Ezekiela 47
47
1ME e ame ohmetu nya ka hnyi hwanumen uma; ke wâ bi, ame hingölö köiö ûnyi hnyi hmelen hwanumen uma e deiö, anyin ame hnyimakan deiö uma: ke ame hingölö köiö ûnyi hnyi hmelen, hnyi ke keihen metân uma, hnyi ke keihen taben hut ka hnyi hwaiöu, 2Me e ame hum nya kâû a gethen hnyi homagöule ka hnyi hwadro, me su nya hnyi gethen eû, ka hnyi homagöule eû, a gethen hnyi homagöule e deiö; ke wâ bi, ame hingölö köiö ûnyi hnyi ke keihen metâ. 3Ke ame he deiö at ae hu tulut tö hnyi hnyamen, me e ame tuluto khaca thauzan je kubit, ke e ame ovhenu nya hnyi wanben köiö, me bongon ju köiö hnyi li omakhnâiny. 4Ke e ame tuluto hmetu khaca thauzan, kʼ ame ovhenu nya hnyi wanben köiö, me bongon ju köiö hnyi li bouca. Ke e ame tuluto hmetu khaca thauzan, kʼ ame ovhenu nya hnyi wanben köiö, me bongon ju hnyi bibiköta. 5Ke hwaban dö e e ame tuluto khaca thauzan; me wale wagewe but, me ca khanö nya hmetu he ka vheno: anyin ame khibi thö göranyai köiö, a köiö hnân hai hnyin, wagewe a ca hnân vheno. 6Ke e ame ha könya, ka habe, Nokon at lö, hawa, u je wâ but? Me e ame hum nya, me ohmetu nya ka hnyi baten wagewe. 7Ke oge me hmetu but, ke wâ bi, e se hia hmonyin je ûö hnyi baten wagewe hnyi li ke keihen. 8Ke e ame ha könya, ka habe, Ame hingölö köiö ang ka hnyi je ke keihen e deiö, me ame he ka badedö ka hnyi hnyebuba: kʼ ame he ka he bi hnyiköiöai; ke haba köiö adre hingâlâ, me ame he ka utut ka hnyi köiö ae gan; me ame he ka so but köiö. 9Ke haba je ûnyi hia ae möt adre me si but hnyi je dok hia ame o hnyin wagewe, me adre me he ka möt; ke ame he ka se hia hmonyin ta je wâ: anyin ame o eling köiö ang, kʼ ame he ka omelo köiö ae gan, me ame he ka möt hia ta je ûnyi hnyi je dok hia ame o wagewe ka hnyin. 10Ke ame he tavat thut ka ûtitilen hnyi baten: hwân hnyi Ene-gedi ke ne o but hnyi Ene-gelima, kʼ adre me he ka thong eling je ert; ke helâ me je wâiny köiö ae gan je wâ, e ve bongon, ke se hia hmonyin. 11Ke ame ca he ka so but je hmudrainy, ke je utkânâiny ae lup; kʼ adre me he ka hna e me me köiö hiny. 12Ke haba hnyi li baten wagewe hnyi ke keihen me ke keihen me ame he ka kû ta je ûö hia hnân an wan, ae ca meleca lan ke ca ba wan: ame he ka wa wan ae teb ûnyi hnyi je tehi hia, anyin ame hingölö köiö ûnyi hnyi dok ae kap; ke hnân an je wan, ke hnân bubuny je lan.
13Walang hna ha hnen Than Iehova, ka habe, Waleû hnyigöulen öbun e he ka khenâ hnyi hnyei hnân hwajekhon hoton je tribu Isaraela a twelv: ame he ka hu je hwajekhoû Josefa. 14Ke öbun e he ka ve hu e, ke at me ke at; waleji oge me inâ göranyai hnyamok he ka ham e ka je Akamöbun: ke öbun e he ka hu hnyei ang hnân ibun. 15Ke walang hnyigöulen hnyei: haba ke keihen ka hnyi hwadrö, hwân hnyi köiö ae gan gethen Hethelon, ke ne o but hnyi gethen ame he Zedad ai; 16Hamath, me Berotha, me Siberaim wale wanben hnyigot hnyi Damaseko, me hnyigot hnyi Hamath; Hazer-atikon hnyi hnyigot hnyi Hauran. 17Ke haba hnyigot hwân hnyi köiö me Hazar-enana hnyi baten Damaseko, ke haba hnyi hwadrö me hwadrö hmonyin, me hnyigot hnyi Hamath. Wale ke keihen ka hnyi hwadrö. 18Ke haba hnyi ke keihen e deiö, wanben Hauran, me Damaseko, me Gileada, me hnyei Isaraela, me e bi Joridano; öbun e he ka tuluto hwân hnyi hnyigot ka hnyi hwadrö ke ne o but köiö e deiö. Wale ke keihen o deiö. 19Ke haba ke keihen ka hnyi hwaiöu me hwaiöu hmonyin, hwân hnyi Tamara ke ne o but hnyi köiö Meriba-kadesi, ke ne o but wageweiny Aigupito, ke ne o but köiö ae gan. Wale ke keihen hnyi hwaiöu me hwaiöu hmonyin. 20Ke naba ke keihen e jio, me köiö ae gan, hwân hnyi hnyigot hnyi hwaiöu ke ne o but hnyi cicö gethen ame he Hamath ai. Wale ke keihen e jio. 21Helâe öbun e he ka khenâ köbun hnyei ang hoton je tribu Isaraela. 22Ke öbun e he ka khenâ e hnân ibun me je atkanyua tavat adre me tha laba möbun, tavat adre me hnokoâ unyibun; ke adre me he ka helâ me tavat unyin lakon Isaraela wale adre hnokoâ hnyi hnyei; me adre me he ka hu idra möbun unyin je tribu Isaraela. 23Ke haba tribu wale ame laba unyin je atkanyua, öbun e he ka ha idrin eling, haingen Than Iehova.
Currently Selected:
Ezekiela 47: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
