Mareko 3

1KE e ame dit hmetu thö ka hnyi sunago; ke eling at ae meleca hnyamen. 2Me adre me tuö e, hawa, ame ne he ka osoâ e hnyi bong sabath; mʼ adre me he ka bi fuco e. 3Ke e ame ha ka at ae meleca hnyamen, ka habe, Todrö hnyi wanben. 4Me e ame ha kodra, ka habe, Hawa, e ûcû he ka mâdrâ so hnyi bong sabath, hawa, he ka mâdrâ monu? he ka omelö, hawa, he ka omoko? Ke adre me laba hnyibû but. 5Ke e ame mē wâ igigili ödra hnyi hmonyin, ke ame vec can ae khot ta je hnyekudra, me e ame ha ka at, ka habe, Lau but hnyamâm. Ke e ame lau but: me ame so hmetu but hnyamen. 6Me ame didrut ta je Faresaio, me ie ûhnenamö me hnyat Herodiane, mʼ adre me he ka hlingâ e.

7Haba Iesu me laten ödrin e tha he ka hnyi hobat köiö: ke se hia hmonyin tavat adre me he hoton ûhedra Galilaia: me ûhedra Juda, 8me Jerusalema, me Idumea, me ke keihen hnyei hoton Joridano, me tavat igigilo Turo me Sidona, ödra se hia hmonyin, adre long ut ta je ûnyi ae gan e ame ânyâ, me adre me he but kâu. 9Me e ame ha ka laten, mʼ ödrin e he ka hok hu ae ûhnyûkong he ka halubahingen, anyin ae se hia tavat, wâ adre nye he ka ûhneki mē: 10anyin a e ame hia but osoâ tavat ae se hia; waleling me me ûhneki kâu tavat a ödra tren mok he ka kâlâ e. 11Ke hnyi je ûen a wâ but e hnen ta je hanu ae kong, me ödrin e nom ju kâu me hongot, ka habe, U thibi Nokon Khong. 12Ke e ame thawâ hwegi ödra, wâ adre nye he ka omanenâ e.

13Ke e ame ölö thö ka hnyi bucen, kʼ ame hawâ kâu hnyat ae weny: me ödrin e he but kâu. 14Me e ame otilâ hnyat a twelv, he ka tha laba mē, me me he ka kunʼ ödrin he ka khetâ, 15me he ka hu man he ka obâ ta je demoni: 16me e ame hwenyi iö Simona, ka habe Peteru; 17haba Iakobo nöku Zebedaio, ke Ioane liamekeiny me Iakobo; me e ame hwenyi iödru, ka habe, Boanerege, walang bongon, Li lakon hendreng: 18ke Anederea, ke Filipo, ke Batolomaio, ke Mataio, ke Toma, ke Iakobo nöku Alefaio, ke Thadaio, ke Simona at Kanana, 19ke Juda Isakariota at a alecuâ e. Ke e ame dit ka hnyi ke uma. 20Ke ame ûkhacaköu hmetu tavat ae se hia, me me ca khanʼ ödrin bi he ka han. 21Ke e khana but lahanen, me ödrin e he but he ka kât e, anyin a haingödrin, ka habe, E a monu but. 22Ke haingen tavat sihnalimen tavat adre me o ûhedra Jerusalema, ka habe, E unyin Belezebuba, ke, E ame obâ ta je demoni ûnyi ge tuhan ta je demoni. 23Ke e ame hawʼ ödrin kâu, me ha kodra hnyi ta je ûhöûcû, ka habe, Ama kâmâu Satana ka obâ Satana! 24Ke a ne imouköu ke dokhu, e ca khana dokhu eling he ka tethmâ. 25Ke a ne imouköu ke lap a je liamekeiny, me ca khana lap eling he ka tethmâ. 26Ke a ne Satana ame ka tot metâ kâu bi, me imouköu, me ca khana bi he ka tethmâ, kʼ ame he ka obiny kâu. 27Ke ca khana ke at he ka dit ka hnyi uma umen at ae hwege, me söh anyin ta je ûnyi, ame ne ca bân ka ca at ae hwege; waleling me ame he ka söh umen uma. 28E hnathu inya oge me ha köbun, ka habe, Adre me he ka hna degecâ ta je monu hia a ânyâ ge tavat, me je bigan a hnödra ta je hna bigan: 29ke haba at ame he ka bigan ka Hanu Kap, me adre me ca he ka hna degecâ, kʼ ame he bala anyin hulö ka mokut hon nyiele balua: 30anyin a haingödra, ka habe, E unyin hanu ae kong.

31Me ame o but hinyen me je liamekeiny mē, me ûtitilen eû hnyou, me ûkhûnöng he ka hawâ e. 32Ke ame laba igigilo e tavat ae se hia, me adre me ha kâu, ka habe, Wâ bi, hinyâm me je liamekeiny möu ödrin e elöm u. 33Ke e ame thu kodra, me ha, ka habe, Ia hinyök me je liamekeiny mönya! 34Ke e ame hngehngele igigili ödra adre me laba igigilo e, me ha, ka habe, Wâ bi hinyök me je liamekeiny mönya! 35Anyin a haba at ame he ka mâdrâ weny Khong, wale thibi e liamekeiny mönya, me hanik, me hinyök.

Currently Selected:

Mareko 3: IAAI

Highlight

Copy