Mareko 13

1E AME didrut ûheny hnyi uma kap me ame ha kâu ke at hnyi je laten, ka habe, At ûne lö, wâ bi je veto ae gan hmâ me hna up veto! 2Ke haba Iesu ame ha kâu, ka habe, U je wâ hna up veto eang ae gan? ame ca he ke veto ka hnen hon ke veto, ke adre me he ka thö degecâ hia.

3Ke e ame laba hon bucen Elaio cicö uma kap, haba Peteru me Iakobo me Ioane me Anederea ödrin e hnö duöngâ e, me ha, ka habe, 4Ha thö kohmun ame he ka o kehö ta je ûnyi e? ke ieû haten ame he but ka hwâdâ ta je ûnyi hia e? 5Ke haba Iesu ame hwân ka ha ködrin, ka habe, Wâ eâu e nye omonu öbun dut ke at. 6Anyin a at se hia adre me he ka o hnyi iök, me ha, ka habe, Inya ang; ke adre me he ka omonoâ tavat ae se hia. 7Ke öbun ka long hwan ta je vat me hon vat, ca ot bi: anyin ae ûcû he ka o ta je ûnyi e; ke tiga hia bi obiny. 8Anyin ame he ka tot ke hnyei ka ke hnyei, me ke dokhu ka ke dokhu: ame he ka hu je hwiöi hnyi ke je dok; ame he ka o ta je hmiâ. Wale hwân ta je vec.

9Ke wâ eâu öbun, anyin adre me he ka hnʼ öbun ka tavat ûhnei; ke adre me he ka osoi öbun hnyin ta je sunago; ke öbun e he ka todrö hnyi hnyimakan ta je gavena me than, can inya hnân ohnathoâ kodra. 10Ke ûcû he ka mē khetâ evangelia ka ta je hnyei hia thithö. 11Ke ödra ka he ka lili öbun, me hnʼ öbun, ca he ka ie ûnykûme ûnyi hnân he ka ha: ke haba hofuc adre me he ka ham köbun hnyi ûen eling, ha thö: anyin a ca öbun ling tavat öbun e ha, ke Hanu Kap bi. 12Ame he ke liamekeiny ka hna liamekeiny mē ka mok, ke helâ kamen ka nokon; ke ame he lakon ka tot ûcon kamödrin me hinyödrin, he ka hlingʼ ödru. 13Ke ame he tavat hia ka hûkötiʼ öbun can iök, ke haba at ame he ka tethmâ ke ne o but obiny, ame he ka möt.

14Ke öbun ka wâ ûnyi ae ikiki, at ame okongoâ, ame tot hnyi dok a ca hnen bi (e so he ka wâhmakhmeto ju hnen at ame aû) wale ûen ae ûcû he ka kec hnen tavat Juda ka hnyi je bucen: 15ke haba at hnyi hon uma, me so e ame ca ut bi he ka dit me hom ke ûnyi ûnyi hnyi uma: 16ke haba at hnyi ta hnyei, me so e ame ca hmetu bi he ka hom anyin ûkhaû. 17Ekölö ge tavat a ödra erkin, me tavat adre me ûasin hnyi ûen eling! 18Ke hic ju öbun me me ca he ka o ûnyi e hnyi ûen ae megic. 19Anyin ame he ka hu vec hnyi je bong eling, ae ba helâe hnyi hwân hna op ta je ûnyi hia, waleji a op hnen Khong ke ne o but walang ang, ke ba minya ame he ka helâe. 20Kʼ ame ne ca owakhaletâ ta je bong hnen Than, me ba at ama möt: ke so bi, can tavat adre hia but ûca, waleji e ame ûca, me e ame he ka owakhaletâ ta je bong. 21Ke a ne ke at ame he ka ha köbun, ka habe, Wâ bi, Keriso but ang, ke wâ bi, e but e; ca kap bi: 22anyin ame he ka o ta je Keriso thoi, me ta je perofeta thoi, ke adre me he ka omanenâ ta je haten me ta je ûnyi hnân lâiâ, mʼ adre me he ka omono tavat adre ûca, a ne ca pason. 23Ke wâ eâu Öbun: wâ bi, oge me omanenâ bânâ köbun.

24Ke haba hnyi je bong eling, hwaban hna ûöveci eling, me ame he ka menekholom but seûnö, kʼ ame ca he ka melam tehi, 25kʼ ame he ka labö kölu ta je okhû ûnyi hnyi drany, ke adre me he ka jijingâ ta je man ethö hnyi drany. 26Me adre me he ka wâ Nokon at ame he ka o hnyi ta je ûlâ tha e me man ae gan me hmanenang. 27Me e ame he ka kunâ anyin ta je angela he ka ûkhacaköuâ hnen ta je hna ûca ûnyi hnyi je ang a vak, hwân hnyi can hmeledrany ke ne o but hnyi can drany.

28Nâ thʼ öbun ûhöûcû me imeta: e tiga but bi je anginy, ke hlau je lan, me khanʼ öbun dut ae hakekeny hnyeun; 29helâe minya öbun, öbun ka wâ ta je ûnyi eling ame o, me khanʼ öbun do ae hakekeny jut, ae but ang hnyi hwanuma. 30E hnathu inya oge me ha köbun a gʼ ame ca he ka hia dö ang, ke ame he ka hwâdâ ta je ûnyi hia e. 31Ame he bi ka hia drany me hmeledrany, kʼ ame ca he ka hia hok ta je hofuc. 32Ke haba bong me awa eling me ba at ae khana, e ca khana ta je angela hnyi drany, me Nokon, ke hake Kamen thibi. 33Wâ eâu öbun, hmâkâ thö me hic: anyin ae ca khanʼ öbun ûen. 34Ame helâ mê ke at ame he but, me mē laba hnyi ke hnyei, me hna but umen uma, me ham musi ka lathnyabainy, ame ve khene anyidrin huliwa, me hûna ka at ame tuö hwanuma he ka hmâkâ. 35Anyin a wale, hmâkâ thö: anyin ae ca khanʼ öbun ûen ame he ka o tuhan uma, ame ne sahac, ame ne wanbenset, ame ne hnyi ûen ame kokok khoto, ame ne hnyomakatu: 36wâ e nye ie o me ō bun Öbun e mokut. 37Ke haba hnok hna ha köbun, inya oge me ha minya ka tavat hia, ka habe, Hmâkâ thö.

Currently Selected:

Mareko 13: IAAI

Highlight

Copy