Luka 4
4
1KE unöngöt dö Iesu ge Hanu Kap, ke e ame hmetu ûheny hnyi Joridano, kʼ ame lelö thö e hnen Hanu ka hnyi hnyebuba 2hnyi fâte ta je bong, kʼ ame cubec e hnen diabolo. Ke e ame ca han hnyi je bong eling: ke ame um dö je bong eling, me e ame mekihnânem but. 3Haba diabolo ame ha kâu, ka habe, U je ne Nokon Khong, ha thö ka je veto ang e me areto but. 4Haba Iesu ame thu kâu, ka habe, Adre hia but sihnalimen, ka habe, Ame ca he ka möt at ge areto thibi. 5Ke e ame lelö thö e, me omanenâ kâu ta je dokhu hia thithö eang hmeledrany helâ me thuthubademak. 6Ke haba diabolo ame ha kâu, ka habe, Oge me he ka ham köu ta je musi hia e, me ta je hmanenanginy: anyin adre hia but hna but e könya; mʼ inye he ka ham ka at oge me wek kâu. 7Anyin a wale u je ne he ka khudrung ju könya, me ânyâm but ta je ûnyi hia eling. 8Haba Iesu ame thu kâu, ka habe, Adre hia but sihnalimen, ka habe, U me he ka khudrung ka Than a Khongom, me bi athnyabainy thibi. 9Ke e ame hom e Jerusalema ai, me ip e hon baitoiny uma kap, me ha kâu, ka habe, U je ne Nokon Khong, utut jime thö: 10anyin adre hia but sihnalimen, ka habe,
E ame he ka hûna ka anyin ta je angela hobi köu, he ka tuö u:
11ke walang khaca, ka habe,
Adre me he ka kap tilö u ge je hnyamödra,
Wâ e nye thö thö cam hnyi veto.
12Haba Iesu ame thu kâu, ka habe, Adre hia but ha, ka habe, U me ca he ka cubec Than a Khongom.
13Ke ame um dö je ûcûbic hia anyin diabolo, me e ame hna but e ke ne o but hnyi ke ûen.
14Ke Iesu ame hmetu Galilaia ai hnyi maniny Hanu: me ame lung igigilo e hnyi je ke keihen hia. 15Ke e ame ûne hnyi umödra je sunago, ke tavat hia adre me ogânâ e.
16Ke e ame o but hnyi Nazareta, waleji adre hat e hnyin: ke e ame didro ka hnyi sunago hnyi bong sabath, helâ me hwakecin, kʼ ame tot he ka au tusi. 17Ke adre me ham kâu tusi anyi Isaia perofeta. Me e ame khong tusi, me elâm dok adre me sihnalimen hnyin, ka habe,
18E but huk Hanon Than,
Anyin a e ame hia but hû nya he ka khetâ ûthumetu ae so ka ta je theduoc:
E ame hia but kunö nya he ka haimemenâ hna hna ka ta je hwenbâ,
Ke hna bwele ka je wadröu,
Ke he ka thang hnyat adre aat dö
19Ke he ka khetâ hunainy ae ûcû ka Than.
20Ke e ame vhec tusi, me ham ka athnyaba, me e ame laba ju: me ame wâ e hnen tavat hia thithö hnyi sunago. 21Me e ame hwân he ka ha kodra, ka habe, E hwâdâ but hna sihnalimen ang hnyi bong ang hnyi je hnyikönyöbun. 22Me: haba ödra hia adre me haisoâ e, kʼ adre me lâiâ ta je ifucin ae so ame khulu but ûnyi hnyi hnyimen: haingödra, ka habe, Hawa, ca nöku Josefa at ang? 23Haingö Iesu ame ba kodra, ka habe, Öbun e he la ka ha könya ûhöûcû eang, ka habe, At ae tren bubuny lö, osoi u thö: haba ta je ûnyi ohmun e long a gʼ adre ânyâ hnyi Kaperenauma, ânyâ minya thö eang hnyi em hnyei. 24Haingen minya, ka habe, E hnathu inya oge me ha köbun, ka haba, E ba perofeta adre me kap hnyi iny hnyei. 25Ke e hnathu inya oge me ha köbun, ka habe, E se hia ta je safac hnyi hnyei Isaraela hnyi je bong bongu Elia, waleji hnyi ûen adre me hlöng drany hnyi kun ta huna ke siks ta tehi, ke ame o hmiâ hnyi hnyei hia; 26ke adre ca kunö Elia bi ka ke at gadra, ke so bi ka ke momo a safac hnyi Sarepeta hnyi Sidona. 27Ke se hia ta je lepera hnyi Isaraela hnyi je bong bongu Elisaia perofeta; ke ba ke at gadra adre osoâ ke jia thibi a Naamana at Suria. 28Me ame hmönyidra hia hnyi sunago tavat adre me long ta je ûnyi e; 29me adre me todrö me obâ e ka hnyi hoton taun, me lelö e ka hnyi baten hut adre hötilö taun hnyin, mʼ adre me he ka khûâ e kâû. 30Ke e ame he hnyi wanbödrâ me be but.
31Ke e ame o but hnyi Kaperenauma, ke taun hnyi Galilaia. Ke e ame nʼ ödra hnyi bong sabath; 32me adre me lâiâ hnen hna ûne; anyin ae man hwan hofuc. 33Ke eiö hnyi sunago ke at ae hu hanuiny demoni ae kong; ke e ame hongot hwege thö, ka habe, 34E, Iesu at Nazareta lö, u me hö e kohmun? u je o but he ka ohiʼ ohmun? inya oge me wâhmakhmetu u a u At ae Kap anyin Khong. 35Haba Iesu ame thawâ e, ka habe, Ca mede, ke didrut ûhem hnyi hnyekon. Ke a hia but demoni hagutâ e hnyikânâi hnyi wanben, me e ame didrut ûheny hnyi hnyekon, ke a ca okongoâ bi e. 36Haba ödra hia adre me lâiâ ke adre me ûhaköuâ, ka habe, Ie hofuc ang, anyin a e ame muso hwegiâ ta je demoni ae kong ge man, me adre me kec me didrut. 37Me ame lung igigilo e ka hnyi ta je ke keihen hia.
38Me e ame todrö ûheny hnyi sunago me didro ka hnyi uma umo Simona. Ke haba hinyen öiö Simona ame moko kahwa ae gan hmâ; ke adre me khöû kâu hobi kâu momo. 39Me e ame tot unyin momo, me thawâ kahwa; me ame hia but: me momo ame ie todrö me bi athnyabaidrin.
40Ke ame he but ka dit seûno, haba ödra hia ae hu je komok ae ve bongon, adre me hum ödra kâu; ke e ame ip li hnyamen hudrin hia, me osoi ödra. 41Ke ame dit minya je demoni ûhedra hnyin tavat ae se hia, adre me hongot me ha, ka habe, U thibi Nokon Khong. Ke e ame thawʼ ödra, mʼ adre me ca he ka fuc, anyin adre me wâhmakhmeto but a e thibi Keriso.
42Ka selany jut, me e ame didrut me he ka hnyi hnyebuba: ke haba tavat ae se hia adre me elâm e, me o but kâu, me bethawâ, me me ca he ka hnʼ ödra. 43Me e ame ha kodra, ka habe, Hamök he ka khetâ ûthumetu ae so hnyi dökhu dokhon Khong hnyi ke je taun bi: anyin adre me kunö nya hobi kâu e.
44Ke e ame khetâ hnyi je sunago hnyi Galilaia.
Currently Selected:
Luka 4: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
