Mika 3

1KE haingök, ka habe, Öbun na long ju, je at hnathu anyi Jekob, me tavat owisa ka lap anyi Isaraela: hawa, ca hamöbun he ka khanʼ öbun hna owisa? 2tavat adre me hûkotiâ so, ke wedra hulo; tavat adre me uja unen unyidra, ke viny ûnyi hnyi je jeiödra; 3tavat adre me an minya unyin lakeik; kʼ adre me uja unen unyidra, ke thu je jeiödra: eke, adre me susubʼ ödra helâke me hnân öt, ke helâke me je uthmeno hnân öt ae gan. 4Me adre me he ka tenge kö Iehova, ke e ame ca he ka thu kodra; eke, e ame he ka ikhâlâ hnyimakan gadra hnyi ûen eling, hoton ûkonginy anyidra ta je huliwa. 5Walang hna ha hnö Iehova ge je perofeta, tavat adre me omono lakeik; tavat adre me ûhûlû ge ta je nyudra, kʼ adre me hongot, ka habe, Ûsoköu; ke haba at ame ca hinö ûnyi ka hnyi je hnyimödra, me adre me penapena he ka vat më. 6Anyin a wale, ame he ka lit köbun, me me ba hna omanenâ köbun bi; kʼ ame he ka menekholom köbun, mʼ öbun e ca he bi ka bi khong; ke ame he ka dit seûno hon je perofeta, kʼ ame he ka khömet bong hudra. 7Ke ame he ka hmehma tavat wâ, me hlohlo tavat bi khong; eke, adre me he ka tube je esongodidra: anyin ae ba hofuc hwan Khong. 8Ke hnathu a iny unöngötö ge man ûnyi ge hanu Iehova, ke ûnyi ge hna owisa, ke tang hwege he ka omanenâ kö Jekob hnen hna hanyâûâ, me kö Isaraela anyin hulo bi. 9Ö öbun long ju ang, öbun je at hnathuiny lap anyi Jekob, ke tavat owisa ka lap anyi Isaraela, tavat hûkotiâ hna owisa, me ohwalö ta je ûnyi hia ae ûcû. 10Ke adre me op goranyai Ziona hnyi dra, ke Jerusalema hnyi hwakecin ae kong. 11Ke haba je homakan, me adre me owisa hnân hwaban, kʼ ame ûne tavat bihut ge hwaban, kʼ ame bi kong hnen je perofetainy ge mone: ke so bi hwakecidra he ka labageju kö Iehova, me ha, ka habe, Hawa ca Iehova hnyi wanböta? ke ba ûnyi ae kong ame he ka o köta. 12Anyin a wale adre me he ka wia kânâiny Ziona helâ me utkânâ can gabun, ke haba Jerusalema, me ame he bi hnân digic thatûnyi hnyin, ke buceniny uma me ame he ka helâ me je hut hnyi hnyot.

Currently Selected:

Mika 3: IAAI

Highlight

Copy