Ioane 7

1HWABAN e Iesu ame vheno Galilaia: anyin ae ca weny bi he ka vheno Juda, anyin a at Juda adre me heleû deny he ka hlingâ e. 2E hakekeny jut bijeû anyin at Juda, wale bijeûiny uma menâ 3Me ame ka kâu liamekeiny mē, ka habe, Hna but dok ang, ke he thö Juda ai, me me wâ thö hnen latâm ta je huliwa u me ânyâ. 4Anyin ae ba at ame ânyâ duöngâ ke ûnyi, e ka weny bi he ka omanenâ e. U je ne ânyâ ta je ûnyi e, awe omanenö u thö ka hmeledrany. 5Anyin ame ca labageju minya kâu je liamekeiny mē. 6Haba Iesu ame thu ködrin, ka habe, E tiga ca o ûök; ke ûöbun bala bi. 7E ca khana bi hmeledrany he ka hûköti öbun; ke so bi ame hûkötiö nya, anyin a oge me ohnathoâ ae kong ta je huliwainy. 8He thʼ öbun ka hnyi bijeû: oge me ca mē he ka hnyi bijeû; anyin ae tiga ca hwâdâ bi ûök. 9E ame ha je hofuc eling kodra, me ame mē laba ju hnyi Galilaia.

10Ke ame he but ka hnyi bijeû je liamekeiny mē, me e ame ka he minya, kʼ ame ca he manen bi, kʼ ame he duöng. 11Haba at Juda adre me elâm e hnyi bijeû, haingödra, ka habe, Ewa? 12Ke gan hmâ hna ûlidro gan ge tavat ae se hia: haingen keihen, ka habe, E at ae so; haingen keihen, Ohe, e ame omono tavat ae se hia. 13Ke ba at ame ha manenâ e anyin a ödra outen at Juda.

14Ke haba hnyi wanben bijeû, me ame he Iesu ka hnyi uma kap, kʼ ame ûne. 15Haba at Juda adre me lâiâ me ha, ka habe, A khana at ang tusi ga ia, ke adre ca nâ bi? 16Me Iesu ame thu kodra, ka habe, Ca ûnyi gak hnök hna ûne, ke ûnyi ge at a kunö nya. 17A ne weny ke at he ka mâdrâ weny, e ame he ka wâhmakhmetoâ hna ûne, a ne ûnyi ge Khong, oge ne ha ka ûnyi bi gak. 18Haba at ame ha hofuc ka ûnyi gan bi e ame elâm be ka ogânâ e bi: ke haba at ame elâm he ka ogânâ at a kunâ e, e hnathu e, ke ba hwakecin ae ca wisa gan. 19Hawa, a ca ham köbun Mose hnanyibu, ke ba ke at gabun ame vheno hnanyibu? Ieû gabun öbun e elâm he ka hlingö nya? 20Haba tavat ae se hia adre me thu me ha, ka habe, E but gam demoni: ia ame elâm he ka hlingö u? 21Iesu ame thu me ha kodra, ka habe, Oge hia but ânyâ ke huliwa, ke öbun e lâiâ hia. 22Anyin a wale Mose ame hia but ham köbun peritom (ke so bi ca ûnyi ga Mose, ke ûnyi bi ge wahingat); ke öbun e peritomonâ at hnyi sabath. 23Adre ne peritomonâ ke at hnyi sabath, kʼ adre me ca he ka hanyâûâ hnanyibu anyi Mose; hawa öbun e hmönyibun könya, anyin a oge me ti osoâ at hnyi sabath? 24Ca ha ûnykûme bi hoton hna wâ hnen ecmak, ke so bi ha ûnykûme ju hoton wisa.

25Me haba keihen ûhedra Jerusalema adre me ha, ka habe, Hawa, ca walang at adre me elâm he ka hlingâ? 26Ke wâ bi, e ame fuc manen, ke ba hodrin kâu. Hawa, e khana je taben me ka e Keriso? 27Ke haba at ang, me khanʼ ota dok a mwi hnyin: ke e ka o but Keriso, e ba at ame he ka wâhmakhmetoâ dok a mwi hnyin. 28Me haba Iesu ame fuc hwege hnyi hnyin uma kap me nö ʼdra me ha, ka habe, E khanʼ öbun dut inya, ke khanʼ öbun minya but dok oge mwi hnyin; oge ca o ka ûnyi gak, ke e hnathu e at a kunö nya, wale at ae ca khanʼ öbun. 29E khanö nya e, anyin a ûhek unyin, ke e a kunö nya. 30Me adre me elâm he ka kât e: ke ba ke at ame hinôbeny kâu, anyin ae tiga ca o bi ûen. 31Ke ödra se hia adre me labageju kâu; me ödrin e ha, ka habe, E ka o but Keriso, hawa, e ame he ka ânyâ ta je ûöman hon hna ânyâ hnen at ang. 32A long ut ta je Faresaio hna iulidroköuâ ge tavat ta je ûnyi e gan; me haba je taben tavat bihut me ta je Faresaio, me adre me kunâ je taben tavat tue he ka kât e. 33Haba Iesu ame ha, ka habe, E ca beû biju ûök a ûlabaik eang unyibun, ke oge me he ka he but ka at a kunö nya. 34Öbun e he ka elöm nya, ke öbun e ca he ka wâ: ke ca khanʼ öbun he ka he ka hnyi dok oge me he ka labâ. 35Me haba at Juda adre me ûhnenamököuâ, ka habe, Ewa dok ame he at ang ka he ka hnyin mʼ ate me ca he bi ka wâ; hawa, e ame he ka he ka tavat adre vese unyin at Heleni, me nâ at Heleni?. 36Ieû hofuc ang e ame ha, ka habe, Öbun e he ka elöm nya, kʼ öbun e ca he ka wâ: ke ca khanʼ öbun he ka he ka hnyi dok oge me he ka laba hnyin?

37Hnyi bong a biliny bonginy bijeû, wale bong ae gan, Iesu ame todrö me ha hwegiâ, ka habe, A ne ke at ae beic, he but jem ka ic unyik. 38Haba at ame labageju könya me ame he ka uoû ûnyi eû hnyi hnyekon je wageweiny möt, helâji me hna sihnalimen. 39Ke e ame ha ge Hanu, wale ame he tavat adre me labageju kâu he ka kap: anyin adre me tiga ca ham Hanu; anyin adre me tiga ca ogânö Iesu. 40Haba keihen tavat ae se hia, hnyi ûen adre me long ta je hofuc e, me haingödrin, ka habe, E hnathu, perofeta at ang. 41Haingen keihen, ka habe, Walang Keriso. Ke haingen keihen, ka habe, Hawa, ame o Keriso ûheny Galilaia? 42Hawa, adre me ca ha bi hnyi hna sihnalimen, ka habe, Ame he ka o Keriso ûnyi ge mâtrâni Davita, ke haba taun anyi Davita, me Betheleema. 43Me ame khekhe lo but tavat gan. 44Ke e weny keihen he ka kât e; ke ba bi at ame hinöbeny kâu.

45Me ame he hmetu but je taben tavat tue ka je taben tavat bihut me ta je Faresaio; ke ödrin e ha kodra, ka habe, Ieû gabun öbun e ca hom but e? 46Haingen je taben tavat tue, ka habe, E ba at ame fuc helâe. 47Me ame thu kodra ta je Faresaio, ka habe, Hawa, adre hia but omonu öbun minya? 48Hawa, e hu ke taben ame ne ke at Faresaio ame labageju kâu? 49Ke hnaûhango but houmonu ang ae ca khanʼ ödra bi hnanyibu. 50Me ame ha ködra Nikodema, (e ke at gadra, kʼ ame he kâu ehac), 51ka habe, Hawa ge anyita hnanyibu, adre me he ka hangâ at ke adre me ca mē long dö gan me me manen dut hnen hna mâdrâ? 52Me adre me thu me ha kâu, ka habe, Ûhem minya Galilaia? Elâm dö me wâ, anyin ae ba ke perofeta ame o ûheny Galilaia. 53Me adre me vese but ka hnyi umödra ta je uma:

Currently Selected:

Ioane 7: IAAI

Highlight

Copy