1 CORINTIOS 12
12
Diospac Espíritu imacunallata ruhuachic cashcamanta
1Cuyashca criccuna, Diospac Espíritu imacunallata ruhuachic cashcataca yachanami canguichic.
2Cancuna manarac cric cashpaca, mana rimaric ruhuashcalla dioscuna umashcami carcanguichic. Chaitaca cancunallatac yachanguichicmi. 3Chaimanta Diospac Espíritu maijanta rimachicucpica mana: «Jesusca ima llaqui tucuchun» ninmanchu. Shinallatac maijanpish Diospac Espíritu mana rimachicucpica mana: «Jesusca Mandacmi» ninmanchu.
4Tandanacushca criccunapurapica, tucuilaya ruhuaccunami tiyan. Shina cacpipish Diospac Espiritullami chaicunataca ruhuachin. 5Tucuilayata ruhuashpa servinami tiyan. Shina cacpipish, tucui chaicunataca Apunchic Jesusllami ruhuachicun. 6Tucuilaya ruhuaicunami tiyan. Shina cacpipish, Diosllatacmi tucuita ruhuachicun. 7Diosca, paipac Espíritu tucuipac allipac allicunata ruhuachic cashcatami ricuchin. 8Diospac Espirituta maijanmanca allita rimachunmi, alli yuyaita cun. Maijanmanca chai Espiritullatacmi alli yachaita cun. 9Chai Espiritullatacmi maijantaca alli cricta ruhuan. Maijantaca ungushcacunata alliyachictami ruhuan. 10Maijantaca milagrotami ruhuachin. Maijantaca Dios ima nishcata huillactami ruhuan. Maijantaca alli Espíritu cashcata yachactami ruhuan. Maijantaca mana yachashca rimaicunata rimactami ruhuan. Maijantaca chai mana yachashca rimaita entendichictami ruhuan. 11Ashtahuanpish tucui caicunataca Diospac shuclla Espiritumi ruhuachin. Paimi maijanman cusha nishca shina, imata ruhuaipacta ricushpa cun.
Tandanacushca criccunaca shuc cuerpo shina cashcamanta
12Cuerpoca shuclla cashpapish, chican chican partecunatami charin. Chashnallatacmi Cristopac cuerpomanta nishpapish shuclla can. 13Chaica, tucui ñucanchicmi Israel cashpa, mana Israel cashpa, servic, mana servic cashpapish, Diospac shuclla Espirituhuan bautizarishca canchic. Diosca chai Espiritullatatacmi yacuta ubiachic shina, curca.
14Cuerpoca mana shuc partellatachu charin, ashtahuanpish chican chican partecunatami charin. 15Chaquica: “Ñucaca mana maquichu cani, chaimanta, mana cuerpopacchu cani” mana ningachu. Shina nishpapish, cuerpopac canataca mana saquinchu. 16Ringripish: “Ñucaca mana ñahui cashcamantaca, mana cuerpopacchu cani” nishpapish, cuerpopac canataca mana saquinchu. 17Tucui cuerpo ñahuilla cacpica, ¿ima shinatac uyanchicman? Tucui cuerpo ringrilla cacpica, ¿ima shinatac mutquinchicman? 18Ashtahuanpish Diosca chican chican partecunatami, maipimi alli cana cacpi cuerpopica churashca. 19Tucui cuerpo shuc parte shinalla cacpica, ña mana cuerpo shina canmanchu. 20Chashna cuerpopi chican chican partecuna tiyacpipish, cuerpoca shucllami.
21Ñahuica maquitaca: “Cantaca mana ninichu” nishpaca, mana ninmanchu. Umapish chaquitaca: “Cantaca mana ninichu” mana ninmanchu. 22Ashtahuanpish imapacpish mana valic partemi, cuerpopacca mai valic can. 23Maijanmi yangalla cac partetami ashtahuan cuidarishpa, alli churarinchic. Shinallatac maijanmi pinganayaclla cac partetami, tucuimanta yalli jarcarishpa churarinchic. 24Ashtahuanpish tucui mashna ricunalla partecunataca, mana jarcarinachu. Diosca yangalla cac parteta ashtahuan jarcarichunmi, cuerpotaca ruhuashca. 25Cuerpopi tiyac partecuna ama chicanyarinacushpa, caishuc chaishuc ayudanacuchunmi, chashnaca ruhuashca. 26Cuerpopi shuc parte llaqui tucucpica, caishuc partecunapish llaquirinmi. Shinallatac shuc parte allita japicpica, tucui partemi cushicun.
27Cancunaca Cristopac cuerpo shina cashpami, chican chican partecuna canguichic. 28Diosca tandanacushca criccunapurapica, puntaca apostolcuna tiyachun, quipaca Dios ima nishcata huillaccuna tiyachun, chai quipaca yachachiccuna tiyachunmi munan. Shinallatac milagrocunata ruhuaccuna, jambiccuna, ayudaccuna, pushaccuna, jaicapi mana uyashca rimaicunata rimaccuna tiyachunmi munan. 29Mana tucuichu apostolcuna, Dios ima nishcata huillaccuna, yachachiccuna, milagrocunata ruhuaccuna can. 30Shinallatac mana tucuichu ungushcacunata jambiccuna, jaicapi mana uyashca rimaita rimaccuna, shinallatac chai rimashca imata nisha nicushcata entendichiccuna can. 31Tucui caicunamantaca, imapish ashtahuan valishca ruhuaicunata ruhuanata munaichic. Shina cacpipish tucui caicunamanta yallica, ashtahuan alli causanatami ñucaca yachachigrini.
Currently Selected:
1 CORINTIOS 12: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
