Jona 3
3
1KE ame o hmetu hofuc ho Iehova kö Jona hnyi ûen a loiny, ame ha, ka habe, 2Todrö me he Neneve ai, a taun ae gan, me khetâ ka hnyin, hnok hna hûna köu he ka khetâ. 3Me haba Jona ame todrö me he Nineve ai helâ me hofuc ho Iehova. Ke haba Nineve me taun ae gan hmâ hmonyin, ke kun ta bong he ka he igigilo e 4Ke haba Jona ame hwân ka dit hnyi taun, ke khaca bong ka he, me e ame hongot, me ha, ka habe, Fâte biju ta bong me adre me he ka ohia but Nineve. 5Ke haba at Nineve adre me kap Khong; me adre me haimemenâ he ka ânyâ ca han, ke adre me khavâ ec mano ae gan nân, hwân ge tavat ae gan ke ne o but houmonu. 6Ke ame o but ûthumetu ka than Nineve, me e ame todrö ûheny hnyi anyin theron, me uny jut anyin ûkhaû me khavâ ec mano ae gan nân, me laba ju hnyi hnabadröu. 7Ke e ame ûkhûnöng me haimemenâ hna hûna hnen than me anyin je taben, ka habe, Ca he ka an ke ujeû hnen at me meno, je hnahat kau me mamoe; adre me ca he ka han, ke adre me ca he ka ic köiö: 8ke adre me he ka khavâ tavat me meno ge mano ae gan nân, ke tenge hwege thʼ öbun ka Khong: eke, hamödra he ka ve hwio ûnyi hnyi dedra ta ge gethen ae kong, me ûnyi hnyi ûkonguny anyin je hnyamödra. 9E khanö ia, ame ne he Khong ka hwio me ietra, me degec anyin hmonyin ae gan, mʼ ate me ca he ka mok? 10Ke a wâ but Khong anyidra je huliwa, a adre me hwio ûnyi hnyi dedra ta je gethen ae kong; me haba Khong ame ietra ûnyi ae kong wale a ha he ka ânyâ kodra; ke e ame ca ânyâ bi.
Currently Selected:
Jona 3: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
