Mareko 5

1ME ödrin e khop dö hnyi ke keihen köiö, hnyi hnyei iny at Gadara. 2Ke e a hia but utut ûheny hon hu, me ame ie ûkhanö mē at a delec hanu ae kong, ame he ûheny hnyi je erkemok, 3at ame labö laba hnyi ta je erkemok: ke ba at ae khana he ka ca e, e ca khanʼ ödra he ka ca ge tö fao; 4anyin a ödra osehia ca li can me li benyin ge tö fao, ke e ame thamuâ hna ca li benyin, me thu amamâ hna ca li can: ke ba at ae hwege he ka ohnamâ e. 5E ame laba bala hnyi lit me lany hnyi je erkemok me je bucen, ame tenge, me ka hamen bi kave e ge veto. 6Ke e ame bwele sâkâû me ö Iesu, me e ame wadring me khudrung ju kâu; 7me fuc ae gan hwan, ka habe, Ieû gam könya Iesu a Nokon Khong ae beönua? Inya oge me khöû köu ûnyi hnyi ien Khong, u ma ca oveci nya. 8Anyin a e ame ha kâu, ka habe, Hanu ae kong, didrut ûhem hnyi hnyin at. 9Ke e ame hnö e, ka habe, Ia iâm? me e ame thu kâu, ka habe, Legeona iök, anyin a ohmun se hia. 10Ke e ame khöû hwege kâu, me me ca he ka obâ e ûnyi hnyi hnyei. 11Ke eling hnahat buaka ae se hia ame han tot hmelen bucen. 12Me ödrin e khöû kâu, ka habe, Ö u he ka obʼ ohmun ka hnyi je buaka, mʼ ohmun e he ka dilic ödra. 13Me e ame hnʼ ödrin dut. Me ame didrut ta je hanu ae kong, me delec je buaka: me ame wadring ut hnahat buaka ûheny dö hnyi dok ae hwatapkolu ka hnyi köiö, me ame û but eû hnyi köiö, ödra helâ me tu thauzan. 14Me ame kec ut tavat adre me han buaka, me thumetu e hnyi taun me hnyei. Ke adre me o thö he ka hnyi wâ hna ânyâ. 15Ke adre me o but kö Iesu, me adre me wâ at eji a delec hnen je demoni, kʼ ame laba a khaû, ke metâ but, waleji at a delec hnen legeona: me adre me ot bi. 16Ke haba tavat adre hia but wâ, me adre me ha kodra bongon hna mâdrâ ka at a delec demoni, me bongon je buaka. 17Ke adre me hwân he ka khöû kâu he ka hna but idra hnyei. 18Ke e ame ölö thö ka hnyi hon hu, me haba at a delec demoni ame sumâtâ e, he ka tha laba mē. 19Ke e ame ca ogâ e, ke haingen bi kâu, ka habe, He thö ka hnyi hnyabam, ka je lahanâm, me omanenâ ködrin ûnyi ae gan a mâdrâ köu Than, me hnen hna betenge gam. 20Ke e ame he me hwân he ka khetâ hnyi Dekapoli ta je ûnyi ae gan a mâdrâ kâu Iesu: me adre me lâiâ hia.

21Ke haba Iesu ame kec hmetu hon hu ka hnyi ke keihen, me ame ûkhacaköu hia thö kâu tavat ae se hia hmonyin: ke e hakekeny jut ka hnyi köiö. 22Ke ame o but ke taben sunago Jairo ien; ke a wâ but e, me e ame ta ju hmelen li can, 23me khöû hwege, ka habe, Ame he but ka mok nokuk in ae ûhnyûkong: ö u he thö jem he ka me ip li hnyamâm hon, me me so but, me me he ka mödrut. 24Ke e ame tha he mē; ke se hia hmonyin tavat adre me he hoton mē, me adre me ûhneki mē.

25Ke wale momo ame moko dra ame hingölö hnyi twelv je huna, 26ke e gan hmâ anyin vec ûnyi ge tavat tren bubuny ae se hia, ke ba hia but tang omjehen anyin hna ham ködrin, ke ba troban, ke ame gan tot bi mok, 27ke a long ut bongu Iesu, me e ame he hnyi wanben tavat ae se hia hoton me kâlâ anyin ûkhaû. 28Anyin a haingen momo, ka habe, Oge ne he ka kâlâ thibi anyin ûkhaû, oge me he ka möt. 29Ke ame ie hme thö dra ge momo; ke a long ut momo unyin ae mödrut ûnyi hnyi mok eling. 30Haba Iesu ame ka ie wâhmakhmeto eû hnyin a ga didrut man gan, me e ame hwio thö hnyi wanben tavat ae se hia me ha, ka habe, Ia kâlâ anyik ûkhaû? 31Haba laten ödrin e ha kâu, ka habe, U me wâ tavat ae se hia adre me ûhneki köu, me u je ha, ka habe, Ia ame kalö nya? 32Ke e ame hngehngele he ka wâ momo a mâdrâ ûnyi eling. 33Ke haba momo ame ot me öbubuny, anyin ae khana hna ânyâ kâu, me ame o but me khudrung kâu, me ha hia hnathu kâu. 34Me e ame ha ka momo, ka habe, Nokuk lö, u je möt ut hnen ânyâm labageju; he thö me hnahic, me u je mödrut ûnyi hnyi ânyâm mok.

35Ke e ame tiga fuc, me ame o but je ûthumetu ûnyi hnyi hnyaban taben sunago, me ha, ka habe, A mokcu nokom in: hnân eû he ka ûjengö hmetu At ûne? 36Ke haba Iesu ame ca oûnyihnatho hna ha, ke ame ha ka taben sunago, ka habe, Ca ot, ke labageju ju. 37Ke e ame thawʼ ödra me me ba ju at ame he ka he hoton, ke so thibi Peteru, me Iakobo, me Ioane liamekeiny me Iakobo. 38Me ödrin e o but ka hnyi uma umen taben sunago; ke e ame wâ tavat adre me mede, me hnyamok, me tenge thungaû. 39Ke e ame didro me ha kodra, ka habe, Ieû gabun öbun e mede, me ûtengiö? a ca mokcu wanakat, kʼ ame mokut. 40Ke adre me hluma e. Ke a hia but obʼ ödra hia, me e ame hawâ kamen me hinyen wanakat, me je hnyat unyin, me didro ka hnyi dok ame mokut hnyin wanakat. 41E ame hom hnyamen wanakat me ha kâu, ka habe, Talitha kumi; bongon, Hlu lö, inya oge me ha köu, ka habe, Todrö. 42Me ame ie todrö hlu me he, anyin a twelv hunainy. Me adre me ie lâiâ gan hmâ. 43Ke e ame hûna kodra me me ca manen ka ke at: kʼ ame hûna he ka bân in.

Currently Selected:

Mareko 5: IAAI

Highlight

Copy