Ioane 10

1E HNATHU, e hnathu, inya oge me ha köbun, haba at ame ca hnyi dit hnyi homagouleny haginy mamoe, ke ame ölö bi ka hnyi ke gethen, e thibi at ae hok ta ûnyi me venöu. 2Ke haba at ame dit hnyi homagöule e thibi at ame tuö mamoe. 3Ame khong ut kâu hnen at ame tuö homagöule; ke haba ta je mamoe, me adre me long ifucin: ke e ame hawâ ien haleny ta je mamoe, me hum ödra but hnyou ai. 4E ka hia but hna haleny je mamoe hnyou ai, e ame bân, ke haba ta je mamoe adre me he hoton: anyin adre me long hmakhmetoâ ifucin. 5Adre me ca he ka he hoton atkanyua ke adre me he ka kec gan: anyin adre me ca long hmakhmetoâ ifucin ta je atkanyua. 6Iesu ame ha ködra ûhoûcû eling: ke adre me ca wâhmakhmetoâ ta je ûnyi e ame ha ködra.

7Haba Iesu ame ha hmetu ködra, ka habe, E hnathu, e hnathu, inya oge me ha köbun, ka habe, Inya ang homagöule hobi kâu ta je mamoe. 8Haba tavat hia thithö a bodrin, ka bilik bi, ödrin hnyat hok ta ûnyi me venöu: kʼ ame ca ling ödrin but ta je mamoe. 9Inya ang homagöule, a ne ke at ame didro unyik, e ame he ka möt, me didro me didrut, kʼ ame he ka wâ jeû. 10Ame ca o baû at venöu, ke so bi he ka venöu, me ûhlingö me ohia: oge me o but mʼ adre me he ka hu möt, kʼ adre me he ka hu gânâ. 11Inya ang at ame tuö wia ta je mamoe: haba at ame tuö wia je mamoe, me e ame ham anyin möt hnân singiny ta je mamoe. 12Ke haba at ame hok hwaban, wale ca at tuö mamoe bi, ke ca haleny minya bi ta je mamoe, haba at eling ame wâ luko ame he jem, me ame hna degecâ but ta je mamoe me kec, me ame ûlû ödra luko, me ovesei ödra: 13e ame kec dö anyin a e at ame hok hwaban, kʼ ame ca ûnykûme ka ta je mamoe. 14Inya ang at ame tuö wia ta je mamoe; ke oge me wâhmakhmetoâ halek ta je mamoe, kʼ ame wâhmakhmetu nya minya hnen halek, 15helâ me Kamök ame wâhmakhmetu nya, helâ minya me inya oge me wâhmakhmeto Kamök; ke inya oge me ham anyik möt hnân singiny ta je mamoe. 16E hu minya ke ta je mamoe a halek, a ca hanen kak ang: ke ûcû könya he ka hum ödra minya, ke adre me he ka long ifucik; me me khaca thibi hnahat mamoe, ke khaca thibi at ame tuö. 17Waleling ame hnyok könya Cica, anyin a inya oge me ham anyik möt mʼ oge me he ka hom hmetu. 18E ba at ame hûgûnâ e gak, ke inya oge me ham ka ûnyi gak. E hu man gak he ka ham e, ke hu man minya gak he ka hom hmetu. Wale hnanyibu oge me kap ûnyi ga Cica.

19Ke ame khekhe lo hmetu but at Juda can ta je hofuc eling. 20Ke se hia gadra adre me ha, ka habe, E but unyin at ang demoni, kʼ ame monu but; ieû gabun öbun e long kâu? 21Haingen keihen, ka habe, Haba ang, me ca ifucin at ae hu demoni unyin. Hawa, e khana demoni he ka obwela li emakan at ae wadröu?

22Adre me bijeûâ bong adre me dilic uma kap hnyin hnyi Jerusalema; hnyi ke keihen huna ae megic; 23ke haba Iesu ame vheno poretiko anyi Solomona hnyi uma kap. 24Me ame ûkhacaköu igigilo e at Juda me ha kâu, ka habe, U me he bi ka ololoi öhmun ke ne o but kehö? A ne u Keriso, ha manenâ köhmun. 25Iesu ame thu kodra, ka habe, Oge hia but ha köbun, ke öbun e ca kap: haba ta je huliwa oge me ânyâ hnyi iö Cica, wale thibi e hnân ohnathu nya. 26Ke öbun e ca kap anyin a ca halek ta je mamoe bi öbun. 27A long ut halek ta je mamoe ifucik, ke oge me wâhmakhmetu ödra, ke adre me he hotuk: 28ke oge me ham ködra möt ame ca ba balua; ke adre me ca he ka mok nyiele balua, ke ba ke at ame he ka hûgûnʼ ödra ûnyi hnyi hnyamok. 29Haba Cica, wale at ame ham ödra könya, me gan hmâ hon ta je ûnyi hia; ke ba at ae khana he ka hûgûnʼ ödra but ûnyi hnyi hnyamen Kamen. 30Haba inya me Kamen, me ohmu khaca thibi. 31Haba at Juda adre me hok veto hmetu he ka lûâ e. 32Ke Iesu ame thu ködra, ka habe, E se hia ta je huliwa ae so oge hia but omanenâ köbun ûnyi ge Kamök; can ie huliwa öbun e lûö nya gan? 33Haba at Juda adre me thu kâu, ka habe, Ohmun e ca lûö u can huliwa ae so, ke can bi bi gan; ke can minya anyin a u at, ke u me wiö u bi thö me Khong. 34Iesu ame thu kodra, ka habe, Hawa, adre ca sihnalimen hnyi anyibun hnanyibu, ka habe, Oge ha, ka habe, Öbun ke je khong? 35A ne hia but ha, ka habe, Ödrin je khong, wale tavat a o ködrin hofuc hwan Khong, (ke ca khana bi he ka ohavâ hna sihnalimen), 36öbun e ha gan, wale hnen Kamen hna okabâ, me kunâ ka hnyi hmeledrany, ka habe, U me bi gan; anyin oge me ha, ka habe, Inya ang Nokon Khong? 37Oge ne ca mâdrâ ta je huliwa anyi Cica, ca köp nya öbun. 38Ke o ge ne mâdrâ, eja ke ne öbun e ca köp nya, kap bi thʼ öbun ta je huliwa: mʼ öbun e he ka wâhmakhmeto me wâ ûnykûme a gʼ ame laba Kamen eû hnyik, ke inya eû hnyin Kamen. 39Adre me elâm hmetu he ka kât e: me e ame he but ûnyi hnyi hnyamödra.

40Me e ame he hmetu hoton Joridano, ka hnyi dok a bö Ioane ka bapataiso hnyin; ke e ame laba eling. 41Me ame he but kâu tavat ae se hia, adre me ha, ka habe, A ca mâdrâ Ioane ke ûöman: ke e hnathu ta je hofuc hia a ha Ioane ge at ang. 42Ke se hia tavat adre me labageju elin kâu.

Currently Selected:

Ioane 10: IAAI

Highlight

Copy