Habakuka 1
1
1WALANG hok ame wâ Habakuka perofeta.
2Iehova lö, oge me he ka khöû köu ke ne o but kehö, ke u me ca ling nya bi? oge me tenge köu ge ûokonguny, ke u me ca omelö bi 3Anyin a ieû u je omanenâ kônya hulö, me wâ hwakecin ae hwali? ânyin a e hnyi hnyimakök hna söh me ûokonguny: ke e hu hna ivinö, ke adre me oâ iwatreta. 4Anyin a wale adre me oûnyibâûâ hnanyibu, ke ame ca he but hna owisa bala ka hwâdâ; anyin a tavat ae kong adre me igigilo tavat ae wisa; anyin a wale ame he but hna owisa ae hwali. 5Bwele thö unyin ta je hnyei me wâhmakhmeto, me lâiâ gan hmâ thö: anyin oge me ânyâ huliwa hnyi bongubun je bong, eje ke ne adre ne thumetu öbun, öbun e ca he ka kap. 6Anyin a wâ bi, oge me oâ at Kaledaia, hnyei ae hiny ame ie utut; tavat adre me vheno ûlauen hmeledrany, he ka hûgûnâ je dok hnân labâ, a ca idra bi. 7Ödra tavat hnân outen me öbubuny gadra: ame ka o bi gadra hna owisa me hmanenangidra. 8E logot minya haledra je hors hon je lepad, ke hwege hnyimak hon je luko hnyi sahac; tavat tabö hors unyidra adre me ave ehe thibut: eke, anyidra tavat tabö hors ûhedra sâkâû; adre me gâ helâ me aeto at ame logot ka an haniny. 9Adre me tha o hia he ka ûokonguny; helâ me ang hwei imaneniny je hnyimakodra; adre me ûkhaca-köuâ je bâ helâ me öny. 10Eke, e ame hluma je than, ke taben ûhiö kâu je taben: e ame hluma je hnabâ hia; anyin a e ame okhibö goranyai kânâ me hûgûnâ. 11Me e ame he ka o helâ me ang me hanyâûâ, me me hu hulö kâu: wale at a haba tang hwegien me ûnyi ge khongon. 12Iehova lö, Khonguk, me Kapik, hawa, u ca at kâû adrem bala? ohmun e ca he ka mok. Iehova lö, u je otilâ e me hnân owisa, Kicik lö, oâ e me hnân nâ. 13E kalaöt hmonyin li emâkâm, me u je ca bewâ hulö, ke u je höcö wâ hwakecin ae hwali, anyin a ieû u je wâ tavat iyawö, me laba hnyibû hnyi ûen ame he at ae kong ka utâ at ae wisa hon e bi; 14me mâdrâ tavat mʼ ödra helâ me wâiny köiö, ke ta je ûnyi ame iyâû ke ba at ame musi ödra? 15E ame kap goranyai ödra hia ge wage, kʼ ame ohnoki ödra hnyi ûten ert, kʼ ame hum ödra hnyi ûten ert hlihli: anyin a wale e ame senyin me hobâ. 16Anyin a wale, e ame bi hut ka ûten ert, kʼ ame leû utö ae bo so ka ûten ert hlihli; anyin ae pipikhenya jekhon ûnyi gan, ke gan hmâ an jeû. 17Anyin a wale, hawa, ame he ka öba onyen ûten ert, kʼ ame ca he ka hokhnyok hnyi hnen hna labö ohia ta je hnyei.
Currently Selected:
Habakuka 1: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
