Genese 37

1KE Jekob ame laba hnyi hnyei hnen kamen hna laba kanyua hnyin, wale hnyei Kanana. 2Walang ta je dö anyi Jekob. Seventin ta je hunai Josefa, me e ame tha tuö me latuhan ta je hnahat meno; ke e thöth unyin je laku Bila me Zilepa, laâiân kamen: ke Josefa ame thumetu ka kamödrin anyidrin monu. 3Ke Isaraela ame betenge ga Josefa hon je lakon hia, anyin a e nokon hingat: ke e ame tibet ke ûkot khauen ae ve hnalimen. 4Ke a wâ but je latuhan a gʼ ame betenge gan hnen kamö-drin hon je latuhan hia; mʼ ödrin e hukötiâ e, me ca ûhnenamö so më. 5Ke Josefa ame bo ke bwi, me e ame thumeto latuhan; me ödrin e hûkötiâ hmönyinâ e. 6Ke e ame ha ködrin, ka habe, Ö öbun, löng ju bwik oge bo: 7wâ bi ötin e ca je thi hwit hnyi utkânâ, kʼ ame höhöi thö anyik thi hwit, me tot wisa minya; ke wâ bi, ame tot igigilö anyibun je thi hwit me nom ju ka anyik thi hwit. 8Me haingen je latuhan kâu, ka habe, Hee u me he ka than huhmun? ke u me he ka musi öhmun? Ke odrin e hûkötiâ hmönyinâ e can je bwiny, ke hwan je hofuc. 9Ke e ame bo hmetu ke bwi, me ha e ka je latuhan, ka habe, Wâ bi, oge bo hmetu ke bwi; ke wâ bi, ame khudrung könya seûnö me tehi me je okhû a libenyita me nua khaca. 10Ke e ame ha e ka kamen me latuhan; ke kamen ame thawâ e, me ha kâu, ka habe, Ie bwi e u je bo? Hawa, oge me he me hinyâm me latuhâm ka nom hnyikânâi köu? 11Ke ame hmönyin kâu latuhan; ke haba kamen ame ip ûnyi e hnyi ûnykûmânen. 12Ke je latuhan ödrin e he Sekema ai ka han hnahat meno haleny kamödrin. 13Ke haingö Isaraela kö Josefa, ka habe, Hawa ame ca han hnahat meno hnen je latuhâm, hnyi Sekema? aiö u, oge me he ka kunö u ködrin. Ke haingen kâu, ka habe, Walönya eang. 14Ke e ame ha kâu, ka habe, He thö ka wâ, hawa, e sot latuhâm, me hnahat meno; ke u hmetu thö ka thumetu nya. Wale e ame kunâ e ûheny hnyi hnyigöulen bucen e Heberona, me e ame e but Sekema. 15Ke a wâ but e hnen ke at, ke wâ bi e ame he baû hnyi hnyei: ke ame hnö e hnen at, ka habe, Ieû u me elâm? 16Ke haingen, ka habe, Inya oge me elâm latuhök: ö u ha thö könya dok ödrin e han hnahat hnyin. 17Me haingen at, ka habe, Ödrin dut hâng, anyin oge löng ut hnödrin hna ha, ka habe, Ötin he Dothana ai. Ke Josefa ame he hoton je latuhan me e ame ö ʼdrin hnyi Dothana. 18Ke ödrin e wâ but e ke tiga sâkâû, ke e tiga ca hakekeny ködrin, me ödrin e ûhnenamö he ka hlingâ. 19Ke ödrin e ûhaköuâ, ka habe, e but ang at ame bo je bwi. 20Ötin e he walang ang ka hlingâ me khûâ kâû ka hnyi ke monop, ke ötin e he ka ha, ka habe, A hia thö an e hnen ke meno ae kong: mʼ ötin e he ka wâ, hawa, ame he ka hwâdâ je bwiny. 21Ke a löng ut Reubena, me e ame omelö e ûnyi hnyi hnyamödrin; ke haingen, ka habe, E so ötin e ca ohia anyin möt. 22Ke Reubena ame ha minya ködrin, ka habe, Ötin e ca he ka hingâlâ dra, ke so bi he ka khûâ but e ka hnyi hmonop ang hnyi hnyebuba, ke ca hoibeny kâu: wale me me omelö e ûnyi hnyi je hnyamödrin, me hna hmetu e ka kamen. 23Ke ame o but Josefa ka je latuhan, me ödrin e uny jut ûkot anyi Josefa, wale anyin ûkot ae ve hnalimen; 24ke ödrin e hom e me khûâ e ka hnyi hmonop: ke ba önyen hmonop, e ba köiö hnyin e. 25Ke ödrin e laba ju ka han, me ödrin e bwele, ke wâ bi ame he jem bunyen anyin at Isamaela ûheny Gileada, me haledrin je kamela ödrin e hok setura, me basama, me muro, ödrin e hok Aigupito ai. 26Ke haingö Juda ka je liamekeiny më, ka habe, Ieû troban ötin ka he ka hlingâ keitin, me ikhâlâ dren? 27E so ötin e he ka ûco e ka at Isamaela, ke ca he ötin ka höibeny kâu; anyin a keitin, e tha unyin mötin. Me ame löng hoton hnen je liamekeiny më. 28Ke ame he ka gethen unyidrin at Midiana tavat ûcû; me ödrin e öû Josefa ûheny û hnyi hmonop, me ûcû. Josefa ka at Isamaela hwaban je sileva a twente. Ke ödrin e hum Josefa Aigupito ai. 29Ke Reubena ame hmetu ka hnyi hmonop, ke wâ bi, e hiö Josefa but eû hnyin hmonop; me e ame kia je ûkhaûen. 30Me e ame he ka je liamekeiny më, me ha, ka habe, E hiö thö thöth; ke oge me he biju kâ? 31Ke ödrin e hom ûkot anyi Josefa, me hlingâ nokon got a baga, me hneû ûkot hnyi dra; 32ke ödrin e ûkhûnöng ka hom ukot ae ve hnalimen ka kamödrin; me ha, ka habe, Öhmun e wâ thiju ang: wâ ju, ame ne ûkot ang anyin nokom, ame ne ba. 33Ke e ame wâhmakhmetoâ, me ha, ka habe, Ûkot ang anyin nökuk; a hia thö han e hnen meno ae kong; e hnathu a hia thö oloû usu kiö Josefa. 34Ke Jekob ame kia anyin je ûkhaû, me khavâ mano ae gan nân me tenge can nokon, ae se hia je bong. 35Ke ame todrö je lakon hia je baga me hlu he ka otubwelâ e; ke e höcö tubwet, ke haingen, ka habe, Oge me he ka tenge can nökuk ke ne o but ka hnyi erkemok. Wale hna tengiâ e hnen kamen. 36Ke haba at Midiana adre me ûco e Aigupito kö Potifara athnyabai Faro, taben hnyat tue.

Currently Selected:

Genese 37: IAAI

Highlight

Copy