Mataio 27

1HNYI hnyomakatu, haba je taben tavat bihut hia me wahingatiny hnyei, adre me si hnö Iesu, mʼ adre me he ka hlingâ e: 2ke adre me ca e, me lelö thö e me hna but e kö Pilato a gavena.

3Ke a wâhmakhmeto but Juda at ame alecuâ e, a ga mou thö gan, me e ame ietra, me hom hmetu je mone a thote ka je taben tavat bihut me wahingat, 4me ha, ka habe, Oge hia but ânyâ hulö he ka alecuâ dra ae ba hnyikongon. Ke haingödra, ka habe, U me ha bi kohmun? ka u bi u. 5Me e ame degec je mone hnyin uma kap, me he but; me e ame he but me hnok. 6Haba je taben tavat bihut, adre me hom je mone, me ha, ka habe, E ca ûcû he ka ip hnyi tangen bwihlany, anyin a hwaban dra. 7Ke adre me ûhnenamö, me ûco hwaban e ke utkânâ anyin at ame up mini, me hnân khon komok a je atkanyaua. 8Waleling, mʼ adre me hwenyi ien utkânâ eling, ka habe, Utkânâiny dra, ke ne o but hnyi bong ang. 9Me ame hwâdâ thö hna ha ga Jeremia perofeta, ka habe, Adre me hom je mone a thote a hwaban at adre hia but ha me hwaban, wale a ha hwaban ge keihen lakon Isaraela; 10me adre me ham me hwaban utkânâ anyin at ame up mini helâ me hnen Than hna hûna könya.

11Ke Iesu ame tot hnyi hnyimakan gavena: ke haba gavena ame hnö e, ka habe, U tuhan at Juda? Haingö Iesu ame ha kâu, ka habe, U me ha e. 12Ke ame bi fuco e hnen ta je taben tavat bihut me wahingat, me e ame ca thu bi. 13Me haba Pilato ame ha kâu, ka habe, U me ca long a ödrin e osehia but bi fuci u? 14Ke e ame ca thu bi kâu ke hofuc a khaca: me me lâiâ gan hmâ but gavena. 15Ke haba hwakecin gavena hnyi ûen bijeû he ka labö thang ut ka tavat ke at adre ca, a at adre me weny. 16Ke e hu gadra at ae lung adre ca, Barabasa ien. 17Ke adre hia but ûkhacaköu, me haba Pilato ame ha kodra, ka habe, Ia webun oge me he ka thang ut köbun? Hawa, Barabasa, ame ne Iesu adre me hwenyi ien me Keriso? 18Anyin ae khana but a gʼ adre hna e can ihuhnyinköu. 19Ke e ame tiga laba hon taben owisa, ke haba âiân ame ûkhûnöng kâu he ka ha, ka habe, Ca he bi u ka ânyâ ke ûnyi ka at e ae wisa: anyin a oge hia but ibiose vec gan hnyi bong ang hnyi bwi. 20Ke haba je taben tavat bihut me wahingat adre me cubec tavat ae se hia he ka sumâtö Barabasa, mʼ adre me hlingö Iesu. 21Haba gavena ame thu, ka habe, Ia ae webun gadru, mʼ inye he ka thang ut köbun? Me adre me ha, ka habe, Barabasa. 22Haba Pilato ame ha kodra, ka habe, Ke ieû oge me he ka ânyâ kö Iesu adre me hwenyi ien Keriso? Me haingödra hia, ka habe, Osatauroâ thö. 23Me e ame ha, ka habe, Anyin a ie monu e ame ânyâ? Me adre me ha hwegiâ, ka habe, Osatauroâ thö. 24Ke a wâ but Pilato a e ame ca he ka ton, kʼ ame kû bi thö imonumonuny, me e ame hom utköiö, me hinyem hnyi hnyimakan tavat, me ha, ka habe, Iny alai ge dren at ang ae wisa: hamöbun biju. 25Haba tavat hia adre me thu, ka habe, E so e he dren ka takû ohmun me lakuhmun. 26Me e ame thong Barabasa but kodra: ke e ame osoi Iesu me hna but he ka osatauroâ.

27Haba je soja anyin gavena adre me hum Iesu ka hnyi uma umen than, me öûkhacaköuâ kâu je hanen deo vat hia. 28Ke adre me uny jut anyin je ûkhaû, me okhâvâ bi ge ûkhaû ae dra. 29Ke adre me hwâwâ je tö ae ûdedö hnân korona, me obicâ e, me ip hlowe hnyi hnyamen a metân; ke adre me ciboucâ hnyi hnyimakan, me hluma e, me ha, ka habe, E ge Tuhan at Juda! 30Me adre me hangöjâ e, me hom hlowe, me kot ban. 31Ke adre hia but hluma e, me adre me uny hmetu but ûkhaû gan me okhâvâ ge je ûkhaûen bi, me lelö thö e he ka osatauroâ.

32Ke adre me didrut me wâ ke at Kurene, Simona ien: me adre me muso e he ka tha he, me me he ka vadren anyin satauro. 33Ke adre me o but ka ke dok, Gologotha ien, haba bongon, me, hnen ibokomok, 34me adre me ham kâu waina adre ûhaniken me khöhlöng hnân ic: ke a hia but drem cubecâ, me e ame höcö he ka ijem. 35Ke adre hia but osatauroâ e, me adre me khenâ anyin je ûkhaû kodra bi, adre me ugleköbâ: 36ke adre me ûlalabainy me tuö e eling. 37Ke adre me ip ethö hon ban hna bi fuco e adre sihnalimen, ka habe, Walang Iesu a Tuhan at Juda. 38Me adre me tha osatauroâ mē li at venöu, ke at hnyi ke keihen metâ, me ke at hnyi ke keihen me. 39Haba tavat adre me he eling adre me hiâ e, me nyinyikâ je bödra, 40me ha, ka habe, E, u at ama kia uma kap, me otilâ hmetu hnyi kun ta bong, omeli u thö: u je ne Nokon Khong utut ûhem hnyi satauro. 41Ke helâe minya je taben tavat bihut, tha ödrin me hnyat sihnalimen, me wahingat adre me hiâ e, me ha, ka habe, 42E ame omelö keihen; ke haba e bi e ca khana bi he ka omelö e. E, Tuhan at Isaraela; e so e ame utut walang ang ûheny hnyi satauro, mʼ ate me he ka labageju kâu. 43E ame labageju ka Khong; e so e he ka omelö e walang ang, e ka weny e: anyin a e ame ha, ka habe, Inya ang Nokon Khong. 44Ke haba li at venöu waleji adre me tha osatauroi ödru mē, me ödru me hnyi haikongoâ helâe.

45Ke ame menekholom but hnyei hia, hwân hnyi awa a siks ke ne o but ka hnyi awa a nain. 46Ke helâke me hnyi awa a naininy Iesu ame hongot hwege, ka habe, Eli, Eli, lama sabakethani? walang bongon, ka habe, Khonguk, Khonguk lö, ieû gam u me hnö nya but? 47Haba keihen adre me ûtitilen eling adre me long, me adre me ha, ka habe, Haba at ang ame hao Elia. 48Ke haba ke at gadra ame ie wadring, me hom ohmanenâ, me hûlûlûâ hnyi vinega, me ip hnyi obiny hlowe, me habelen e. 49Ke haba kolon gadra, me adre me ha, ka habe, Më khanang: e so ate me wâ ame ne he Elia ka o he ka omelö e. 50Ke a hia but Iesu hongot hmetu, me e ame hna but hanon. 51Ke wâ bi, ame khekhe lo but mano singiny uma kap hwân ethö ke ne o but eû; ke ame jijing dö hmeledrany; me ame hmouca but ta je kic; 52ke ame memang ut ta je erkemok; ke se hia ta je unyin tavat ae kap a tavat adre me mokut, me adre me möt hmetu thö, 53me didro ûnyi hnyi ta je erkemok hwaban hnen hna möt hmetu, kʼ adre me didro ka hnyi taun ae kap, me manen dut ka tavat ae se hia. 54Ke haba keneturio, me tavat minya unyin, wale hnyat adre me tuö Iesu, ödrin e wâ hwiöi, ke ta je ûnyi adre me ânyâ, me ödrin e ot gan hmâ, me ha, ka habe, E hnathu Nokon Khong at ang. 55Ke wale minya omomo ae se hia adre me wâ sâkâûâ, waleji hnyat ödrin e he hotu Iesu ûheny Galilaia, me bi athnyabainy: 56ke wale minya unyidrin Maria Magadalena, me Maria hinyö Iakobo me Jose, me hinyen li laku Zebedaio.

57Ke haba hnyi sahac ame o but ke at ae tren omjeû ûheny Arimathea, Josefa ien, wale ke atö Iesu minya: 58haba at ang ame he but kö Pilato me sumâtâ unyi Iesu. Haba Pilato ame hûna bi he ka bâm. 59Ke Josefa ame hom unyin me lan e ge mano lino ae kalaut, 60me ip e hnyi anyin bi erkemok ae teb ûnyi, waleji e ame thö hnyin kic: me hagutâ veto ae gan ka hnyi hnyimen erkemok, ke e ame he but. 61Ke wale Maria Magadalena me ke Maria, ödru me laba cicö erkemok.

62Ke haba nyi, wale bong a hwaban bong hnân Penapena, ame ûkhacaköu thö kö Pilato je taben tavat bihut, me ta je Faresaio, 63me ha, ka habe, Taböny than lö, ohmun e ûnykûme a gʼ ame ha hnen at iyawö eling, kē tiga möt, ka habe, Hwaban kun ta bong oge me he ka möt hmetu. 64Anyin a wale hûna ju, mʼ adre me he ka ohmâ erkemok ke ne o but hnyi bong a kuniny, wâ e nye o but laten me venâu e, me ha ka tavat, ka habe, A möt hmetu thö e ûheny hnyi hna mok: me ame he ka gan dut monu a biliny hon monu a bân. 65Haba Pilato ame ha ködrin, ka habe, E hu bi gabun tavat tue: he thʼ öbun, hamöbun bi he ka ohmâ hoton hnobun hna khana. 66Me ödrin e he but, me ohmâ wia erkemok, me ödrin e okeceâ hmâ veto ge haten, ke e bi unyidrin tavat tue.

Currently Selected:

Mataio 27: IAAI

Highlight

Copy