Hosea 7
7
1KE oge me be ometo Isaraela, me ame manen bi thö hwakecin ae monu anyin Eferaima, me hulo anyin Samaria; anyin adre me thoi: ke ame didro tavat: venöu, ke haba deö at venöu adre me soh eû hnyou. 2Ke adre me ca ûnykûme bi hnyi je hnyekudra, a inya oge me ûnykûme ta je hwakecidra hia ae kong: ke walang ang ame theling ödra hnen bi anyidra ta je huliwa; ke e bi hnyi hnyimakök. 3Adre me osenyinâ than ge anyidra bi monu, me je taben hnen anyidra je thoi. 4Ödra tavat bi ûnyi monu hia; ödra helâ me wahnainyâ ame khutâ at ame inyâ; e ame ca ânyâwia hmetu meic hwân hnyi hna up falawa ke ne o but ame khibi thö. 5Ke haba hnyi bong bongon tuhöta ame mok je taben ge ûkahwâiny waina; e ame ûkhöû hnyam me tavat ûhiö. 6Anyin adre hia but penapena hnyekudra helâ me wahnainyâ, ke adre me mokut iyawo bi: ame mokut at ame inyâ ö dra hnyi lit hia; ke hnyi hnyomakatu e ame han helâ me meic ame ubâhlâ. 7Ödra kahwa hia but helâ me wahnainyâ, ke adre me ohia tavat owisʼ ödra; a ta but anyidra je than: e ba ke at gadra ame hongot könya. 8Eferaima ame ûkhacaköu me je hnyei; Eferaima ame helâ me ong areto adre ca wia. 9A hia but ohia hwegien hnen je atkanyua, ke ca khana bi: eke, ûsa khaca but tehûen, ke ca khana bi. 10Ke ame ohnatho hnen bi gan anyin Isaraela hnyi hnyimakan: ke so bi adre me ca hmetu bi kö Iehova Khongudrin, me elâm e, hnyi je ûnyi hia eling. 11Ke e ûcû Eferaima me biny ae ûnyibaû me ba hnyekon: adre me hongot ka Aigupito, me he Asuria ai. 12Ödra ka he me oge me he ka thong ûtök ert hudrin; oge me he ka hagutʼ ödra helâ me je meno ame gâ ethö: oge me he ka kuc ödra helâ me hna löng hnyi anyidra ûkhacaköu. 13Ekölö gadra! anyin adre hia but he monu gak; hangʼ ödra but! anyin adre hia but hanyâûâ gak: oge me beûcû melidra, ke adre me sit hofuc thoi bi gak. 14Ke ame ca hia but tenge je hnyekudra könya, ke adre me kuku tenge bi hon hnödra je hna mokut: adre me ûkhacaköu ge hwit me waina, kʼ adre me ûkhin fuc mönya. 15Oge hia but nʼ ödra me ohwegiâ je hnyamödra, ke so bi adre me ûnykûme ûokonguny ûcûk. 16Adre me hmetu ke ca kâu bi ethö gorany; ödrin ûcû me cafana ae iyawo; kʼ ame he anyidra je taben ka ta ge hele vat can ae hwege ifucidra: wale hnân hlumʼ ödra hnyi hnyei Aigupito.
Currently Selected:
Hosea 7: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
