Luka 5

1E AME tot hnyi baten köiö Genesareta, kʼ ame ûhneki kâu tavat ae se he ka long hofuc hwan Khong; 2ke e ame wâ li hu hnyi baten wagewe: ke haba tavat thut, me ödrin e he but he ka ânyâwia ûtödrin je ert. 3Me e ame ölö thö ka hnyi ke hu, a hu hu Simona, me sumâtâ e he ka okhaca hukâ hnyiköiö ai. Ke e ame laba ju hon hu, kʼ ame nâ tavat ae se bia. 4Ke a hia but ha hofuc, me e ame ha kö Simona, ka habe, Kec ut ka hnyi dok ae dit, me hna but ûtöbun tang ert hobi kâu öhan. 5Haba Simona ame thu kâu, ka habe, Taböny Than lö, ohmun e huliwa hnyi lit hia, ke ba ûnyi ohmun e hom: ke ûnyi ge hwâm hofuc oge me he ka hna je ert. 6Ke ödrin e ânyâ helâe, me ödrin e ginyâ but wâ ae se hia, me ame he bi ka hmouca but ûtödrin tang ert; 7ke ödrin e aleû je lahanödrin hon ke hu, mʼ ödrin e he ka hadruʼ ödrin. Me ödrin e o but, me öunöngötâ thö li hu, me me hwân ka û but li hu. 8Ke a wâ but ga Simona Peteru, me e ame ta ju hnyi li bouca Iesu me ha, ka habe, Than lö, he thö gak, anyin a iny at ae kong. 9Anyin a e ame lâiâ, me ödrin hia thithö unyin, ge öhan ödrin e sa; 10ke helâe minya Iakobo me Ioane, a li laku Zebedaio, li at ödru me tha thut me Simona. Haba Iesu ame ha kö Simona, ka habe, Ca ot; hwân dö ang u me be ka kât tavat. 11Ke ame khop do li hu me ödrin e hna but ta je ûnyi hia, me he hoton.

12E ame tiga laba hnyi ke taun ke wâ bi, at ae khot ut unyin ge lepera: kʼ ame ō Iesu, me ta ju hnyikânâi, me sumâtâ e, ka habe, Than lö, a ne wem me khanö u he ka osoi nya. 13Me e ame inâ hnyamen me kâlâ e, me ha, ka habe, Iny be wek; u me so but. Me ame ie hia but lepera gan. 14Me e ame hûna kâu, he ka ca ha ka ke at: ke he thö, omanenö u bi thö ka at bihut, me bi hudiny hna osoi u, helâji me hna hûna hnö Mose, hnân ohnathoâ ködrin. 15Ke e ame lung tot igigilo: ke ame ûkhacaköu tavat ae se hia he ka long, me he ka möt ut ge ta je mok gadra. 16Me e ame he but ka hnyi hnyebuba he ka hic.

17Ke haba hnyi ke bong eling e ame tiga ûne; ke ame ûlalabainy ta je Faresaio me tavat ûnö hnanyibu, adre o but ûhedra hnyi ta je taun hia hnyi Galilaia, me Juda, me Jerusalema: ke e bi unyin Than man he ka omelö. 18Me wâ bi, tavat adre me vadren at ae mat hon hna mokut: me adre me heleû deny he ka hom e me ip hnyi hnyimakan. 19Ke ödrin e ca wâ bi deny he ka hom e anyin ae se hia tavat, me ödrin e ölö thö ka hnyi hon uma me hna hna but e me hna mokut minya hnyi wanben hna tubi bouma hnyi hnyimakö Iesu. 20Ke e ame wâ anyidrin labageju, me e ame ha, ka habe, Ketha lö, adre hia but thang ta ja monu gam. 21Haba tavat sihnalimen me ta je Faresaio adre me hwân he ka ûhnenamö ka habe, Ia e ame fuc bigan? Ia ae khana he ka hna degecâ ta je hulö ke hake Khong thibi? 22Ke ame manen dut kö Iesu hnödrin hna ûhnenamö, me e ame thu me ha ködrin, ka habe, Ieû gabun öbun e ûhnenamö eû hnyi je hnyekubun? 23Ieû ae hâhâ he ka ha, ka habe, Adre hia but thang ta je monu gam, ke he ka ha bi ka habe, Todrö me he thö? 24Ke so bi, me me manen köbun ae tren man Nokon at eang hmeledrany he ka hna degecâ ta je hulö (e ame ha ka at ae mat, ka habe). Inya oge me ha köu, Todrö me hom minya thö hnâm me he ka hnyi umâm uma. 25Me e ame ie todrö hnyi hnyimakodra, me hom ûnyi e ame mokut hon, me he ka: hnyi umen uma, kʼ ame ogânâ Khong. 26Haba ödra hia adre me lâiâ me ogânâ Khong; kʼ adre unöngöt dö ge ot, me haingödra, ka habe, Ate hia but wâ hnyi bong ang ta je ûnyi ae ke bongon bi.

27Ke hwaban ta je ûnyi eling, e ame he me wâ ke telona, Levi ien, ame laba hnyi taben khop fat, me e ame ha kâu, ka habe, He hotuk. 28Me e ame hna but ta je ûnyi hia, kʼ ame tot me he hoton. 29Haba Levi ame mâdrâ bijeû ae gan hnyi umen uma hobi kâu e: ke se hia ta je telona me ke je hnyat adre me tha laba mödrin he ka han. 30Ke haba ta je Faresaio me tavat sihnalimen unyidrin, adre me ulidro laten, ka habe, Ieû gabun öbun e tha han me ic me ta je telona, me tavat ae kong. 31Ke haba Iesu ame thu me ha ködrin, ka habe, E ca ûnyi hnathu bi at ae tren bubuny ka tavat ae hwege; ke so bi ka tavat ae mok. 32Oge me ca o he ka hawâ tavat ae wisa, ke tavat bi ae kong, mʼ adre me ietra thö. 33Me adre me ha kâu, ka habe, Haba je latö Ioane, me ödrin e osehia ânyâ ca han, me khöû; ke helâe minya laten ta je Faresaio; ke haba lâtâm, me ödrin e han me ic. 34Ke haba Iesu ame ha ködra, ka habe, Hawa, e khanʼ öbun he ka ocahanâ je lahanen at a tep faipoipo, ke tiga e bi unyidrin at a tep faipoipo? 35Ke ame he ka o je bong, me adre me he ka hom dö at a tep faipoipo, wale but e ûen ödrin e he ka ânyâ hnyin ca han. 36Ke e ame ha kodra ûhöûcû, ka habe, E ba at ame he ka kia ecmano ûnyi hnyi ûkhaû ae teb ûnyi, me utibetköuâ ûkhaû ae bobot ut; wâ e nye kheke but ûkhaû ae teb ûnyi, kʼ ame ca he bi ka tha ûcû ecmano ae teb ûnyi me at ae bobot. 37Ke ba at ame hingâlâ waina a teb ûnyi ka hnyi je tangen ae bobot ut, wâ e nye hmouca but ta je tangen ge waina ae teb ûnyi, me ame hingölö but, me kong ut ta je tangen. 38Ke so he ka hingâlâ waina a teb ûnyi ka hnyi ta je tangen a teb ûnyi. 39Ke ba at ame ijem waina ae kueny jut me ame he bi ka weny tebûnyi, ke haingen dö, ka habe, E so ûnyi ae kueny.

Currently Selected:

Luka 5: IAAI

Highlight

Copy