Ioane 3

1HABA ke Faresaio, Nikodemo ien, ke taben at Juda: 2ame he kâu hnyi hnyinghet me ha kâu ka habe, Rabi, e khanʼ ohmun dut a u at ûne ame o ûnyi ge Khong: anyin ae ba at ae khana he ka ânyâ ke ûöman u je ânyâ, a ne hia unyin Khong. 3Iesu ame thu me ha kâu, ka habe, E hnathu, e hnathu, inya oge me ha köu, Adre ne ca hnokoâ hmetu hi at, e ca khana he ka wâ dokhu dokhon Khong. 4Haba Nikodemo ame ha kâu, ha habe, Adre me he ka kâmâu ka hnokoâ at, ka hingat ut? hawa, e khana he ka olo didrö ka hnyi hnyekon hinyen me me hnökoâ but? 5Ke haingö Iesu, ka habe, E hnathu, e hnathu inya oge me ha köu, Adre ne ca hnokoâ bi at hnyi köiö me Hanu, e ca khana he ka didrö ka hnyi dökhu dokhon Khong. 6Haba hna hnokoâ ûnyi hnyi unyin, me wale unyin bi, ke haba hna hnokoâ ûnyi hnyi Hanu, me wale hanu bi. 7Ca lâiâ bi hnok hna ha köu, ka habe, E ûnyi hnathu he ka hnöku öbun hmetu. 8Ame si thö ang a ka hamen weny, u je long ut a gʼ ame hmuhmu, ke ca khanö u ûheny ua, kʼ ame he kâ: helâe tavat hia adre me hnokoâ ûnyi hnyi Hanu. 9Nikodemo ame thu me ha kâu, ka habe, Ama kâmâu he ka helâe? 10Haba Iesu ame thu kâu, ka habe, Hawa, u at ûne hnyi Isaraela, ke u me ca wâ ûnykûme bi e? 11E hnathu, e hnathu, ohmun e ha hnö-hmun hna wâhmakhmeto, me ha hnathoâ hnöhmun hna wâ; ke öbun e ca kap hnöhmun hna ohnathoâ. 12Oge hia but ha köbun ta je ûnyi eang hmeledrany, ke öbun e ca labageju bi, awe, öbun e lie ka kâmâu he ka labageju oge ne he bi ka ha köbun ta je ûnyi ethö hnyi drany? 13E ba at ame hia but ölö hnyi drany ai ke so thibi at ame utut ûheny hnyi drany, wale Nokon at a e hnyi drany. 14Haba Mose ame ogöranyâ on hnyi hnyebuba, ke helâe adre me he ka ogöranyâ Nokon at: 15me me he ka hu ûnyi gan möt ame ca ba balua ka tavat hia adre me labageju.

16Anyin a Khong ame betenge ge hmeledrany, me e ame ham but Nokon a khaca thibi, me me ca he ka mok ke at ge tavat adre me labageju kâu, ke ame he bi ka hu möt ame ca ba balua. 17Anyin a ca kunâ bi Khong Nokon ka hnyi hmeledrany he ka ohnaûhangoâ hmeledrany; ke so bi he ka omelö hmeledrany a deny e. 18Adre me ca ohnaûhangoâ at ame labageju kâu: kʼ adre hia but ohnaûhangoâ walang ang at ame ca labageju, anyin a e ame ca hia but labageju ka ien Nokon Khong a khaca. 19Ke walang hnaûhango, a ga o but melam ka hnyi hmeledrany, ke weny bi tavat menekholom hon melam; anyin ae kong ut hwakecidra. 20Anyin ame hûkö-tiâ melam hnen at ame mâdrâ monu, kʼ ame ca he bi thö ka hnyi melam, wâ e nye manen dut anyin ta je huliwa. 21Ke haba at ame mâdrâ hnathu, e ame he ka hnyi melam, me me manen dut anyin ta je huliwa, a gʼ ame mâdrâ ûnyi ge Khong.

22Hwaban ta je ûnyi eling Iesu ame tha he me laten ka hnyi hnyei Juda; ke ame tha laba eling mödrin, me bapataiso. 23Ke Ioane minya ame bapataiso hnyi Ainon hakekenyâ Salim, anyin ae gan eling köiö: ke adre me o but, me e ame bapataisoi ödra. 24Anyin adre tiga ca khûö Ioane ka hnyi uma ceat. 25Me ame ivinö latö Ioane me ke at Juda ge hwakecin obosoâ. 26Ke ödrin e he but kö Ioane me ha kâu, ka habe, Rabi, haba at ame tha tot möu hnyi ke keihen hoton Joridano, waleji at u me ohnatho, wâ bi, haba at eling ame bapataiso, ke ame ok ut kâu tavat hia thithö. 27Haba Ioane ame thu kâu, ka habe, E ca khana at he ka kap ke ûnyi, adre ne ca ham bi kâu ûnyi hnyi drany. 28Haba öbun, me öbun e ohnathu nya a oge ha, ka habe, Iny ca Keriso bi, ke adre kunö nya bi hnyi hnyimakan. 29Haba at ae hu hlu a teb faipoipo, me wale baga a teb faipoipo mē, ke haba hanen baga a teb faipoipo, at ame tot ka long e, me ame senyin gan hmâ ge ifucin at a teb faipoipo: anyin a wale e hwâdâ but anyik senyin ang. 30E ame he ka gan tot, ke oge me he bi nya ka ûhnyûkong tot.

31Haba at ûheny thö, me e thibi hon ta je ûnyi hia: ke haba at ûheny hmeledrany, me at hmeledrany bi e, kʼ ame ûhnenamö hmeledrany: haba at ûheny thö, me e thibi hon ta je ûnyi hia. 32Ke e ame ohnathoâ ûnyi e ame wâ me long; ke ba at ame kap hnen hna ohnathoâ. 33Ke haba at ame kap hnen hna ohnatho, me wale at ame bi haten a e hnathu Khong. 34Anyin a haba at ame kunâ hnen Khong, me wale at ame ha je hofuc hwan Khong: anyin a e ame ca bâm Hanu hoton tulut. 35Haba Kamen ame betenge ka Nokon, kʼ ame hna ta je ûnyi hia ka hnyi li hnyamen. 36Haba at ame labageju ka Nokon, me hu but kâu möt ame ca ba balua; ke haba at ame ca long hoton Nokon, me ame ca he ka wâ möt, kʼ ame he ka takoû e hnen hmonyin anyin Khong.

Currently Selected:

Ioane 3: IAAI

Highlight

Copy