1 CORINTIOS 15
15
Jesucristo causarishcamanta
1Cuyashca criccuna, ñuca alli huillaita huillashcata yuyarichunmi munani. Chai huillaita chasquishpami, mana saquishpa catiracunguichic. 2Ñuca huillashca shina, alli huillaita catirashpaca quishpiringuichicmi. Mana chai shina catishpaca, cancuna crishcaca yangami canga.
3Puntaca ñuca ima shina chasquishca shinami, cancunamanca yachachircani. Dios quillcachishcapi nishca shinami, Cristoca ñucanchic juchacunamanta huañurca. 4Shinallatac Dios quillcachishcapi nishca shinami, enterrashca cashpapish, quimsa punzhapica causarirca. 5Chashna causarishpaca, Cefasmanmi ricurirca. Quipaca chunga ishcai yachacuccunamanmi ricurirca. 6Chai quipaca pichca patsac yalli criccunamanmi ricurirca. Chaita ricuccunapuramantaca achcacunami causacuncunarac. Cutin maijancunaca ña huañushcacunami. 7Chaimantaca Santiagomanmi ricurirca. Shinallatac chai quipaca tucui apostolcunamanmi ricurirca.
8Tucuiman ricurishca quipaca, shullushca shina huacharishca ñucamanmi ricurirca. 9Ñucaca Diospaclla cac tandanacushca criccunata mana ricunayachishpami yallita llaquichircani. Chaimanta tucui apostolcunamanta yalli yangallami cani. Shinallatac mana apóstol nishcapish cana canichu. 10Shina cacpipish Dios cuyashcallamantami cashna cani. Pai ñucata cuyashcaca mana yangachu cashca. Chaica tucui paicunata atishpami, ñucaca Diospacta ruhuacuni. Shina cashpapish mana ñucachu ruhuashcani, ashtahuanpish ñucapi tiyac Diospac cuyaimi ayudashpa ruhuachishca. 11Ñuca cashpa, paicuna cashpapish chashnami huillashcanchic. Chai huillashcatami cancunaca crircanguichic.
Huañushcacuna causarinamanta
12Cristoca huañushcacunapuramanta causarircami nishpa huillacushca jahua, ¿ima nishpatac cancunapuramanta maijancunaca «huañushcacunaca mana causaringachu» ninguichic? 13Huañushcacuna mana causarina cacpica, Cristopish manachari causarirca. 14Cristo mana causarishca cacpica, ñucanchic huillashcapish, cancuna crishcapish yangami canman. 15Cristo mana causarishca cacpica, ñucanchic: “Diosmi Cristota causachirca” nishpa huillacushpaca, Diosmanta llullashpa huillaccunami canchicman. Huañushcacuna mana causarina cacpica, Cristopish mana causarinmanchu carca. 16Huañushcacuna mana causarina cacpica, Cristopish manachari causarirca. 17Cristo mana causarishca cacpica, cancuna crishcaca yangallami canman, shinallatac juchallapitacmi causacunguichicman. 18Cristota crishpa, huañushcacunapish huiñaita chingarishcami canman. 19Cai causaipaclla Cristopi shunguta churashca cashpaca, tucui gentecunamanta yalli llaquillami canchicman.
20Ashtahuanpish Cristo huañushcacunapuramanta causarishpaca, (criccunapac causarina callari shinami tucurca.) 21Chaica, huañuica shuc runallamantami cai pachapica callarirca. Chashnallatac shuc runallamantami huañushcacunapuramanta causarinapish callarirca. 22Ima shinami Adanpac juchamantaca tucui gentecuna huañuna can, chashnallatacmi Cristota crishcamantaca tucui gentecuna causaita charinga. 23Ima shina causarina cashca shinami, ñaupaca Cristorac causarirca. Quipaca, Cristota criccunami pai cutimui punzhapi causaringa. 24Cristo tucui mandaccunatapish, jatun mandaccunatapish, poderta charic mandaccunatapish chingachishpa, pai mandacushcata Diosman cucpimi, cai pachaca tucuringa. 25Cristoca paita piñaccunata paipac chaqui sarunapi Dios churangacamanmi, paillatac mandana can. 26Tucuipac quipaca, Cristoca huañuitami atinga. 27Chaica, Diosmi Cristopac chaqui sarunapi tucuita churarca. Chashna Dios tucuita mandachun churashpaca, mana paipish mandashca canatachu nisha nin. Chaica paimi tucuita Cristopac chaqui sarunapi churarca. 28Tucuita cazuchishca quipaca, Diospac Churi cristollatacmi tucuita cazuchic Diospac ñaupapi cazuringa. Chashnami Diosca tucuita cazuchic cashcata ricuchinga.
29Huañushcacuna mana causarina cacpica, ¿imapactac huañushcacunapac shutipi bautizarincuna? ¿imamantatac huañushcacunamanta bautizarincuna? 30¿Imamantatac ñucanchicpish tutapish punzhapish huañunalla puricunchic? 31Cuyashca criccuna, ñucaca tucui punzhacuna huañunalla cashpapish, cancuna Apunchic Jesucristota criccuna cashcamantami mai cushicuni. 32Huañushcacuna mana causarina cacpica, ñuca gentecuna shina Efeso pueblopi macanacushcaca, ¿imapactac valishca? Chaipac randica shuccunapac ninamantaca: «¡Cunanca micushunchic, ubiashunchic, cayaca ña huañushunmi!» nimanmi. 33Ama pandarichicchu. Maijancunaca: «Mana alli gentecunahuan tandarishpami, alli causaitaca saquincuna» ninmi. 34Cancunapuramanta maijanca manarac Diosta ricsinchu. Chaimanta alli yuyaiman causaichic, ama juchata ruhuaichicchu. Caicuna pingachunmi chashnaca nini.
Huañushcacuna ima shina causarinamanta
35Maijancunaca: «¿Huañushcacunaca ima shinatac causaringa? ¿Imalaya cuerpohuantac ricuringa?» ningacunachari. 36¡Yuyai illac! Muyuta tarpucpica, muyuca ismunmi. Quipatami shuc huiñan. 37Imata tarpushpaca, mana yuratachu tarpun, ashtahuanpish trigotapish, ima shuctac granotapish muyullatami tarpun. 38Diosmi pai munashca shina chai muyutaca huiñachin. Cada muyumi quiquin yurata charin. 39Mana tucui cuerpochu chai shinallatac. Gentecunaca shuctaclaya, animalcunaca shuctaclaya, volashpa puric alasyuc animalcunaca shuctaclaya, yacupi tiyac animalcunaca shuctaclaya cuerpomi can. 40Shinallatacmi jahua cielopi achicyachicpish, cai allpa pachapi tiyacpish, chicanlaya can. Jahua cielopi cac achicyachicca chaipi sumac cashcatami ricuchin. Cai allpa pachapi tiyashcaca caipi sumac cashcatami ricuchin. 41Intica mana quilla shina, mana lucerocuna shinachu achicyachin. Lucerocunapuramantapish shuctac shuctaclayatami achicyachin.
42Chai shinallatacmi huañushcacunapish causaringa. Ismuclla cuerpohuan enterrarishpaca, mana ismuclla cuerpohuanmi causaringa. 43Millana cuerpohuan enterrarishpaca sumacyachishca cuerpohuanmi causaringa. Irquiyashca cuerpohuan enterrarishpaca sinchi cuerpohuanmi causaringa. 44Aicha cuerpo enterrarishpaca, Diospaclla cangapacmi causaringa. Aicha cuerpopish, Diospaclla cuerpopish tiyanmi.
45Dios quillcachishcapica: «Diosca punta Adantaca causaiyuctami ruhuarca» ninmi. Cutin quipa Adantaca causachic Espirituyuctami Diosca ruhuarca. 46Shina cacpipish, causachic Espirituyucca mana punta shamurcachu, ashtahuanpish aichayucmi puntaca shamurca. Chai quipami causaichic Espirituyucca shamurca. 47Punta ruhuashca Adanca allpamantami carca. Quipa Adanmi, jahua pachamanta shamushca carca. 48Cai pachapi causaccunaca, allpamanta ruhuashca runa shinami. Jahua pachamanta caccunaca, jahua pachamanta shamushca Runa shinami. 49Ima shinami allpamanta ruhuashca runaman riccha canchic, chai shinami jahua pachamanta shamushca Runa shinapish cashun.
50Cuyashca criccuna, caitami nisha nini: Aichayuc, tulluyuc runaca mana Dios mandacucpi yaicungachu. Ismucllaca, huiñaita tiyac llactamanca mana yaicungachu. 51Dios manarac piman yachachishcatami ricsichisha nini. Mana tucuichu huañushun. Shina cashpapish, tucuimi shuctacyachishca cashun. 52Shuc rato ñahuita quimllai shinallapimi, tucuri trompeta tocashpa uyaricpica, shuctacyachishca cashun. Trompeta uyaricpica, huañushcacunaca mana cutin huañungapacmi causaringa. Ñucanchicca shuctacyachishcami cashun. 53Ismuclla cuerpoca mana ismuclla cuerpomi tucunga. Huañunalla cuerpoca mana huañuna cuerpomi tucunga. 54Cai ismuclla cuerpo mana ismuclla cuerpo tucucpi, huañunalla cuerpo mana huañuna cuerpo tucucpica, Dios quillcachishcapi nishcami pactanga. Chaipica: «Huañuitaca atishpa chingachishcami. 55Huañui, ¿maipitac cambac poderca? ¿Maipitac nanachishpa, huañuchicca?» ninmi. 56Nanachishpa huañuchicca juchami. Mandashcacuna tiyashcamantami juchaca poderta charin. 57Ashtahuanpish ñucanchic Apunchic Jesucristomantami atishcanchic. Chaimantami Diosta pagui nicunalla canchic.
58Chaimanta cuyashca criccuna, pi ama urmachichun, Apunchic Jesusta tucui shunguhuan crishpa catiraichic. Apunchic Jesuspac ruhuaitaca punzhanta ruhuacuichiclla. Apunchic Jesus-huan cancuna imata ruhuashcaca mana yangachu canga.
Currently Selected:
1 CORINTIOS 15: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.