Mika 4
4
1KE haba hnyi je bong a biliny adre me he ka otethmâ buceniny uma kap umo Iehova hon ban je bucen, ke adre me he ka ogöranyâ e hon je hut, ke ame he ta je hnyei hia ka he kâu. 2Ke ame he ka o ta je hnyei ae se hia me ha, ka habe, Ai öbun mʼ ate me he ka ölö ka hnyi bucen anyi Iehova, me uma umen Khongu Jekob; ke e ame he ka nʼ öta ge deny je gethen, ke ate me he ka vheno je gethen ûnyi gan: anyin ame he ka he but hnanyibu ûheny Ziona, ke hofuc ho Iehova ûheny Jerusalema. 3Ke e ame he ka owisa ka ta je hnyei ae se hia, me fuc ka je hnyei ae hwege hnyi je dok ae sâkâû; ke adre me he ka kokot anyidra je hele vat me me hnân bi hwio kânâ, ke dödra je ö hnân hele subö vine: ame ca he ke hnyei ka hai hele vat ka ke hnyei, ke adre me ca he hmetu ka ûnö vat. 4Ke adre me he ka ve laba hmelen haledra je vine me hmelen haledra je imeta; ke ba at ame he ka ooti ödra: anyin a hia but ha hnen hnyimö Iehova tuhan sabaoth. 5Anyin a tavat adre me ve he hnyi ien ta je khongudrin, ke ate me he bi öta ka he hnyi iö Iehova Khonguta nyiele nyiele balua.
6Hnyi bong eling, haingo Iehova, oge me he ka ûkhacaköuâ tavat adre me he ci, ke oge me he ka ûkhöûnâ at adre obâ, me at oge hia but ovecâ; 7ke oge me he ka wia at ame ci me hnân kolon, me at adre degec me hnân hnyei ae hwege: kʼ ame he Iehova ka musi ödra hnyi bucen Ziona, hwân walang ang ke ne o but nyiele balua. 8Ke haba u tap tue anyin hnahat mamoe, hut anyin hluiny Ziona me ame he ka o köu; eke, ame he ka o musi a bân, wale dokhu dokhon hluiny Jerusalema. 9Ieû ang a u me kuku goranyai? E ba than hnyi wanbâm? a mokcu at ame bi hnyimâm, anyin ame khöû u hnen vec helâ me momo ame vec hnyekon? 10Vec dö, ke hnokoâ but, u hluiny Ziona, helâ me momo ame vec hnyekon: anyin a u me he ka he but walang ang ûnyi hnyi hnyin taun, me laba hnyi ta hnyei, me o ka hnyi Babulona; ke adre me he ka hûgûnö u ûhem e; kʼ ame he Iehova ka ûcû u eling ûnyi ge je iwahnaihmiöny möu. 11Ke walang ang ame ûkhacaköu je hnyei ae se ûcom, ke haingodra, ka habe, E so e ame kong bi, e so ate me wâ weta ka Ziona ge je emaköta. 12Ke ca khanʼ ödra je ûnykûmenö Iehova, kʼ adre me ca wâ ûnykûme anyin musi: anyin a e ame ûkhacaköu ödra helâ me je thi hwit ka hnyi hna huje hwit. 13Todrö, huje, u hluiny Ziona: anyin oge me he ka wia ânyâm fao meno me me fao bi, ke oge me he ka wia je boûjimen je bacam me me bras: mʼ u me he ka kot omomono je hnyei ae se: ke u me he ka ham kö Iehova hnödra je hna söh, ke je omjehedra ka Thaniny hmeledrany hia.
Currently Selected:
Mika 4: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
