Luka 3

1HABA hnyi huna a fiftininy musi a Tiberio Kaisara, ke ame gavena Ponetio Pilato hnyi Juda, ke ame musi Heroda hnyi Galilaia, ke ame musi hnyi hnyei Ituraia me Terekoniti Filipo a liamekeiny mē, ke ame musi Lusanio hnyi Abilene, 2ke haba li at bihut ae nua me Ana me Kaiafa, haba hnyi ûen e, me ame o but hofuc hwan Khong kö Ioane nöku Zakaria hnyi hnyebuba. 3Ke e ame vheno ta je ke keihen hnyei hia thithö hnyi Joridano, ame khetâ bapataisoiny ietra mʼ adre me he ka thang degecâ but ta je bulö; 4helâji me hna sihnalimen hnyi tusiny hofuc ho Isaia perofeta, ka habe,

Ifucin at ame hongot hnyi hnyebuba, ka habe,

Ânyâwia thʼ öbun gethen deny Than, Owisa thö deny ta je gethen.

5Ame he ka öunöngötâ ta je hnyigoulen bucen hia,

Kʼ ame he ka ohnyikânâ ta je bucen me ta je hut;

Kʼ ame he ka wisa bi dok ae hwali,

Ke okhabalaûâ but ta je gethen ae hokong;

6Ke ame he tavat hia thithö ka wâ, ûhomeli anyin Khong.

7Me e ame ha ka tavat ae se hia adre me o but e me he ka bapataisoi ödra, ka habe, Je lakon on lö, ia koû köbun he ka kec ge hmönyin ame be ka o? 8Anyin a wale wa but öbun wan ae ûcû me ietra, ke ca hwân öbun he ka ha eû hnyi je hnyekubun, ka habe, Aberahama kamöta: anyin a inya oge me ha köbun, ka habe, e khana Khong he ka bi mâtrâni Aberahama, ûnyi hnyi ta je veto ang. 9Ke walang ang adre hia but ip giwa hnyi hwecin ta je ûö; ke haba ta je ûö ame ca wa so bi, me adre me he ka sö degecâ me khûâ ka hnyi meic. 10Haba tavat adre me hnö e, ka habe, Ieû hanymöhmun ohmun e he ka ânyâ? 11E ame thu me ha kodra, ka habe, Haba at a lo anyin li ûkot e so e ame he ka ham ka at ae ba gan; ke haba at ae hu jeû hamen he ka ânyâ helâe minya. 12Ke ame o but minya ta je telona, me me he ka bapataisoi ödra me ha kâu, ka habe, At ûne lö, ieû hanymöhmun? 13Me e ame ha kodra, ka habe, Ca hom ûjengoâ hon ûnyi adre hûna köbun. 14Haba tavat vat adre me hnö e minya, ka habe, Haba ohmun, ieû hanymöhmun? E ame ha kodra, ka habe, Ca okongoâ bi ke at, ke ca bifuco thoiâ; ke sekubun ju ge hna bi hwaböbun.

15Ke tavat adre halubahingen, ke ödra hia adre me ûnykûme eû hnyi je hnyekudra, ka habe, ame ne Ioane la Keriso, ame ne ca e bi; 16me haba Ioane ame thu kodra hia thithö ka habe, Inya oge me bapataisoi öbun ge köiö; ke ame he ka o at ae nua maniny huk, iny ca ûcû bi he ka thang wen li tangen hnyeûcan: e ame he ka bapataisoi öbun ge Hanu Kap me meic: 17e hnyi hnyamen ut, ke e ame he ka tha ulec wia anyin hna huje hwit hnyin, me me ip bi hwit hnyi omhani; ke e ame he ka thong degecâ hlanyin hnyi meic ame ca mok bi.

18Ke se hia ta je hofuc e ame khetâ hnyin evangelia ka tavat; 19ke e ame hia but thawo Heroda ca Herodia âiân liamekeiny mē, me can ta je monu hia ame mâdrâ Heroda, 20ke e ame bi hanen ûnyi ang hon ta je ûnyi hia, a gʼ ame cö Ioane thö.

21Ke a hia but bapataisoâ tavat hia thithö me e ame bapataisoi Iesu minya, ke e ame hic, me ame khong ut drany, 22me ame olo but kâu Hanu kap hnyi unyin, helâ me biny, ke ame o but hofuc ûnyi hnyi drany, ka habe, U thibi Nokuk a oûnykûmik; oge me senyin köu.

23Ke haba Iesu hnyi ûen e ame hwân he ka huliwa, me helâke me thote but hunainy, e nöku Josefa (hnödra hna ha helâe), mâtrâni Heli, 24mâtrâni Mathat, mâtrâni Levi, mâtrâni Meleki, mâtrâni Jana, mâtrâni Josefa, 25mâtrâni Matathia, mâtrâni Amosa, mâtrâni Naumo, mâtrâni Eseli, mâtrâni Nangai, 26mâtrâni Maatha, mâtrâni Matathia, mâtrâni Semei, mâtrâni Josefa, mâtrâni Juda, 27mâtrâni Joana, mâtrâni Resia, mâtrâni Zerubabela, mâtrâni Salathiela, mâtrâni Neri, 28mâtrâni Meleki, mâtrâni Adi, mâtrâni Kosamo, mâtrâni Elemodamo, mâtrâni Era, 29mâtrâni Jose, mâtrâni Eliezera, mâtrâni Joreimo, mâtrâni Mathat, mâtrâni Levi, 30mâtrâni Simeona, mâtrâni Juda, mâtrâni Josefa, mâtrâni Jonam, mâtrâni Eliakima, 31mâtrâni Melea, mâtrâni Mena, mâtrâni Matatha, mâtrâni Nathana, mâtrâni Davita, 32mâtrâni Jese, mâtrâni Obed, mâtrâni Boaza, mâtrâni Salamona, mâtrâni Naasona, 33mâtrâni Aminadaba, mâtrâni Aram, mâtrâni Eseroma, mâtrâni Farez, mâtrâni Juda, 34mâtrâni Jekob, mâtrâni Isaaka, mâtrâni Aberahama, mâtrâni Tera, mâtrâni Nahora, 35mâtrâni Serugo, mâtrâni Reu, mâtrâni Pelege, mâtrâni Heberu, mâtrâni Sala, 36mâtrâni Kanana, mâtrâni Afasada, mâtrâni Sema, mâtrâni Noa, mâtrâni Lameka, 37mâtrâni Methusela, mâtrâni Enoka, mâtrâni Jareda, mâtrâni Mahaleleel, mâtrâni Kanana, 38mâtrâni Enosa, mâtrâni Setha, mâtrâni Adamu, mâtrâniny Khong.

Currently Selected:

Luka 3: IAAI

Highlight

Copy