Mataio 15

1KE ame o but kö Iesu ke je Faresaio me tavat sihnalimen ûhedra Jerusalema, me ha, ka habe, 2Ieû ge latâm ödrin e hanyâûâ hna ûne hnen wahingat? anyin ödrin e ca mē hinyem ödrin ka he ka han. 3Me e ame thu me ha ködrin ka habe, Ieû gabun öbun e hanyâûâ minya hnanyibu anyin Khong ge hnobun hna ûne? 4Anyin a Khong ame ha, ka habe, Ogânâ kâmâm me hinyâm: ke, Haba at ame haikongoâ kamen me hinyen, e hnathu e ame he ka mok. 5Ke haingöbun, ka habe, Haba at ame he ka ha ka kamen me hinyen, ka habe, E kap bi anyik ta je ûnyi hnân hadruʼ öbu; 6e ame ca he ka ogânâ kamen. Me öbun e ohavâ hofuc hwan Khong ge anyibun je hna ûne. 7Hnyat thoi hnyok lö, e so hna perofeta gabun hnö Isaia, ka habe,

8Haba tavat ang, adre me oganö nya ge je esongodidra;

Ke haba je hnyekudra, me ûsâkâûö mönya.

9E ûnyi baû hnödra hna khudrung könya

Kʼ adre me nâ bi ta je hna ûne a hûna hnen at.

10Me e ame hawa tavat ae se hia, me ha kodra, ka habe, Long ju, me wâ ûnykûme ju: 11Ca ûnyi bi ame dit ka hnyi hnyem ame okongoâ at; ke so bi ûnyi ame didrut ûnyi hnyi hnyem, wale bi e ame okongoâ at. 12Me ame o but laten me ha kâu, ka habe, E khanö u a ta je Faresaio adre me hmönyidra ka long hofuc e? 13Ke e ame thu me ha, ka habe, Haba ta je ûö a ca tā bi hnen Kamök ethö hnyi drany, me adre me he ka oc dö me iwân. 14Hnʼ ödra but: ödra je hnyat kû gethen kʼ ödra wadröu. Ke a ne lelö wadröu ge ke wadröu, ödru me he ka tha ta eû hnyi hmonop. 15Haba Peteru ame thu me ha, ka habe, Ha thö kohmun bongon ûhöûcû. 16Ke e ame ha, ka habe, Hawa, öbun hnyat adre me tiga ca wâ ûnykûme bala? 17Öbun e ca wâhmakhmeto bi a haba ta je ûnyi ame dit ka hnyi hnyem, me ame he ka hnyi hnyin, me adre me degec ut ka hnyi hnyot? 18Ke haba ta je ûnyi ame didrut ûnyi hnyi hnyem, me ame he but ûheny hnyi hnyok; me wale ame oikikiâ at. 19Anyin ame didrut ûnyi hnyi hnyok ta je hna ûnykûme ae kong, me je ûhlingö, me venöu âiân ke at, me bi ûnyi monu, me venöu, me ohnatho thoi, me haikongo: 20wale ta je ûnyi ame oikikiâ at: ke haba he ka han kʼ adre ca hinyem, me ame ca he ka okongoâ at.

21Haba Iesu ame hna but dok e, me he ka hnyi ke keihen Turo me Sidona. 22Me wâ bi, ame o but ke momo Kanana ûnyi hnyi je hnyegöulen hnyei eling, kʼ ame hongot tenge, ka habe, Than a Nöku Davita lö, betenge ju gak; ame vec ut nokuk hlu a delec demoni. 23Ke ba hofuc e ame thu. Me ame o thö laten me sumâtâ e, ka habe, Obâ but momo; anyin a e ame hongot hotutin. 24Ke e ame thu me ha, ka habe, E ba ke ûnyi adre kunö nya kâu, ke so bi ka ta je mamoe adre he monu hnyi lap anyin at Isaraela. 25Me ame o thö momo me khudrung ju kâu me ha ka habe, Than lö, hadruo nya. 26Ke e ame thu, ka habe, E ca so bi he ka hom jeû an je lakon, me khûâ ka ta je kuli. 27Ke haingen momo ame ha, ka habe, Eke Than: anyin a haba je kuli adre me labö an je kolon ame kolu ûnyi hnyi hon laulau anyin tuhödrin. 28Me haba Iesu ame thu me ha ka momo ka habe, Momo lö, e gan hmâ ânyâm labageju: e so he ka e köu helâ me hnâm hna wem. Me ame möt ut nokon hlu cicö ûen eling.

29Ke haba Iesu ame he ûheny e, me o hnyi köiö hnyi Galilaia; ke e ame ölö ka hnyi bucen me laba eling. 30Me ame o but kâu tavat ae se hia, tha ödra me ta je mat, me ta je wadröu, me ta je hum, me ta je bâbu, me keihen tavat ae se hia minya, me adre me khûʼ ödra ka hnyi hmelen li can; me e ame omeli ödra: 31me me lâiâ tavat ae se hia, hnyi ûen adre me wâ ta je hum adre me fuc, me je bâbu adre me so but, me je mat adre me he: me adre me ogânâ Khongon Isaraela.

32Haba Iesu ame hawâ laten me ha ka habe, Inya oge me betenge ge tavat ae se hia, anyin a ödra bong kun dut eang unyik ke ba ö ʼdra: ke ca wek he ka kunʼ ödra kʼ ödra mekihnânem wâ adre nye he ka momonu eû hnyi gethen. 33Ke haba laten ödrin e ha kâu, ka habe, E hu gatin ûnyi ua je areto ae se hia eang hnyi hnyebuba, me hnân he ka osekunâ tavat ae se hia helâng? 34Ke haba Iesu ame ha ködrin ka habe, Ve ta areto unyibun? Haingödrin, Seven, me je ong wâ. 35Me e ame hûna ka tavat ae se hia he ka laba hon kânâ; 36ke e ame hom je areto a seven me je ong wâ, me e ame oleâ me thuthu, me ham ka laten, ke laten ka tavat ae se hia. 37Haba ödra hia adre me han me ame sekudra ju: ke ödrin e hom dö je kolon adre thuthu, me ame unöngöt dö je tang a seven. 38Ke ödra foa thauzan obaga adre me han, adre ca aû bi omomo me ta je wanakat. 39Me e ame hna but tavat ae se hia, me e ame ölö thö hon ong hu me o ka hnyi je hnyigoulen Magadala.

Currently Selected:

Mataio 15: IAAI

Highlight

Copy