1 CORINTIOS 14
14
Mana yachashca rimaicunata rimanamanta
1Tucuimanta yallica, cuyaita charinata munaichic. Shinallatac Diospac Espíritu imata ruhuachichun munaichic. Yallicarin Dios ima nishcata huillac canata munaichic. 2Maijanpish mana yachashca rimaicunata rimacca mana gentecunamanchu riman, ashtahuanpish Diosmanmi riman. Diospac Espíritu rimachicpimi, chaitaca pi mana entendin. 3Dios ima nishcata huillacca criccunata sinchiyachingapac, cunangapac, cushichingapacmi riman. 4Mana yachashca rimaita rimacca paipac allipacllatami riman, ashtahuanpish Dios ima nishcata huillacca tandanacushca criccuna sinchi cric cachunmi huillan. 5Ñucaca tucui cancuna mana yachashca rimaicunata rimac cachunmi munaiman. Shina cacpipish, Dios ima nishcata huillaccuna cachunmi, ashtahuanca munani. Chashna cashpami, jaicapi mana yachashca rimaicunata rimacta atishpa, ashtahuan alli canguichic. Chai mana yachashca rimaicunata tandanacushca criccunaman entendichishpallami criccunapac allipac riman.
6Cuyashca criccuna, ñuca cancunapacman rishpa, Dios ima nishcata huillanapac randi, allita yachachinapac randi, cashcata yachachinapac randi, yachachishcacunata yachachinapac randica, mana yachashca rimaicunata ñuca rimacucpica, cancunamanca ¿ima allitac cangayari? 7Flautapish, arpapish chai shinallatac huacacpica, imapi tocacushcapish mana yacharinmanchu. 8Corneta macanacuiman cayana tonopi mana uyaricpica, ¿pitac macanacungapac allichiringayari? 9Chashnallatac cancuna mana entendinalla rimaita rimacpica, ¿pitac cancuna rimashcataca entendingayari? Chashna rimashpaca, yangallami rimanguichicman. 10Cai pachapica achca rimaicunami tiyan. Chashna cacpipish, chai rimaita rimaccunapurallami entendincuna. 11Shuctac rimaita mana entendishpaca, chai rimaita rimacmanca caru llactamanta shinami cani, shinallatac chai rimaita rimacpish ñucamanca carumanta shinami. 12Diospac Espíritu imata ruhuachichun munashpaca, tandanacushca criccunata sinchiyachingapacmi imatapish ruhuanata munana canguichic.
13Chaimanta mana yachashca rimaita rimacca, chai rimashcata entendingapac Diosta mañaichic. 14Mana yachashca rimaipi Diosta mañashpaca, ñuca espirituhuan mañacuni. Shina cacpipish ñuca yuyaipica, imata mana entendinichu. 15Shinashpaca, ¿imatatac ruhuasha? Espirituhuanpish, yuyaihuanpishmi mañasha. Shinallatac espirituhuanpish, yuyaihuanpishmi cantasha. 16Can espiritullahuan Diosta pagui nicpica, ¿ima shinatac shuc manarac yachac runaca entendingayari? Chashna can Diosta pagui nicucpica, ¿ima shinatac «Chashna cachun» ningayari? 17Can Diosta allita mañashpa, pagui nicpipish, caishuc criccunaca mana entendishcachu. 18Tucui cancunata atishpa, mana yachashca rimaicunata rimac cashcamantaca, Diostami pagui nini. 19Shina cashpapish, tandanacushca criccunapurapica chunga huaranga mana yachashca rimaita rimanapac randica, entendinalla pichca rimaitami, yachachingapac rimasha nini.
20Cuyashca criccuna, ama huahuacuna shina yuyaichicchu. Ashtahuanpish mana allita ruhuangapac llullu huahuacuna shina yuyaichic. Allita yuyaringapacca, yuyaccuna shina caichic. 21Mandac Dios quillcachishcaca:
«Cai llactapi causaccunamanca
mana yachashca rimaicunahuan,
shuctac llacta
rimaicunahuanmi rimachisha.
Chashna rimacpipish,
manatac cazungacunachu» ninmi.
22(Chaica, mana yachashca rimaicunaca criccunapac señal canapac randica, mana criccunapacmi señal. Ashtahuanpish Dios ima nishcata huillashcaca mana criccunapac señal canapac randica, criccunapacmi señal can.) 23Criccuna tandanacushpa, mana yachashca rimaicunata rimanacucucpi, maijan manarac yachac, mana cashpaca manarac cric yaicushpaca, ¿manachu “caicunaca yuyai illac” ninga? 24Ashtahuanpish Dios ima nishcata tucui huillacucpi, shuc manarac yachac, mana cashpaca manarac cric yaicushpaca, paillatacmi tucui ima nicushcata uyashpa, juchayuc cashcata yuyarishpa llaquiringa. 25Shinallatac paipac shungupi tucui ima yuyacushcatapish mana pacashpa huillangami. Chashnami Dios cancunahuan cashcata yachashpa, cumurishpa, Diosta “allimari cangui” ninga.
Imatapish cashcata ruhuanamanta
26Chai shina cacpica, cuyashca criccuna, cancuna tandanacushpaca, shuccunaca salmocunata cantanguichicmi, shuccunaca yachachinguichicmi, shuccunaca Dios ima nishcata huillanguichicmi, shuccunaca mana yachashca rimaicunata rimanguichicmi, shuccunaca chai rimashcata entendichinguichicmi. Tucui caicunataca criccuna ashtahuan Jesusta catishpa sinchiyachunmi, ruhuana canguichic. 27Mana yachashca rimaita maijan rimashpaca, ishcai cashpa, mana cashpaca quimsa cashpa shuyanacushpa rimaichic. Shucca chai rimashcata entendichichun. 28Ashtahuanpish tandanacushca criccunapurapi mana yachashca rimaita pi mana entendichic tiyacpica, ama rimachun. Chaitaca, paillaman, Diosllaman rimachun. 29Shinallatac Dios ima nishcata huillaccuna tiyashpaca, ishcai cashpa, quimsa cashpa huillachun. Shuccunaca chai huillashca alli cashcata, mana alli cashcata huillachun. 30Maijan chaipi tiyacucman Dios imata ricuchicpica, chai puntaman huillacca upallachun. 31Tucui mashna yachacushpa, alli yuyaita japichunca, tucui cancunami Dios ima nishcataca shuyanacushpa huillana canguichic. 32Dios ima nishcata huillaccunaca, Dios ima nishcata huillaccuna shinami yuyan. 33Chaica, Diosca mana maipish cachun causachun munanchu. Ashtahuanpish sumac causaita cuc Diosmi.
Diospaclla cac tandanacushca criccuna imata ruhuac cashca shinami, 34huarmicunaca criccunapac tandanacuipica upallami cana can. Mana rimanachu can. Moisés mandashcacunapi nishca shinami, huarmicunaca cazuna can. 35Criccunapac tandanacuipi huarmicuna rimana mana alli cashcamantaca, imata yachasha nishpaca, huasipi paipac cusaman tapuchun.
36Dios rimashcaca mana cancunapurapichu callarishca, shinallatac mana cancunallamanchu chayamushca. Chaitaca cancunallatac alli yuyarichic. 37Maijanpish “Dios ima nishcata huillacmi cani” nicca, mana cashpaca “Diospac Espirituhuanmi cani” nicca, cai ñuca quillcashcaca Apunchic Jesús mandashca cashcata yachachun. 38Ashtahuanpish cai mandashcata mana allichu nicpica, paitapish ama chasquinguichic.
39Shinashpaca cuyashca criccuna, Dios ima nishcata huillanata munaichic. Ama, mana yachashca rimaicunata rimanata jarcaichicchu. 40Ashtahuanpish imata ruhuashpapish, allita ruhuaichic. Ama maipish cachun ruhuaichicchu.
Currently Selected:
1 CORINTIOS 14: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
