Mataio 17

1KE hwaban ta bong a siks Iesu ame hum Peteru, me Iakobo, me Ioane a keiny, me su ödrin ka hnyi bucen a hake ödrin ke: 2me e ame ke bongon dut hnyi hnyimaködrin: ke ame hadröngöc hnyimakan helâ me seûno, ke hau anyin je ûkhaû helâ me melâm. 3Me wâ bi, haba Mose me Elia ödru me manen ködrin, mʼ ödru ûhnenamö mē. 4Ke haba Peteru ame ha kö Iesu, ka habe, Than lö, e so kötin he ka laba eang: a ne wem oge me he ka otilâ je uma menâ a kun; hnân hobi köu khaca, ke hobi kö Mose khaca, ke hobi kö Elia khaca. 5Ke e ame tiga ha, me wâ bi ûlâ ae hadröngöc ame tubi ödrin: ke wâ bi, hwan hofuc ûnyi hnyin ûlâ ame ha, ka habe, Walang Nökuk a oûnykûmik oge me senyin kâu; long ju öbun kâu. 6Ke a long ut laten, me ödrin e ta ju hnyikânâi, me ot gan hmâ. 7Ke haba Iesu ame he me kalʼ ödrin, me ame ha, ka habe, Todrö ke ca ot bi. 8Me ödrin e bwele goranyai ke ba at ödrin e wâ, ke hake Iesu thibi.

9Ke ödrin e tiga utut ûhedrin hon bucen, me Iesu ame hûna ködrin, ka habe, Ca ha bi ka ke at ûnyi a manen, ke ne o but a möt hmetu thö Nokon at ûheny hnyi hna mok. 10Me ame hnö e hnen laten, ka habe, Anyin a ieû ame ha tavat sihnalimen, ka habe, Ame he ka bö Elia ka o? 11Ke e ame thu, me ha, ka habe, E hnathu ame bö Elia, kʼ ame he ka ohâtâ ta je ûnyi hia: 12ke inya oge me ha köbun, ka habe, A o but Elia, ke adre me ca wâhmakhmeto, kʼ adre hia but ânyâ kâu wedra. Ame he minya Nokon at ka hu vec helâe ûnyi gadra. 13Haba laten ödrin e wâhmakhmeto a e ame haiö Ioane Bapataiso ködrin.

14Ke ödrin e o but ka tavat ae se hia, ke ame o but kâu ke at ame cibouca kâu, me ha, ka habe, 15Than lö, betenge ju ge nokuk: anyin a e ame ing, me gan hmâ vec: anyin a e ame osehia but ta eû hnyi meic, ke osehia minya ka hnyi köiö. 16Ke oge hia but hom e ka lâtâm, ke ca khanʼ ödrin he ka omelö e. 17Ke haba Iesu ame thu me ba, ka habe, Dö ame ca labageju bi, ke hwali lö, oge me he ka tha e möbun ke ne o but kehö? oge me he ka hokhnyoki öbun ke ne o but kehö? hö jem könya. 18Haba Iesu ame thawâ e, me ame didrut demoni ûnyi hnyin: me ame möt dö da hwân hnyi ûen e. 19Me ame he duöng laten kö Iesu me ha, ka habe, Ieû ae ca khanʼ ohmun gan he ka obâ e? 20Me e ame ha ködrin, ka habe, Anyin ae ûhnyûkong anyibun labageju: anyin e hnathu inya oge me ha köbun, ka habe, a ne hu gabun labageju helâ me wan sinapi, me öbun e he ka ha ka bucen ang, ka habe, Kec dö kâe; me ame he ka kec; ke ba ke ûnyi ame he ka pason köbun.

22Ke ödrin e tiga laba hnyi Galilaia, haba Iesu ame ha ködrin, ka habe, Adre me he ka alecuâ Nokon at ka hnyi ta je hnyamen at; 23ke adre me he ka hlingâ e, ke e ame he ka möt hmetu hnyi bong a kuniny. Me ödrin a vec gan hmâ.

24Ke ödrin e o but hnyi Kaperenauma, me ame o but ko Peteru tavat adre me hok haf-sekel, me ha, ka habe, Hawa ame ca hnyi bi haf-sekel at ame nʼ öbun? 25Haingen, Eke. Ke hnyi ûen e ame didro hnyin uma ai, haba Iesu ame bân he ka fuc kâu, ka habe, Simona, ieû ûnykûmenâm? haba ta je than eang hmeledrany adre me hom ûnyi ga ia fat me hut? hawa, unyi ge lakudra, ame ne ûnyi ge je atkanyua? 26Haingen ame ha, ka habe, Ûnyi ge je atkanyua: me Iesu ame ha kâu, ka habe, Awe adre hna bâûâ lakon. 27Ke so bi wâ otin nye osauʼ ödra, he thö hnyiköiöai, me khûâ but wage, me lelö thö wâ a bân ka wadring ka hnyin; ke u ka hia but khong hnyimen, u me he ka wâ khaca sekel: hom dö e, me ham ködrin hnân hobi köu mʼ önya.

Currently Selected:

Mataio 17: IAAI

Highlight

Copy