Апостолэнгири Буты́ 20

Кэ Македо́ния и Аси́я

1Ке́ли кошыбэ́н штылыя, Па́вли кхардя́ сыкляибнытконэ́н, облыя лэн, а кокоро́ гия́ дрэ Македония. 2И ке́ли ёв прогия́ пир далэ́ штэ́ты, ёв подрикирдя лэн бутэ́ лавэ́нца, и явдя́ дрэ Гре́цыя (Бала́мия). 3Па́вли сыс одо́й трин чхона́ анги́л лэ́скиро традыпэн кэ Сирия, ке́ли Юды зракирдэпэ проти лэ́стэ, и ёв пиридуминдя тэ рисёл палэ пир Македония. 4Лэс лыджа́нас Сосипатро, Пироскиро чхаво́, Вериянино, а Аристархо и Секундо Фесалоникийцэндыр, и Гаё Дервянино и Хима (Тимофеё), Тихико Трафимоса Асиятыр. 5Ёнэ прогинэ́ анги́л и ужакирдэ амэн дрэ Троада; 6нэ амэ коригэды́р (позжэды́р) Апреснокэнгирэ Свэнкостыр вытрадыям Филипинэндыр, и пир пандж дывэса́ явдя́м кэ ёнэ дрэ Троада, кай са́мас охто́ (бидуе́нгиро дэш) дывэса́.

Павли́скиро Палатуно́ (Последнё) Затрадыпэ́н кэ Троа́да

7Дро пэ́рво куркитко дывэ́с, ке́ли амэ скэдыямпэ тэ пхагирас маро́, Па́вли ракирдя́ лэ́нца, а пэ яви́р дывэ́с ёв кэдэласпэ тэ джал дро дром. И ёв ракирдя́ дурэды́р кэ пашрат. 8Дрэ упратуны шту́ба, кай амэ скэдыямпэ, хачинэ бут яга. 9Пэ фэнштра сыс бэшто́ тэрно́ ману́ш, савэ́с кхардэ́ о Евтихо, адя́кэ сыр Павли́скиро ракирибэ́н сыс длэ́нго (гара́), Евтихо засуця и пыя́ тэлэ́ пэ пхув тритонэ вучыпнастыр (этажостыр), и лэс ґаздынэ́ пхувья́тыр мулэс. 10Па́вли гия́ тэлэ́, бандия пашы́л лэ́стэ и облыя лэс, пхэни́: “На пиридживэн, пал-дова́ со лэ́скиро ду́хо (фа́но) исын дрэ лэ́стэ.” 11И ке́ли Па́вли ґаздыя́пэ упрэ́, ёв пхагирдя́ маро́, хая, и ракирдя́ лэ́нца сари́ рат кэ/жы́ко зло́ко (ра́нко), а тэды гия́ дурэды́р. 12А тэрнэ́ манушэ́с яндлэ́ джидэс, и ёнэ сарэ́ сыс древа́н ра́да.

Троада́тыр кэ Миле́то

13Амэ гиям анги́л пэ па́рма (корабле) и плывиндям (дыям пли́ма) дро Асо, соб (кай) тэ лас одотхы́р Павли́с: пал-дова́ со ёв кокоро́ адя́кэ камдя́, ёв кэдыяпэ одотхы́р тэ джал пэзал. 14Ке́ли ёв стрэниндяпэ (дыкхцяпэ) амэ́нца дро Асо, тэды амэ лыям лэс кэ пэ и явдя́м дрэ Митилина, 15И одотхы́р пэ яви́р дывэ́с амэ традыям дурэды́р и явдя́м дро Хиосо, а пэ яви́р дывэ́с догиям кэ Самосо, и пир яви́р дывэ́с притрадыям дро Милето: 16пал-дова́ со Па́вли задуминдя тэ на затрадэл дро Ефесо, соб (кай) лэ́скэ тэ на зарикирэлпэ дрэ Асия, пал-дова́ со ёв камдя́, сыр сашты́ сыгэды́р тэ пэрэ́л одори́к анги́л Духоскиро Свэ́нко ду́хо дро Ерусалимо.

Па́вли Ракирэ́ла Пхурэпшалэ́нгэ кэ Ефе́со Анги́л, Сыр тэ Розячэ́нпэ

17Милетостыр ёв бичхадя́ манушэ́н, соб (кай) одолэ́ тэ кхарэ́н кхангирья́кирэ годэпхурэн. 18И ке́ли ёнэ явнэ́ кэ ёв, ёв пхэндя́ лэ́нгэ: “Тумэ́ джинэ́на, сыр мэ англатунэ́ дывэсэ́стыр, ке́ли явдём дрэ Асия, саро́ дава́ часо со́мас тумэ́нца, 19и мэ кандыём сарэскэ, и мэ кэрдём буты́ ясвэ́нца ваш Дэвлэ́скэ, на дыкхи́ пэ саро́, со ма́нгэ пригияпэ тэ пиридживав пал Юдэ́нгиро зракирибэ́н проти ма́ндэ; 20и сыр мэ на промэкцём нисо́ тэ пхэна́в лав пал Исусо́стэ тумэ́нгэ, со тумэ́нгэ явэ́ла трэй, и ракирдём анги́л сарэ́ндэ и псирдём пир кхэра́, 21мэ и сыр ракирдём Юдэ́нгэ и Грекэ́нгэ (Баламэ́нгэ), со ёнэ сыс бангэ́ (мусиндлэ) тэ рискирэ́н пэ́скиро джиибэ́н кэ Дэвэ́л и тэ патя́н дрэ Растэ-Дэвлэ́стэ, амарэ́ Исусо́стэ Христосо́стэ. 22И, ґа́да, какана́ мэ, сыр Ду́хо (Фа́но) лыджа́ла ман, мэ джа́ва нэ Ерусалимо, и мэ на джино́м, со одо́й ма́нца явэ́ла; 23а екх Свэ́нто Ду́хо (Фа́но) пир сарэ́ фо́рья пхэнэ́ла ма́нгэ пал дова́, со ман ужакирэ́на мэ́ньки и штарибэ́н. 24Нэ мэ ни пэ со дава́ на дыкха́ва, и мэ на дарава пал пэ́скиро джиибэ́н, екх ма́нгэ трэй тэ проджав миро дром и тэ кэра́в рэ́ндо (де́ло), саво́ дыя́ ма́нгэ Рай Дэвэ́л, Ису́со Христо́со, тэ лыджав бахталы́ зан (звесь) манушэ́нгэ пал Дэвлэ́скиро бахталыпэ́н. 25И какана́, ґа́да, мэ джино́м, со буты́р тумэ́ на дыкхэ́на ман сарэ́, конэса мэ со́мас кхэтанэ́ и конэ́скэ мэ пхэндём лав пал Дэвлэ́скиро Кралипэ́н. 26Палдава́ мэ и ракира́ва тумэ́нгэ дава́ ададывэ́с, со нанэ мири́ банг пал рат, ко́ли кон тумэ́ндыр хасёла, 27пал-дова́ со мэ нисо́ на промэкцём тэ роспхэнав тумэ́нгэ пал Дэвлэ́скири во́ля. 28И адя́кэ ракхэ́н пэс и сарэ́ дэвлытконэ́ манушэ́н, савэ́н Свэ́нто Ду́хо (Фа́но) чхудя́ тэ явэ́н кхангирья́кирэ барыдырэ́нца (дыкхибнаскирэнца), соб (кай) тэ ракхэ́н Дэвлэ́скири Кхангири́, сави́ Ёв дорэсця́ Пэ́скэ Лэ́скирэ-Чхавэ́скирэ Ратэ́са. 29Мэ джино́м, со ке́ли ман на явэ́ла, кэ тумэ́ явэ́на холямэ́ мануша́, сыр рува́, савэ́ на явэ́на тэ тангинэн (жалинэн) дэвлытконэн; 30адя́кэ-паць и машки́р тумэ́ндэ явэ́на мануша́, савэ́ явэ́на тэ ракирэ́н хохано́ сыкляибэн, соб (кай) тэ злыджан пал пэ́стэ сыкляибнытконэ́н. 31Палдава́ дыкхэ́н и ракхэ́нпэ и рипирэ́н, со мэ на пириячавас тэ сыклякирав кажнонэс тумэ́ндыр сарэ́ трин бэрш а раты́ и дывэсэ́ ясвэ́нца. 32И какана́, мэ пиридава тумэн Дэвлэ́скэ и Лэ́скирэ бахтякирибнаскирэ лавэ́скэ, саво́ явэ́ла тэ зорьякирэл тумэн и дэ́ла джиибэ́н кхэтанэ́ свэнтонэнца. 33Мэ никонэстыр на камдём тэ лав ни руп, ни сувнака́й, ни и́дя. 34Тумэ́ кокорэ́ джинэ́на, со мэ пэ́скирэ вастэ́нца закэравас пэ джиибэ́н пэ́скэ и одолэ́ манушэ́нгэ, савэ́ сыс ма́нца. 35Дро саро́, со мэ тэ на кэра́в, мэ сыкадём тумэ́нгэ, со амари́ буты́ исын дро дова́, соб (кай) тэ помогинас чорорэнгэ, и тэ рипирас Ра́скирэ-Дэвлэ́скирэ Исусо́скирэ лава́; савэ́ Ёв Кокоро́ пхэндя́, со ману́ш, саво́ дэ́ла, явэ́ла бахталэдыр одолэ́стыр, саво́ лэ́ла. 36Ке́ли Па́вли пхэндя́ дава́, ёв тэрдия́ пэ чанга́ кхэтанэ́ сарэ́нца и мангдя́пэ Дэвлэ́скэ сарэ́нца. 37И ёнэ сарэ́ рондлэ́, облэнас лэс и обчамудэнас, 38и ёнэ древа́н пиридживэнас пал лэ́скирэ лава́, савэ́ ёв пхэндя́, со ёнэ буты́р ние́кхвар на дыкхэ́на лэс. И ёнэ лыджинэ́ лэс пэ па́рма (кораблё).

Currently Selected:

Апостолэнгири Буты́ 20: ROMBALT

Highlight

Copy