Habakuka 3
3
1WALANG hic hiji Habakuka perofeta, adre me hai hnyi Shigionotha.
2Iehova lö, oge hia but long ûthumetu gam, me oge me ot:
Iehova lö, ohâtâ thö ânyâm huliwa hnyi wanben ta je huna,
Omanenâ thö hnyi wanben ta je huna:
Ke ûnykûme ju ibetengiö hnyi ûen wathethot.
3Ame o but Khong ûheny Temana,
Ke At ae Kap ûheny hnyi bucen Parana. [Sela.
Ame khavâ drany hnen anyin hmanenang,
Kʼ ame unöngötö hmeledrany ge hna ogânâ e.
4Haba melaminy, me helâ me lany;
Kʼ ame o li basesönginy ûnyi hnyi hnyamen:
Kʼ ame oiyongâ eling maniny man.
5Ame he but mok ae cap hnyi hnyimakan,
Kʼ ame gâ thö je uthmeic hnyi li can.
6E ame tot me tuluto hmeledrany;
E ame bwele me oveseâ ta je hnyei:
Ke adre me oveseâ je bucen kâû adrem,
Kʼ ame nom ju je hut kâû ehac;
E kueny jut deny ta je gethen.
7Oge me wâ je uma mano umo Kuza hnyi vec:
Kʼ ame öbubuny je mano singiny hnyei Midiana.
8Hawa, Iehova ame hmonyin ka je wagewe?
Hawa, u me hmönyâm ka je wagewe,
Ke wathethot ge köiö ae gan,
Mʼ u me tabâ halem je hors,
Ke ta je kariotainy ânyâm ûhomeli?
9Adre me oc ut ânyâm cafana;
E hnathu ta je hofuc u je khemanyin ka ta je tribu. [Sela
Ke u je kia hmeledrany ge ta je wagewe.
10Haba je bucen adre me Ă´ u, me ot;
Ame be but hwegeiny di:
Ame mea dok ae dit,
Me hinĂ´beny goranyai.
11Ame tot seûno me tehi hnyi hnödru;
Hnyi melaminy ânyâm je fana adre gâ,
Hnyi melaminy ânyâm ö ame hadröngoc.
12U je vheno hnyei hnyi hmonyin,
U je uto je tavat hnyi wathethot.
13U je he but hnân he ka omelö lakem,
He ka omelö hnâm hna hû;
U je aat dö ban ûnyi hnyi lap anyin at ae kong
Me omanenâ taben ke ne o but hnyi kic. [Sela.
14U je dâoâ taben je aten vat gan ge dân bi je ö:
Adre me utut helâ me höu he ka ovesei nya;
Adre me senyin helâ ke at ame he ka han duöngâ at ae ba ta ûnyi.
15U je oheâ halem je hors eû hnyi köiö,
Hnyi dok ame khibi hnyin goranyai köiö ae gan.
16Oge me long, me ame ututut hnyekuk,
Ame öbubuny li esongodik ge hwan;
E amam but je jeiök, ke oge me öbubuny hnyi hnok:
Mʼ oge me he ka menâ hnyi bonginy vec,
Hnyi ûen e ame o but ûcon hnyei wale ame o kâu a je deo vat,
17Eja ke ne a ne ca vhong imeta,
Ke ba wan hnyi je ivine;
Eja ke ne a ne ba hna huliwan elaio,
Ke ba jeû hnyi je hna belök;
Eja ke ne adre ne subâ degecâ hnahat meno hnyi hak,
Ke ba but kau hnyi je hnyeuleny meno:
18Ke so bi oge me he bala bi nya ka hobâ kö Iehova,
Oge me he ka senyin ka Khong at ame omeli nya.
19Iehova Than me wale tang hwegiök,
E ame wia li cak me me helâ me can je aila,
Kʼ ame he ka ovhenu nya hnyi anyik je dok ae görany.
Hobi kâu at ame vhik khumöng hnyi Neginoth.
Currently Selected:
Habakuka 3: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
