Ioane 9

1E AME he, kʼ ame wâ ke at a wadröu hwân hnyi hna knokoâ e. 2Ke haba laten ödrin e hnö e, ka habe, Rabi, ie at a anyin hulö mʼ adre me hnokoâ wadröu eang, hawa, a ka ûnyi gan, ame ne kamen me hinyen? 3Iesu ame thu, ka habe, E ca monu at ang, ke ca monu minya kamen me hinyen: ke so bi me me manen dut la je huliwa anyin Khong ge at ang. 4E ûcû köta he ka mâdrâ ta je huliwa anyin at a kunö nya e me tiga lany: ame he jem lit ke ca khana hmetu ke at he ka ânyâ ke huliwa. 5Hnyi ûen a inya ang hmeledrany, inya ang melaminy hmeledrany. 6Ke e a hia but ha e, e ame hangöc ka hnyi kânâ, me ûnyûnya me botro li emakan at ae wadröu ge kânâ, 7me ha kâu, ka habe, He thö ka hneû hnyi an Siloama (walang bongon, Hna ûkhûnöng). Me e ame he but me hneû, me e ame o hmetu but a ga bwela but. 8Haba tavat adre me laba hakekenyâ, me tavat adre me wâ ehac ame labö sumat, adre me ha, ka habe, Ca at ke la ang ame labö sumat? 9Ke haingen keihen, ka habe, Ka e at e: ke haingen keihen, ka habe, E tha ûcû mē. Ke e ame ha, ka habe, Inya ang. 10Me adre me ha kâu, ka habe, Adre kâmâu hna obwela li emâkâm? 11E ame thu, ka habe, Hnen at adre hwenyi ien Iesu hna mâdrâ kânâ, me kina hnyi li emakök, me ha könya, ka habe, He thö Siloama ai ha hneû: me oge me he but me hneû, me oge me bwela but. 12Ke haingödra adre me ha kâu, ka habe, Ke ne e but ua? Haingen, ka habe Khete.

13Ödra adre me hom but at ae wadröu ehac ka ta je Faresaio. 14Haba bong Iesu ame mâdrâ kânâ, me obwela li emakan, me, bong sabath. 15Haba ta je Faresaio adre me hnö hmetu e, ka habe, A hawa me u me bwela but? Haingen ame ha kodra, ka habe, E ame kina kânâ hnyi li emakök, me oge me he but ka hneû, me oge me bwela but. 16Me ame ha keihen ta je Faresaio, ka habe, Ca ûnyi ge Khong at ang, anyin a e ame ca okabâ sabath. Ke haingen keihen, ka habe, A hawa at ae monu ka khana ka ânyâ ta je ûöman helâe? Me adre me khekhe lo but. 17Me adre me ha hmetu ka at ae wadröu, ka habe, Ieû hwâm gan, anyin a e ame obwela li emâkâm? Haingen, ka habe, E perofeta. 18Ke haba at Juda, me adre me ca kap a e at eji ae wadröu, ka bwela hmetu but, ke ne o but adre me hawâ kamen me hinyen at adre obwela, 19me hnei ödru, ka habe, Hawa nökubu at ang waleji Öbu me ha a gʼ adre hnokoâ ke wadröu? a hawa a ga bwela but walang ang? 20Me ame thu kamen me hinyen, ka habe, E khanʼ ohmu a nökuhmu at ang, ke öhme hnokoâ ke wadröu: 21e bwela but walang, ke ca khanʼ ohmu a hawa; ke ca khanʼ ohmu minya at a obwela li emakan: bethe hnö öbun gan; e at hnathu but; hamen he ka hâiâ e. 22Ame ha kamen me hinyen helâe anyin a ödru outen at Juda; anyin ame ûhaköuâ at Juda he ka obâ ûnyi hnyi sunago at ame he ka ha, ka habe, E Keriso. 23Waleling me me ha kamen me hinyen, ka habe, E at hnathu but; bethe hnö öbun gan. 24Me adre me olo hawâ at ae wadröu, me ha kâu, ka habe, Ogânâ Khong, anyin a ohmun e wâ but ae monu at ang. 25Haba at ae wadröu ame thu, ka habe, A ne at ae kong, me ca khanö nya: khaca thibi ûnyi ae khanö nya, wale a iny wadröu ehac, ke walang ang oge me bwela but. 26Me adre me ha kâu, ka habe, Ieû hnen hna ânyâ köu? a kâmâu hna obwela li emâkâm? 27E ame thu kodra, ka habe, Oge hia but ha köbun eja, ke öbun e ca long: anyin a ieû ame bewebun hmetu ka long? e bewebun minya he ka bi laten? 28Me ödrin e oû e, me ha, ka habe, U at bi u a aten; kʼ ohmun je latö Mose bi öhmun. 29E khanʼ ohmun a Khong ame fuc kö Mose, ke haba at e, me ca khanʼ ohmun e at ua. 30Haba wadröu ame thu kodra, ka habe, Hap wale ju ang ûnyi hnân lâiâ, a öbun e ca wâ dok a mwi hnyin, ke a hia but obwela li emakök. 31E khanʼ ota but, a gʼ ame ca he Khong ka long tavat ae monu: ke a ne ke at ame outen Khong me mâdrâ weny, me e ame he bi ka long kâu. 32Adre me ca munyi long adrem a gʼ ame obwela ke at li emakan at adre me hnokoâ ke wadröu. 33A ne ca ûnyi ge Khong at e, e ca khana he ka ânyâ ke ûnyi. 34Ödra adre me thu kâu, ka habe, Adre me hnöku u hnyi hulö ae gan, ke u me he bi ka nʼ ohmun? me adre me obâ but e.

35A long ut Iesu a gʼ adre hia but obâ e; me e ame wâ e me ha kâu, ka habe, Hawa, u me labageju ka Nokon Khong? 36E ame thu, ka habe, Taböny Than, e ia, mʼ inye he ka labageju kâu? 37Iesu ame thu kâu, ka habe, U je wâ but, ke e thibi e at ame ûhnenamö möu. 38Haingen ame ha, ka habe, Taböny Than, inya oge me labageju. Me e ame khudrung ju kâu. 39Haingö Iesu, ka habe, Oge o but eang hmeledrany he ka owisa, me me bwela but tavat adre me ca hnyi bwela; me me ca bwela bi tavat adre me bwela. 40Ame long ut keihen ta je Faresaio a tha ödra mē ta je hofuc eling, me adre me ha kâu, ka habe, Hawa, ohmun je wadröu minya? 41Iesu ame thu kodra, ka habe, Öbun e ne je wadröu me ba bi anyibun monu, ke walang ang öbun e ha, ka habe, Ohmun bwelâ: waleling me me e bala bi anyibun monu.

Currently Selected:

Ioane 9: IAAI

Highlight

Copy