Iáno 19

Haladé Uride Vianka Xrustostyr pe Šeró Isusóske

1Tedy Piláto lyjá Isusós i phendiá, sob (kaj) Les te marén čupniasa. 2I xaladé skhude viánka phusadytkone xrustostyr Léske pe šeró, i uridé pe Léste loló plaščo. 3I jone rakirdé: “Jav džidó, Králi Judéngiro!” – i mardé Les pir čama (ščoki).

Piláto Vylydžala Isusós ke Manušá

4Piláto nevéstyr vygijá ke manušá i phendiá lénge: “Ĥáda, me vylydžava Les ke tumé, sob (kaj) tumé te džinén, so me na lathjom nisaví bang dre Léste.” 5I tedy Isúso vygijá dre viánka phusadytkone xrustostyr i dro loló plaščo. I Piláto phendiá lénge: “Ĥáda, isyn kadavá Manúš!” 6Kiéli baré rašaja i Khangirjákire dynárja dykhné Isusós, jone zadyne gódla: “Primar, primar Les pe trušúl!” Piláto phendiá lénge: “Tumé len Les i kokoré primaren, pal-dová so me nisaví bang na lathava dre Léste.” 7Judy otphendlé léske: “Aménde isyn Zakóno, i pir amaró Zakóno Jov isyn bangó te merél, pal-dová so Jov kerdiá Pes Devléskire Čhavésa.” 8Syr Piláto šundiá davá, jov butýr strahadyja, 9i jov nevéstyr gijá dro sendariskiro kher, i phendiá Isusóske: “Katýr Tu san?” Ne Isúso nisó léske na otphendiá. 10Tedy Piláto rakiréla Léske: “Ci na kamésa Tu mánca te rakirés? Ci na džinésa Tu, so mánde isyn pravo te otmekav Tut, i te primaren Tut pe trušúl?” 11Isúso otphendiá. “Túte na javélas pe Mánde ni savó pravo, kóli (so) te na javél túke dynó Devléstyr. Pal-dová so baredýr grého isyn pe odoléste, kon zdyja Man ke tu.” 12Dalé momientostyr Piláto rodelas, syr saštý te otmekél Les, ne Judy zadyne gódla: “Kóli (so) tu otmekesa Les, tu na san drúgo (mal) Kiesarjoske. Kažno manúš, savó keréla pes kralísa, odová isyn proti Kiesarjoste.” 13Kiéli Piláto šundiá dalé lavá, jov vylydžijá Isusós i besciá pe sendariskiro štéto, so značynéla pir judýtko čib “ĥavafa”;

Judy i Léngire Šeralé Otphenenape Isusóstyr, syr Kralístyr Palatunó Mólo

14sys parastivín (piatnica) angíl Patradí, davá sys pašdyves. I phendiá Piláto Judénge: “Ĥáda, tumaró Králi isyn!” 15Ne jone zadyne gódla: “Le, le, primar Les pe trušúl!” Piláto rakiréla lénge: “Mánge te muliakirav tumaré Kralís?” Rašángire barydyrá otphendlé: “Aménde nane nisavó Králi apríč Kiesarjoste.”

Isúso isyn Primardo pe Trušúl

16Tedy sataki Piláto zdyja Isusós te primaren pe trušúl. Rimóskire xaladé lyné Isusós i lydžiné, 17i Isúso lydžijá Péskiro trušúl i gijá ke dová štéto, savó kharélape “Čeriepnytko štéto”, pir judýtko čib “Golgofa”; 18Odój jone primarde Les pe trušúl, i khetané Lésa duje manušén, jekhés pir jekh rig i javirés pir javír rig Léstyr, a Isusós maškirál. 19Piláto kerdiá podčhinyben i čhudiá pe trušúl i odój sys čhindló: “Isúso Nazariejo, Judéngiro Králi.” 20Adavá nadčhinyben but Judy gindlé, pal-dová so štéto, kaj Isúso sys primardo pe trušúl, sys nádur foróstyr, i sys čhindló pir judýtko, pir griekítko (balamítko), pir rimóskire čibá (čibjá). 21Judéngire baré rašaja phendlé Pilatoske: “Na čhin ‘Králi Judéngiro,’ čhin, so kadavá Manúš kharelas Pes ‘Judéngire Kralísa.’ 22Ne Piláto otphendiá lénge: “So me čhindjom, mek dová te javél čhindló.” 23Kiéli xaladé primarde Isusós pe trušúl, jone lyné Léskire rizy i rosčhude pe štar pašá, kažnonéske xaladeske pir jekh paš; jone lyné i xitono, ne xitono na sys sudo, a jov sys khudo upralestyr. 24“Ame na javása te kušas les, – phendlé jone jekh jekhéske, – a fedýr čhurdasa kokalkico, syr žriébijo.” Mek te spolninenpe lavá, savé isyn čhindlé dro Svénto Čhinybén: “Jone roskerde Miré rizy maškír péste i čhurdenas žriébijo i pal Miro uribén.” Adiáke i kerdé xaladé. 25Pašýl trušúl, pe savó sys primardo Isúso, sys terdé Léskiri daj, i dakiri phen Maríia, xulany Klieopaskiri, i Maríia Magdalina. 26Isúso dykcia Peskirjá da i sykliaibnytkones, savó sys terdó pašýl, savó sys drógo Léske, i rakiréla Péskire dáke: “Drógo Džuvlije! Ĥáda, isyn tyró čhavó.” 27Tén'ci Isúso rakiréla sykliaibnytkoneske: “Ĥáda, isyn tyrí daj!” I odolé momientostyr adavá sykliaibnýtko lyjá la ke pe.

Isusóskiro Meribén

28Isúso džindiá, so saró kakaná kerdiápe, sob (kaj) te kerélpe saró pir Svénto Čhinybén, i phendiá Jov: “Me kamám te pjáv.” 29Adáj sys terdó khoró (žbano), pherdó šutle moliasa (vinosa). Xaladé kindiakirde gubka dre šutly mol i čhudé la pe isoposkire – destoskiri rand', i podlydžine ke Léskire uštá. 30Kiéli Isúso koštyndia šutly mol, Jov phendiá: “Kerdiápe!” Jov obmekcia Péskiro šeró, vyphurdyja Péskiro dúho (fáno) i myjá.

Isusóske Promarena Pašvaro

31Ne syr davá sys parastivín (piatnica), i Judy na kamlé, sob (kaj) trúpy te javén ublade dro sávato (subóta), paldavá so dro dová Sávato sys baró svénko, jone mangné Pilatos, sob (kaj) te pirimaren lénge ĥerá i te zlen len trušulendyr. 32Paldavá javné xaladé, pirimarde ĥerá jekhéske i javireske, savé sys ublade khetané Lésa; 33ne kiéli jone podginé ke Isúso, jone dykhné, so Jov myjá, i jone na lyné te pirimaren Léske ĥerá, 34a jekh xaladendyr phusadia čhurdypnytkone bustiasa (kop'josa) Léske dro pašvaro, i adáj že thadyja rat i paní. 35I davá dosykadia manúš, savó dykhciá, léskiro dophenybén isyn čačunó; jov džinelas, so rakirdiá čačipén, sob (kaj) i tumé te patián. 36Pal-dová so saró davá sys, sob (kaj) te spolninélpe Svénto Čhinybén: “Ni jekh Léskiro kokalo na javéla phagirdó. 37Adiáke-pac' i dro javír štéto Svénto Čhinybén rakiréla: “I jone javéna te dykhén pe Odoléste, Konés jone phusadé čhurdybnytkone bustiasa.”

Isusós Garavena

38Paló saró davá Joza Arimafejatyr, Isusóskiro sykliaibnýtko, čorahanés mangdiá Pilatos, pal-dová so jov darandyja Judendyr, sob (kaj) te zlen Isusóskiro trúpo: i Piláto dyjá vólia. I gijá Joza i lyjá Isusóskiro trúpo. 39I javdiá adiáke-pac' Nikadimo, savó ĥaredyr javélas ke Isúso ratý, i jandiá pašé šel funty lačhé-khandypnytko sostavo (dzet), dro savó sys zmiešyndlo miro alojosa. 40Jone lyné Isusóskiro trúpo i zakrencindle Les pothanesa, savó sys pomakhno aromatytkone čar'jenca adiáke, syr Judy sarén garavenas. 41Pe dová štéto, kaj Jov sys primardo pe trušúl, sys únta (sado), i dre doiá únta sys neví koplíca, dre saví nikón angledýr na sys garadó. 42Adiáke, syr davá sys dre Judengiri parastivín angíl Sávato i koplíca sys pašýl, jone odorík i čhudé Isusós.

Currently Selected:

Iáno 19: ROMBALTR

Highlight

Copy