Mareko 8

1HABA hnyi je bong eling, me e hu hmetu tavat ae se hia hmonyin, ke ba ö ʼdra, me e ame hawâ laten me ha ködrin, ka habe, 2Inya oge me betenge ge tavat ae se hia, anyin a ödra bong kun dut unyik, ke ba ö ʼdra: 3ke oge ne he ka kunʼ ödra ka hnyi umödra je uma ke ödra mekihnânem, me adre me he ka momonu eû hnyi gethen; anyin a sâkâû ta je dok a mwi hnyin keihen. 4Haba laten ödrin e thu kâu, ka habe, ûnyi ua adre me he ka osekunâ tavat ang ge areto hnyi hnyebuba eang? 5Ke e ame hnei ödrin, ka habe, Ve ta areto gabun? Haingödrin, Seven. 6Me e ame hûna ka tavat ae se hia he ka laba ju hon kânâ: ke e ame hom je areto a seven, ke hwaban hna oleâ e ame thuthu, me ham ka laten, he ka ip hnyi hnyimakodra; me ödrin e ip hnyi hnyimakan tavat ae se hia. 7Ke e unyidrin minya ke je wâ ae ûhnyûkong: ke hwaban hna oleâ, e ame ûkhûnöng he ka ip minya e hnyi hnyimakodra. 8Ke adre me han me ame sekudra thö: me adre me hom dö je kolon hna han seven ta je tang. 9Ke helâ me foa thauzan tavat, me e ame kunʼ ödra. 10Ke e ame ie ölö thö ka hnyi hon hu tha e me laten, me he ka hnyi ke keihen Dalemanutha.

11Ke ame o but ta je Faresaio me hwân he ka hnö e, adre me elâm gan haten ûnyi hnyi drany he ka cubec e. 12Ke e ame mâng hwege eû hnyi hnyekon me ha, ka habe, Ieû ge do ang adre me elâm haten? e hnathu inya oge me ha köbun ka habe, Adre me ca he ka ham haten ka dö ang. 13Ke e ame hnʼ ödra but, me ölö hmetu hon hu ai, me kec ka hnyi ke keihen.

14Ke ödrin e hnying hok kamec; khaca thibi areto unyidrin hon hu. 15Ke e ame hûna ködrin, ka habe, E, ö ʼbun aû ge leven anyin ta je Faresaio me leven anyi Heroda. 16Me adre me ûhnena-mököuâ, ka habe, E ba jeû gatin. 17Ke haba Iesu ame wâhmakhmeto, me e ame ha ködrin, ka habe, Ieû gabun öbun e ûhnenamököuâ, ka habe, anyin ae ba ö ʼbun? hawa öbun tiga ca wâ, me wâhmakhmeto? e khot bala bi je hnyekubun? 18E hu li emaköbun, kʼ öbun e ca wâ bi? ke hu li hnyikönyöbun, kʼ öbun e ca long bi? ke öbun e ca ûnykûme bi? 19Haba ji ge hnok hna thuthu je areto a thabûng ka tavat a faiv thauzan, ve ta tang a unöngöt a kolon öbun e hom? Haingödrin kâu, ka habe, Twelv. 20Me je areto a seven ka tavat a foa thauzan, ve ta tang a kolon a unöngöt öbun e hom? Haingödrin, ka habe, Seven. 21Me e ame ha ködrin, ka habe, Öbun e ca wâhmakhmeto bala bi?

22Ke ödrin e o but hnyi Bethesaida. Ke adre me hom but kâu at ae wadröu, me sumâtâ he ka kâlâ e. 23Me e ame hom hnyamen at ae wadröu, me lelö thö e ka hnyi hoton taun; ke a hia but hangöjâ li emakan, me ip li hnyamen hon, me e ame hnö e, ka habe, U me wâ ke ûnyi? 24Ke e ame bwele thö me ha, ka habe, Inya oge me wâ tavat; anyin oge me ö ʼdrin helâ me je ûö, adre me he. 25Ke e ame ip hmetu li hnyamen hon li emakan; ke e ame wâ hmâ, me ame so but, me wâ wia ta je ûnyi hia. 26Me e ame kunâ e ka hnyi hnyaban, me ha, ka habe, Ca mē dit bi ka hnyi taun.

27Haba Iesu ame tha he me laten, ka hnyi je ong taun hnyi Kaisaria Filipi: ke eû hnyi gethen e ame hnö laten, me ha ködrin, ka habe, Haba ifucin tavat gak, mʼ iny ia? 28Me ödrin e thu kâu, ka habe, Ioane Bapataiso: me keihen, ka habe, Elia; me keihen, ka habe, Hanen je perofeta. 29Ke e ame hnei ödrin, ka habe, Haba ifucibun gak, mʼ iny ia? Haingö Peteru ame thu kâu, ka habe, U thibi Keriso. 30Me e ame hûna ködrin, mʼ ödrin e ca ha bi ka ke at. 31Ke e ame hwân he ka nʼ ödrin, a gʼ ame he Nokon at ka vheno ta je vec ae se hia, kʼ ame he ka oûnyibâûâ e ge wahingat, me je taben tavat bihut, me hnyat sihnalimen, ke adre me he ka hlingâ e, kʼ ame he bi ka möt hmetu hwaban kun ta bong. 32E ame ha manenâ hofuc eling. Ke haba Peteru ame lelö thö e me hwân he ka thawâ e. 33Ke e ame hwio thö me wâ laten, me e ame thawo Peteru, me ha, ka habe, Satana lö, he thö ka hnyi hotuk: anyin a u je ca wâ ûnykûme ta je ûnyi anyin Khong, ke so thibi ta je ûnyi anyin at. 34Ke e ame hawâ tavat ae se hia me laten minya, me ha kodra, ka habe, A ne hu ke at ame weny he ka he hotuk, e so e he ka hamen hokhnyok, me hom anyin satauro me he hotuk. 35Anyin a haba at ame beomelö anyin möt, me ame he ka ohia e; ke haba at ame he ka hna anyin möt can inya me evangelia, me e ame he ka omelö e. 36Anyin a ieû troban ka at ame ne hom hmeledrany hia me me anyin bi, kʼ ame he bi ka hna but anyin möt? 37Ke ieû ke ûnyi ae ûcû ka at he ka ham hnân ûco anyin möt? 38Haba at ame he ka hmehma gak me hok ta je hofuc hnyi dö ang, a dö bi ûnyi monu, kʼ ame ânyâ ta je hulö, me ame he bi Nokon at ka hmehma gan hnyi ûen e ame tha o me ta je angela ae kap hnyi hmanenanginy Kamen.

Currently Selected:

Mareko 8: IAAI

Highlight

Copy