Mareko 14

1HWABAN lo li bong adre me he ka bi paseka, me areto adre ca levenâ bi: haba je taben tavat bihut me hnyat sihnalimen, adre me heleû deny he ka kât e ge hofuc iyawö, mʼ adre me he ka hlingâ e: 2anyin a haingödra, ka habe, Ca hnen bi hnyi bijeû, wâ e nye imonumonuny tavat.

3Ke e ame laba Bethania hnyi uma umen Simona a lepera, e ame laba ka han, me ame o but ke momo ae hu gan kaia alabasa tangen muro, hing narado ae gan hwaban; ke haba momo ame thö kaia, me hingâlâ hnyi hon ban. 4Ke haba keihen ame hmönyidrin me ha, ka habe, Hnân eû he ka okongoâ helâe muro? 5Anyin a haba muro ang, adre ne ûco, me ûhnyûkong theri haded je denari hwaban, mʼ adre me he ka ham ka ta je theduoc. Me adre me ulidro momo. 6Ke haba Iesu ame ha, ka habe, Hna ju momo; ieû gabun öbun e ovecâ e? e so hnen hna mâdrâ könya. 7Anyin a e bala ang unyibun ta je theduoc, ke khanʼ öbun he ka mâdrâ so ködrin hnyi ûen öbun e weny: ke oge me ca he bi nya ka laba bala unyibun. 8A hia but momo ânyâ hnen hna khana: e ame bân ka osûâ unyik hobi kâu hnödra hna he ka könim nya. 9Ke e hnathu inya oge me ha köbun, ka habe, haba ta je hnyei hia thithö hnyi hmeledrany, adre me he ka khetâ hnyin uthumetu ae so, me adre me he minya ka haimemenâ hna ânyâ hnen momo ang, hnân he ka ûnykûme kâu.

10Ke ame he Juda Isakariota, hanen hnyat a twelv, ka je taben tavat bihut, me me he ka alecuâ e ködrin. 11Ke adre me long ut, me adre me senyin me ha bânâ he ka ham kâu mone. Me e ame heleû deny ae ûcû he ka alecuâ e.

12Hnyi bong a bân hnyi bijeûiny areto adre ca ʼlevenâ bi, a ûen he ka hlingâ paseka, me ame ha kâu laten, ka habe, Ewa dok ae wem ohmun e he ka penapena mʼ u me he ka han paseka? 13Me e ame kunâ li laten me ha ködru, ka habe, He thʼ öbn ka hnyi taun, kʼ ame he ka ukhanö möba ke at ame vadren kaia ae lup: he thʼ öbu hoton; 14ke haba uma e ame he ka dit ka hnyin, ha thʼ öbu ka at ae tren uma, ka habe, Haingen At ûne, ka habe, Ewa hnyeuleny je atkanyua, wale oge me he ka tha han paseka hnyin me latök? 15Me e ame he ka hamen kû köbu hnyeule ae gan ethö adre me bi onyen me penapena: awe, penapena ju ling hobi kötin. 16Me ame he but li laten, me o ka hnyi taun, me wâ helâ me hnen hna ha ködru: me ödru me penapena paseka.

17Ke hnyi sahac e ame o but tha e me hnyat a twelv. 18Ke ödrin e tiga laba me han, haba Iesu ame ha, ka habe, E hnathu inya oge me ha köbun, ka habe, Ame he ke at gabun ka alecuo nya, wale at ame tha han mönya. 19Me ödrin e hwân he ka hmak, me ve ha gaga kau, ka habe, Ia, inya? 20Me e ame ha ködrin, ka habe, Ke at hnyi twelv at ame tha hnû jeû mönya hnyi mini. 21Anyin ame he ka he but Nokon at helâji me hna sihnalimen gan: ke ekölö ge at eling ame he ka alecuâ Nokon at! E so ka at eling adre ne ca hnokoâ e.

22Ke ödrin e tiga han, ke e ame hom areto, me oleâ, me thuthu me ham ködrin, me ha, ka habe, Hom dʼ öbun: walang unyik. 23Ke e ame hom utköiö, me oleâ me ham ködrin: ke ödrin hia ödrin e ic. 24Ke e ame ha ködrin, ka habe, Walang drök ûnyi hnyi ûhihinyköu, wale adre hingâlâ hobi kâu tavat ae se hia. 25E hnathu inya oge me ha köbun, ka habe. Oge me ca he hmetu, ka hnyi ijem wan vine, ke ne o but oge me be ka ijem a teb ûnyi hnyi dökhu dokhon Khong.

26Ke ödrin e hia but hai khumöng, me ödrin e he but ka hnyi bucen Elaio.

27Ke haba Iesu ame ha ködrin, ka habe, Öbun e he bi hia ka thö thö: anyin adre bia but sihnalimen, ka habe, Oge me he ka kot at ame tuö je mamoe, me ame he ka vese but ta je mamoe. 28Ke iny ka möt hmetu thö, oge me he ka bök Galilaia ai, ke bilibun biju. 29Ke haba Peteru ame ha kâu, ka habe, Ödrin e ne he hia thithö ka thö thö gam, o ge me ca he ka hnyi thö thö. 30Ke haba Iesu ame ha kâu, ka ʼhabe, E hnathu inya oge me ha köu, a haba u, hnyi bong ang, wale eâu hnyinghet, ke tiga ca olo bi kokok khoto, me u me he ka okun ivinö nya. 31Ke e ame fuc hwege hmonyin, ka habe, A ne ha-mök he ka tha mok möu, me oge me ca he ka ivinö u. Helâe minya hna ha gadrin hia.

32Ke ödrin e o but ka hnyi ke utkânâ Gethesemane ien: me e ame ha ka laten, ka habe, Më laba ju eang, inya mē he ju ka hic. 33Me e ame hum Peteru me Iakobo, me Ioane, me hwân he ka gan hmâ hlohlo me ti hmak hmonyin. 34Ke e ame ha ködrin, ka habe, Ame vec gan hmâ hanuk, helâ me mok: laba ju eang me hmâkâ. 35Me e ame he ûhnyûkong, me ta ju eû hnyi kânâ me hic me sumâtâ he ka hia awa eling gan, a ne ca pason. 36Me e ame ha, ka habe, Aba, Cica, e khanö u he ka ânyâ ta je ûnyi hia; hom dö gak kaia eang: ke ca ânyâ hoton wek, ke so bi wem. 37Me e ame o me ō ʼdrin, ödrin e mokut, me haingen kö Peteru, ka habe Simona lö, hawa, u me mokut? e ca khanö u he ka hmâkâ hnyi awa a khaca? 38Hmâkâ thʼ öbun me hic, mʼ öbun e ca dit bi ka hnyi ûcûbic: e hnathu ame weny hanu, ke sënyin bi unyin. 39Ke e ame he hmetu ka hic, kʼ ame ha thibi hofuc a khaca. 40Ke e ame o hmetu me ö ʼdrin ödrin e mokut, anyin ae hmak je emaködrin; ke ca khanʼödrin ûnyi hnân thu kâu. 41Ke e ame okun o hmetu, ke haingen ködrin, ka habe, Mokut ju öbun walang ke menâ: soju ang; a o thö awa; wâ bi, adre hia but alecuâ Nokon at ka hnyi je hnyamen tavat ae kong. 42Todrö, otin e he thö: wâ bi, wale but ang at ame he ka alecuo nya.

43E ame tiga ha hofuc me ame ie o but Juda hanen hnyat a twelv, ke tha e mē tavat ae se hia adre me vhat hele vat me utöhmu, ûnyi ge je taben bihut, me hnyat sihnalimen, me wahingat. 44Haba at ame he ka alecuâ e ame hia but ha kodra haten, ka habe, Haba at eâu oge me he ka ûcimhnyimak mē, me wale bi e, kât ju, me lelö, me tuö wia e. 45Ke e ame o but, me e ame ie he kâu, me ha, ka habe, Rabi; kʼ ame ûcimhnyimak mē. 46Me adre me hinôbeny kâu, me kât e. 47Ke baba ke at gadrin ödrin e ûtitilen ame oc dö hele vat, me kot athnyabainy at bihut ae nua, me subâ but hnyikonyen. 48Haba Iesu ame ha kodra, ka habe, öbun e o me je hele vat me je utöhmu, helâke me ûcon at ae venöu he ka hum nya? 49Tha inya möbun hnyi je bong hnyi uma kap oge me ûne, kʼ öbun e ca kot nya: kʼ adre me ânyâ ûnyi ang me me hwâdâ hna sihnalimen. 50Ke ödrin hia ödrin e hna but e me kec ut.

51Ke ame he hoton ke hidröu a wadrâ unyin bi ecmano lino, ke adre me kât e; 52me e ame hna degecâ but ecmano lino, me kec gadra, ke ba ûkhaû.

53Ke adre me lili Iesu thö ka at bihut ae nua: me ame tha ûkhacaköu mē ta je taben tavat bihut, me wahingat me hnyat sihnalimen. 54Haba Peteru ame omise he hoton ka hnyi hnyin uma umen at bihut ae nua; ke e ame tha laba me je lathnyaba; kʼ ame hnyi hlök hnyi hnyimakan meic. 55Haba je taben tavat bihut, me tavat ûhnei hia, me ödrin e elâm at ohnatho ûcû Iesu he ka hlingâ; ke ba at adre me wâ. 56Anyin ae se hia tavat adre me ohnathoâ thoi gan, ke ca tha deny bi hnödrin je hna ha. 57Me ame todrö keihen me bifuco thoiâ e, ka habe, 58Öhmun e long e ame ha, ka habe, Oge me he ka kia uma kap eang adre me mâdrâ ge je hnyam, ke hnyi kun ta bong oge me he ka otilâ khaca adre ca mâdrâ ge ta je hnyam. 59Ke ca tha deny bala bi hnödra je hna ha. 60Me ame todrö taben bihut ae nua hnyi wanben, me hnei Iesu, ka habe, E ba hnân thu gam? ieû hnödra hna ohnatho gam? 61Ke e ame laba hnyibû, me ca thu bi. Me ame hnö hmetu e hnen taben tavat bihut ae nua me ha kâu, ka habe, U Keriso, Nokon At adre Ogânâ? 62Haingö Iesu ame ha, ka habe, Inya ang: ke öbun e he ka wâ Nokon at ame laba hnyi ke keihen metân man ame tha he me ta je ûlâiny drany. 63Haba taben tavat bihut ae nua ame kia anyin je ûkhaû me ha, ka habe, Hnân eû hmetu ka ke at he ka ohnatho? 64Öbun e hia but long hofuc bi gan: ieû ûnykûmenöbun? Me adre me thamuâ hia ae ûcû but kâu he ka mok. 65Ke haba keihen adre me hwân he ka hangöjâ e, me lan hnyimakan, me khaû e, me ha kâu, ka habe, Perofeta thö: ke haba ta je athnyaba adre me hom e me khaû. 66Ke haba Peteru ame laba eû hnyi hnyeûle, me ame he but kâu ke hlu, athnyabainy taben tavat bihut ae nua; 67ke e ame ö Peteru ame hlök, me e ame wâhmâ e, me ha kâu, ka habe, U minya ji unyin at Nazareta jia Iesu. 68Ke e ame ivinö me ha, ka habe, E ca khanö nya, ke oge me ca wâhmakhmeto bi hnâm hna ha: ke e ame didrut ka hnyi poretiko; me ame kokok dö khoto. 69Me ame wâ hmetu e hnen athnyaba a hlu, me e ame hwân ka ha ka tavat adre me ûtitilen, ka habe, Wale ke hanödrin. 70Ke e ame ivinö hmetu. Ke ca bec bi, haba tavat adre me ûtitilen adre me ha hmetu kö Peteru, ka habe, E hnathu, u hanödrin; anyin a u at Galilaia. 71Me e ame hwân he ka ha hofuc ûhangö me khemanyin, ka habe, E ca khanö nya at eling öbun e ha. 72Ke ame ie kokok khoto, a loiny. Me Peteru ame ûnykûme hofuc a ba Iesu kâu, ka habe, U me he ka okun ivinö nya ke tiga ca olo bi kokok khoto. Me e ame ûnykûme, me tenge.

Currently Selected:

Mareko 14: IAAI

Highlight

Copy