Jona 1
1
1AME o but hofuc ho Iehova kö Jona nöku Amitai ame ha, ka habe, 2Todrö he thö Nineve ai, wale taun ae gan, me fuc hwege ûcon; anyin a o but hnyi hnyimakök anyidra monu. 3Me haba Jona ame tpdrö me kec Tasesa ai ge hnyimakö Iehova; ke e ame he Jopa ai, me wâ ke hu ame he Tasesa ai: ke e ame bi hwaban hna houden e, me dit hnyi hnyin hu, he ka tha kec mʼ ödrin Tasesa ai, ame kec ge hnyimakö Iehova. 4Ke haba Iehova ame kunâ ang ae gan ka hnyi köiö, me ame o but weneû ae gan hmâ hnyi köiö, ke a ne hmouca thö hu. 5Me ame ot aten hu, me ve tenge ka anyidrin je khong; ke ödrin e khûâ hnyiköiöai je omjeû ûnyi hnyi hu me me hâhâ thö. Ke haba Jona, me ame hia but utut ka hnyi hnyin hu; ke e ame mokut, me mokut hnying. 6Me haba tuhan hu ame ölö but kâu me ha, ka habe, Ieû gam u at mokut hnying? todrö me tenge ka Khongom, ame ne he Khong ka ûnykûmi otin, me otin e ca mok. 7Ke ödrin e ûhaköuâ, ka habe, Otin a ugleköp, me me manen kötin can ia ame o ûnyi eang ae kong kötin. Me ödrin e ugleköp me ame hwâdâ kö Jona leköp. 8Me ödrin e ha kâu, ka habe, Ö u ha thö kohmun ûnyi ga ia ûnyi ang ae kong kötin; ieû hanymâm? ke ûhem ua? ewa em hnyei? ke u at ua? 9Haingen ködrin, ka habe, Iny at Heberu; ke inya oge me outö Iehova, Khongon drany, at ame op köiö me hot. 10Me ame ot gan hmâ tavat me ha kâu, ka habe, Ieû ke ûnyi ang u je hia but ânyâ? anyin ae khana but tavat a e ame kec ge hnyimakö Iehova, anyin a e ame hia but thumetu ödrin. 11Me haingödrin kâu, ka habe, Ieû ohmun e he ka ânyâ köu me me ta but hau hon köiö kohmun? anyin ame hwege tot je waköiöiny köiö. 12Ke haingen kodra, ka habe, Hum nya thö, me khûö nya but hnyiköiöai; me me he ka ta but hau hnyi köiö köbun: anyin ae khanö nya ame o but weneû ang ae gan hnyi köiö köbuo, cak thibi. 13Ke so bi tavat ödrin e hwege galu, he ka he hmetu hot ai; ke ca khanʼ ödrin bi; anyin ame hwege tot köiö ködrin. 14Anyin a wale ödrin e tenge kö Iehova, me ha, ka habe, Iehova lö, ohmun e khöû köu, öhmun e khöû köu, ohmun na ca he ju ka mok can at ang, ke ca he bi ka ip huhmun dra ae ba hnyikongon: anyin a u Iehova u je hia but ânyâ helâ me wem. 15Me ödrin e hum Jona me khûâ hnyiköiöai: me ame ta but hau hnyi köiö hwaban hna ûkhutukhaû. 16Haba tavat ödrin e ot gan hmâ ga Iehova, me bi hut kö Iehova, me bi khöbi. 17Ke Iehova ame penapena wâ ae gan hmâ he ka uto Jona: ke Jona ame laba hnyi hnyekon wâ hnyi kun ta lany ke kun ta lit.
Currently Selected:
Jona 1: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
