Mataio 28
28
1HABA hnyi obiny bong sabath, ke tiga okubelitiny bong a bân hnyi wik, ame o but Maria Magadalena me ke Mana he ka wâ erkemok. 2Ke wâ bi, wale hwiöi ae gan hmâ; anyin ame utut angela anyin Than ûheny hnyi drany, me o, me hagutâ veto ûnyi hnyi hnyimen erkemok, me laba ju hon. 3Haba hnyimakan helâ me hucuce, ke hau anyin ûkhaû: 4me ame Öbubuny hnyat tue me ot, ke helâke je komok ödrin. 5Haba angela ame thu me ha ka watamomo, ka habe, Ca ot bi: anyin ae khanö nya a öbun e elöm Iesu waleji adre osatauroâ. 6E hia but ang; anyin a e a möt hmetu thö, helâji me hnen hna ha. Ai öbun ka wâ dok waleji a mokut hnyin Than. 7Ke ie logot dʼ öbun me ha ka laten, ka habe, E a möt hmetu thö ûheny hnyi hna mok; ke wâ bi, e a bân dut Galilaia ai, ke bilibun biju; öbun e he ka iouny mē eling: awe, oge hia but ha köbun. 8Me ödrin e ie he logot ûhedrin hnyi erkemok me ot me senyin ae gan hmâ, me wadring he ka thumeto laten. 9Ke wâ bi Iesu ame ûkhanö mödrin, me ha, ka habe, Talofa. Me ödrin e be me kât li can, me khudrung ju kâu. 10Haba Iesu ame ha ködrin, ka habe, Ca ot bi: he thʼ öbun ka thumeto je liamekeiny mönya madre me he ka he but Galilaia ai, me ödrin e he ka iouny eling mönya.
11Ödrin e tiga he, me wâ bi, keihen hnyat tue ödrin e he ka hnyi taun, me thumeto je taben tavat bihut ge ta je ûnyi hia adre ânyâ. 12Me adre me ûkhacaköu me wahingat, me ûhnenamö, me adre me ham ka ta je soja mone ae gan, 13me ha, ka habe, Ha thʼ öbun, ka habe, Haba laten ödrin e he hnyi hnyinghet me venâu e, ke ohmun tiga mokut bi. 14Ke a ne o but hofuc e ka li hnyikonyen gavena, mʼ ohmun e he ka cubec e, me ohia anyibun hmak. 15Me adre me hom je mone, me ânyâ helâ me hna nʼ ödrin: ke haba hofuc e adre me labö ha ehele unyin at Juda, ke helâe minya ke ne o but hnyi bong ang.
16Ke haba laten a eleven ödrin e he Galilaia ai, ka hnyi bucen waleji a hia but Iesu kû ködrin. 17Ke ödrin e wâ but e, me ödrin e khudrung ju kâu: ke haba keihen ödrin e loloâ. 18Me haba Iesu ame o but ködrin me ba hofuc ködrin, haingen, ka habe, Adre hia but ham könya musi hia hnyi drany me eang hmeledrany. 19Anyin a wale, he thʼ öbun ka bi latök hnyi ta je hnyei hia thithö, me bapataisoi ödra hnyi ien Kamen, me Nokon, me Hanu Kap: 20ke nʼ ödra thö he ka vheno ta je ûnyi hia thithö waleji oge me hûna köbun: ke wâ bi, inya oge me tha e möbun hnyi ta je bong hia thithö ke ne o but ka hnyi obiny hmeledrany.
Currently Selected:
Mataio 28: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
