishpa ricucpimi, paipac huauqui Esauca animalta japishpa chayarca. 31Chashna chayashpa, paipish sumacta yanushpa, paipac taitapacman apashpaca:

—Ñuca taitalla, cambac churi japimushca animal aichata micungapac jatari. Chai quipaca ñucata bendiciangui— nirca.

32Shina nicpimi, paipac taita Isaacca:

—¿Pitac cangui?— nirca.

Shina nicpimi Esauca:

—Ñucaca cambac punta churi Esaumi cani— nirca.

33Shina nicpimi, Isaacca achca manchaihuan chucchushpa:

—¿Pitac can manarac shamucpi, caiman shamushpa, aicha yanushcata cararcayari? ¡Ñami bendiciarcani! ¡Paimi bendiciashca saquirin!— nirca.

34Paipac taita chashna nicpica, Esaú yallita llaquirishpa huacashpaca:

—¡Ñuca taitalla, ñucatapish bendiciaiyari!— nirca.

35Shina nicpimi Isaacca:

—Cambac huauqui shamushpa umashpami, canman cuna bendiciontaca japirca— nirca.

36Shina nicpimi Esauca:

—Shinaca allimi paitaca Jacobota shutichishca. Ña caihuanca ishcai cutinmi uman. Sarunca punta churi japinatami quichurca. Cunanca taitamanta ñuca japina bendiciontami japin. Ñucaman cuna bendiciontaca, ¿manachu huacaichircangui?— nirca.

37Shina nicpimi, Isaacca Esautaca:

—Paitaca cambac amo cachunmi churarcani. Cambac tucui huauquicunatapish, paita servichunmi churarcani. Shinallatac achca trigotapish, achca vinotapish curcanimi. Ñuca huahualla, cunanca, ¿imatatac cushayari?— nirca.

38Shina nicpimi Esauca:

—¡Ñuca taitalla! ¿Manachu ñucamanpish bendicionta charingui? Ñuca taitalla, ¡ñucamanpish bendicionta cuiyari!— nirca.

Shina nishpami, caparishpa huacarca.

39Shina nicpimi, taita Isaacca:

«Canca tamya llactamantapish,

alli allpamantapish

carupimi causangui.

40Espadahuan misarishpa,

huauquita servishpami causangui.

Sinchiyashpaca yugota

cambac cungamanta anchuchic shinami,

servinamanta llucshingui» nirca.

Jacobo Esaupacmanta miticushpa rishcamanta

41Esauca Jacoboman paipac taita bendicionta cushcamantami paita mana ricunayachishpaca: «Ñallami ñuca taita Isaacca huañunga. Pai huañucpica, Jacobotapish huañuchishami» nishpami yuyacurca.

42Esaú chashna nishcataca Rebecaman parlarcami. Chaimantami Rebecaca quipa huahua Jacobota cayachun cachashpaca:

—Can quichushcamanta cambac punta huauquica huañuchinatami yuyaricun. 43Cunanca ñuca huahualla, ñuca nishcata uyai. Haranpi causac ñuca turi Labanpacman cunanllatac miticushpa ri. 44Cambac huauqui rabiata pasachingacaman maijan punzhacunata paihuan causagri. 45Can imata ruhuashcata cungarishpa, ña mana piña cacpica, canta caiman pushamuchun cachashallami. ¿Maitatac cancunataca shuc punzhallapi ishcaitatac chingachishayari?— nirca.

46Chai quipami Rebecaca Isaactaca:

—Ñucaca heteocunapac ushicunahuanca mana allichu causani. Jacobo cai llactapi causac Hetpac ushicunahuan cazaracpica, ¿imapactac causacusha?— nirca.

Currently Selected:

GÉNESIS 27: QCA10

Highlight

Copy