Mataio 26

1KE a hia but Iesu umo ta je hofuc hia eling, me e ame ha ka laten, ka habe, 2Öbun e wâ ae lo biju li bong me ame he ka o but paseka, ke adre me he ka alecuâ Nokon at me he ka osatauroâ. 3Ke hnyi ûen e, ame ûkhacaköu thö je taben tavat bihut, me hnyat sihnalimen, me wahingatiny hnyei ka hnyi uma umen taben bihut ae nua, Kaiafa ien; 4ke adre me ûhnenamoköuâ he ka kot Iesu ge iyawö, mʼ adre me he ka hlingâ e. 5Ke bàingö-drin, ka habe, Ca ânyâ bi hnyi ûen bijeû wâ e nyi imonumonuny tavat.

6E but Iesu hnyi Bethania hnyi uma umo Simona a lepera, 7me ame o but kâu ke momo ae hu kaia alabasa tangen muro ae gan hmâ hwaban, me hingâlâ hon ban, hnyi ûen e ame tiga laba ju ka han. 8Ke a wâ but laten me ame hmönyidrin me ha, ka habe, Hnân eû ame oûnyibâûâ helâe? 9Anyin adre ne ûco, me gan hmâ hwaban he ka ham ka ta je theduoc. 10Ke Iesu ame wâhmakhmeto, me e ame ha ködrin, ka habe, Ieû gabun öbun e ovhelâ momo? e ame hia but ânyâ huliwa ae so könya. 11Anyin a e bala bi unyibun ta je theduoc; ke oge me ca he bi nya ka laba bala eang unyibun. 12Anyin a haba hnen momo hna hingâlâ muro eang ka hnyi unyik, e ame ânyâ he ka penapena hna konim nya. 13E hnathu inya oge me ha köbun, ka habe, Haba hnyi je dok hia hnyi hmeledrany adre me he ka khetâ hnyin je ûthumetu ae so eang, adre me he minya ka ha ge hna ânyâ hnen momo eang hnân ûnykûme kâu.

14Haba ke at hnyi je twelv, Juda Isakariota ien, ame he ka je taben tavat bihut, 15me ha, ka habe, Ieû ke ûnyi öbun e he ka ham könya mʼ inye he ka alecuâ e köbun? Me adre me tuluto me ham kâu ta je mone a thote. 16Ke hwân hnyi ûen eling, e ame heleû deny he ka alecuâ e.

17Haba hnyi bong a bâniny bijeûiny areto adre ca levenâ bi, me ame he but kö Iesu laten, me ha, ka habe, Ewa dok u me wem ohmun e he ka penapena hobi köu, me u me he ka han paseka? 18Me e ame ha, ka habe, He thʼ öbun ka hnyi taun ka ke at, me ha kâu, ka habe, Haingen At ûne, E hakekeny jut ûök; ke oge me he ka tha han paseka me latök hnyin umâm uma. 19Haba laten ödrin e mâdrâ helâ me hna hûna hnö Iesu ködrin; me ödrin e penapena paseka. 20Ke a sahac ut, kʼ ame tha laba he ka han me laten a twelv; 21ke ödrin e tiga han me e ame ha, ka habe, E hnathu inya oge me ha köbun a gʼ ame he ke at gabun ka alecuo nya. 22Me ödrin e hmak gan hmâ, me hwân he ka ve ha kâu, ka habe, Than lö, ia, inya? 23Me e ame thu me ha, ka habe, Haba at ame tha hnû jeû mönya hnyin mini, me wale at ame he ka alecuo nya. 24Ame he but ka he Nokon at helâ me hna sihnalimen gan: ke ekölö ge at a alecuâ Nokon at a deny! adre ne ca hnokoâ at eling, ame ne so bi kâu. 25Haba Juda at ame alecuâ e, ame thu me ha, ka habe, Kabi, hawa inya? Haingen kâu, ka habe, U me ha e. 26Ke ödrin e tiga han, me Iesu ame hom areto, me oleâ, me thuthu; ke e ame ham ka laten me ha ködrin, ka habe, Hom dö, an ju; walang unyik. 27Ke e ame hom utkaia, me oleâ, me ham ködrin, me ha, ka habe, Ijem dʼ öbun hia; 28anyin a walang drök ûnyi hnyi ûhihinyköu, adre me hingâlâ e hobi kâu tavat ae se hia, me hnân thang ta je hulö. 29Ke inya oge me ha köbun, ka habe, oge me ca he hmetu ka hnyi ijem wan vine eang, ke ne o but hnyi bong oge me he ka tha ijem mʼ öbun hnyi dökhu dokhon Kamök.

30Ke ödrin e hia but hai khumöng me ödrin e he but ka hnyi bucen Elaio.

31Haba Iesu ame ha ködrin, ka habe, Öbun e he hia ka thö thö can inya hnyi lit ang: anyin adre hia but sihnalimen, ka habe, Oge me he ka kot at ame tuö mamoe, me ame he ka vese but ta je mamoe. 32Ke iny ka möt hmetu thö, me oge me he ka bök Galilaia ai, ke bilibun biju. 33Haba Peteru ame thu kâu me ha, ka habe, Ödrin e ne he ka thö hia thö gam, me oge me ca he bi nya ka munyi thö thö. 34Haba Iesu ame ha kâu, ka habe, E hnathu inya oge me ha köu, ka habe, haba hnyi lit ang, ke tiga ca kokok bi khoto, me u me he ka ibi okun ivinö nya. 35Haba Peteru ame ha kâu, ka habe, Eja ke ne oge ne he ka tha mok möu, oge me ca he bi nya ka ivinö u. Helâe minya hwan laten hia.

36Haba Iesu ame tha o mödrin ka hnyi ke dok Gethesemane ien, me e ame ha ka laten, ka habe, Laba ju öbun ang, mʼ inye me he ju ka hic elâ. 37Me e ame hum Peteru me li laku Zebedaio, me hwân he ka vec gan hmâ me hmak hnyekon. 38Me e ame ha ködrin, ka habe, Ame vec gan hmâ hanuk helâ me ioiny mok: laba ju ang me tha hmâkâ mönya. 39Me e ame he ka hnyi dok ae hakekeny, me ta ju hnyikânâi, me hic, me ha, ka habe, Cica lö, a ne ca pason, ö u ohia but utk… eang gak: ke so bi e ca hamök, ke ka… mâm bi. 40Me e ame o thö ka late… me ö ʼdrin ödrin e mokut, me e ame ha kö Peteru, ka habe, Hawa, e ca khanʼ öbun he ka tha hmâkâ mönya hnyi awa a khaca? 41Hmâkâ ju me hic, mʼ öbun e ca didro ka hnyi ûcûbic: anyin ame weny hnyok, ke sēnyin bi unyin. 42Ke e ame he hmetu ka hic me ha, ka habe, Cica lö, a ne ca khana he ka hia but utköiö eang, iny ka ca ijem, ânyâ thö wem. 43Me e ame o hmetu me ö ʼdrin ödrin e mokut hmetu, anyin ae hmak je emaködrin. 44Ke e ame hnʼ ödrin ju me he hmetu, me okun hic, ame ha thibi hofuc a khaca. 45Me e ame o ka laten me ha ködrin, ka habe, Mokut ju öbun, me menâ: wâ bi, e hakekeny jut awa, ke adre hia but alecuâ Nokon at ka hnyi je hnyamen tavat ae kong. 46Todrö, otin e he thö: wâ bi, wale but ang at ame he ka alecuo nya.

47E ame tiga fuc, me wâ bi, ame o but Juda, ke at hnyi twelv, ke tha e me tavat ae se hia, adre me vhat hele vat me utöhmu, ûnyi ge je taben tavat bihut me wahingatiny hnyei. 48Ke haba at ame alecuâ e ame ha ködrin haten, ka habe, Haba at eâu oge me he ka ûcimhnyimak mē, wale, kât ju öbun. 49Me e ame ie he kö Iesu me ha, ka kabe, E Habi lö; kʼ ame ûcimhnyimak mē. 50Haba Iesu ame ha kâu, ka habe, Hanok, ânyâ thö ûnyi u je o kâu. Me adre me o me hinöbeny hu Iesu, me hom e. 51Ke wâ bi, ke at ge latö Iesu ame inâ but hnyamen, me oc dö anyin hele vat, me kot athnyabainy taben bihut, me subâ but hnyikonyen. 52Haba Iesu ame ka kâu, ka habe, Inâ hmeto but ânyâm hele vat ka hnyi tangen; anyin a haba tavat hia adre me hom hele vat, me adre me he ka mok ge hele vat. 53Anyin a hawa, u je ûnykûme e ca khanö nya he ka khöû walang ang ka Kamök, me e ame he ka ham könya ta je angela ae se hia hon twelv ta je legeona? 54Ke ame he ka kâmâu he ka hwâdâ hna sihnalimen a gʼ ame he ka helâe? 55Hnyi awa eling Iesu ame ha ka tavat ae se hia, ka habe, Hawa, öbun e o but me je hele vat me je utöhmu helâke me ka at venöu he ka hum nya? Oge me laba hnyin uma kap hnyi ta ogo bong he ka ûne, ke öbun e ca kot nya. 56Ke adre me ânyâ hia e me me hwâdâ hna sihnalimen ge ta je perofeta. Ke haba laten, me ödrin e hna but e me kec.

57Ke haba tavat adre me köt Iesu, me adre me lelö thö e kö Kaiafa, at bihut ae nua, waleji dok ame ûkhacaköu hnyin hnyat sihnalimen me wahingat. 58Ke haba Peteru ame omise hoton ka hnyi uma umen at bihut ae nua, kʼ ame didro me tha laba me lathnyaba he ka wâ obiny. 59Ke haba je taben tavat bihut me tavat ûhnenamö hia adre me elâm he ka bi fuco thoiö Iesu, mʼ adre me he ka hlingâ e; 60me adre me ca wâ bi, ke so bi a o thö tavat ae se hia he ka bi fuco thoiâ. Ke hwaban e ame o thö li at a lo, 61me ha, ka habe, Haingen at ang, ka habe, E khanö nya he ka kia uma umen Khong me otilâ hmetu hnyi kun ta bong. 62Me ame todrö at bihut ae nua, me ha kâu, ka habe, E ba hnân thu gam? ieû hnödrin hna ohnathoâ gam. 63Ke baba Iesu ame laba hnyibû, Me haba at bihut ae nua ame ha kâu, ka habe, Inya oge me hûna hwegiâ köu ge Khong ae möt, mʼ u me he ka ha kohmun, ka habe, U thibi Keriso a Nokon Khong, hawa? 64Haingö Iesu ame ha kâu, ka habe, U me ha e: ke inya oge me ka köbun, ka habe, Nyiele öbun e he ka wâ Nokon at ame laba hnyi ke keihen maniny man a metân, kʼ ame he ka o hnyi ûlâiny drany. 65Me haba at bihut ae nua ame kia anyin je ûkhaû, me ha, ka habe, E ame hia but fuc bigan ka Khong: ke hnân eû hmetu a gʼ ame he ke at ka ohnatho? wâ bi, öbun e hia but long walang ang hofuc bigan: 66ke ieû ûnykûmenöbun? Me adre me thu, ka habe, E ûcû e he ka mok. 67Me adre me hangöjâ hnyimakan me khaû e: ke haba keihen adre me kolop e, 68me ha, ka habe, Perofetö u thö kohmun, Keriso: ia ame khöû u?

69Ke haba Peteru ame laba eû, me ame he but kâu ke hlu me ha ka habe, Uji ke at ame tha e me Iesu at Galilaia. 70Ke e ame ivinö hnyi hnyimaködrin hia, ka habe, E ca khanö nya hnâm hna ha. 71Me e ame didrut ka hnyi poretiko, me ame wâ e ke hlu, me e ame ha ka tavat eling, ka habe, Tha at minya ang me Iesu at Nazareta. 72Me e ame ivinö hmetu, me khemanyin ka habe, E ca khanö nya at e. 73E tiga ca kueny me ame o but tavat adre me ûtililen me ha kö Peteru, ka habe, E hnathu u ke hanödrin; anyin ame omanenö u ifucâm. 74Me e ame hwân he ka fuc hwege me khemanyin, ka habe, E ca khanö nya at e. Me ame ie kokok dö khoto. 75Me haba Peteru ame ûnykûme hofuc eji ho Iesu ame ha, ka habe, U me he ka okun ivinö nya ke tiga ca kokok khoto. Me e ame didrut me tenge hlöuhlöu.

Currently Selected:

Mataio 26: IAAI

Highlight

Copy