Ezekiela 46
46
1WALANG hna ha hnen Than Iehova, ka habe, Haba homagouleny hnyeule eiö wale a hnyimakan deiö, me adre me he ka hlöng hnyi je bonginy huliwa a siks; ke adre me he ka khong e hnyi bong sabath, ke hnyi bong ame manen hnyin tehi adre me he ka khong e. 2Ke ame he than ka didro a deny getheniny poretikoiny homagöule eû, me tot hnyi uthomagöule, ke ame he tavat bihut ka penapena anyin hudiny leû, me anyin je hudiny ole, ke e ame he ka khudrung hnyi baten homagöule; me e ame he ka he: ke adre me ca he ka hlöng homagöule ke ne o but sahac. 3Ke ame he tavat aten hnyei ka khudrung hnyi hlinginy homagöule eling hnyi hnyimakö Iehova hnyi je sabath me je ûen ame manen hnyin tehi. 4Ke haba hudiny leû ame he than ka hom kö Iehova hnyi bong sabath, me siks ta nokon mamoe ae ba hnyikongon ke khaca mamoe baga ae ba hnyikongon; 5ke haba hudiny han, me khaca efa hobi kâu mamoe baga, me hobi kâu je nokon mamoe hudiny han, hoton hna hu, ke khaca hin wakaco hobi kâu efa. 6Ke haba hnyi bong ame manen hnyin tehi me khaca nak bolok ae ba hnyikongon; ke siks ta nokon mamoe ke khaca mamoe baga; ae ba hnyikongudrin: 7ke e ame he ka penapena hudiny han, khaca efa hobi kâu bolok, ke khaca efa hobi kâu mamoe baga, me hobi kâu je nokon mamoe hoton hna hu, ke khaca hin wakaco hobi kâu efa. 8Ke e ka didro than, me e ame he ka didro a gethen poretikoiny homagöule, ke e ame he ka didrut hmetu e. 9Ke e ka o tavat aten hnyei hnyi hnyimakö Iehova hnyi je bijeû adre thu, haba at ame he ka didro hnyi homagöule ka hnyi hwadro he ka khudrung, me e ame he ka hmetu but hnyi homagöule ka hnyi hwaiöu; ke haba at ame didro hnyi homagöule ka hnyi hwaiöu, me e ame he ka dit hmetu but hnyi homagöule ka hnyi hwadro; e ame ca he ka hmetu hnyi homagöule a dit hnyin, kʼ ame he ka didrut cicö e. 10Ke haba than, me e ame he ka dit hnyi wanbödra ödra ka didro; ke ödra ka didrut, me e ame he ka tha didrut mödra. 11Ke haba hnyi je bijeû ke je bong adre thu, me ame he ka hu hudiny han, khaca efa hobi kâu bolok, ke khaca efa hobi kâu mamoe baga, ke hobi kâu je nokon mamoe hoton hna hu, ke khaca hin wakaco hobi kâu efa. 12Ke e ka he than ka penapena hut ae betenge, ame ne hudiny leû, ame ne hudiny ole hnân hut ae betenge kö Iehova, me hamen ke at he ka khong ut kâu homagöule e deiö, ke e ame he ka penapena anyin hudiny leû, ke anyin je hudiny ole, helâ me hnen hna ânyâ hnyi bong sabath: me e ame be ka dit ut; me ame he ke at ka hlöng homagöule, e ka didrut. 13Ke u me he ka penapena hnyi ke bong me ke bong khaca nokon mamoe a khaca hunainy ae ba hnyikongon hnân hudiny leû kö Iehova: u me he ka penapena e hnyi je hnyomakatu. 14Ke u me he ka penapena hudiny han hobi kâu e hnyi je hnyomakatu, ke keihen efa a siksiny, ke ke keihen a kuniny hin wakaco, hnân ûhaniken me tap falawa; a hudiny han hobi kö Iehova, wale hnanyibu adre ohmâ nyiele balua. 15Helâe adre me he ka penapena nokon mamoe, ke hudiny han, ke wakaco, hnyi je hnyomakatu hnan hudiny leû balua.
16Walang hna ha hnen Than Iehova, ka habe, A ne he than ka ham bwihlany ka ke nokon, me wale hwajekhon bi: me ame he ka ûnyi anyin lakon: me ame he ka e bi unyidrin me hwajekhöudrin. 17Ke so bi ame ne he ka ham bwihlany ka athnyabainy, a hanen hwajekhon, me ame he ka anyin bi ke ne o but hnyi buna adre me thang; me ame he ka ohmetu e ka than; ke so bi hwajekhon me hobi kâu lakon. 18Ke haba khaca, ame ca he than ka hûgûnâ hwajekhon tavat, me hagutʼ ödra ûnyi hnyi idra; e ame he ka ham hwajekhon ka je lakon ge iny bi: me me ca vese lakeik hnyi je idra bi.
19Me e ame hum nya ka hnyi gethen, wale hnyi baten homagöule, ka hnyi je hnyeule ae kap anyin tavat bihut, hnyi hnyimakan ka hnyi hwadro: ke wâ bi, wale ke dok hnyi ke keihen hoton e jio. 20Me e ame ha könya, ka habe, Walang dok ame he tavat bihut ka ölâ hudiny monu, me hudiny hulo hnyin, ke adre me he ka thân hudiny han hnyin; mʼ adre me ca he ka kom e ka hnyi hnyeule eû, he ka okabâ tavat. 21Me e ame hum nya ka hnyi hnyeule eû hnyou, me ovhenu nya ka hnyi vak ta kopiny hnyeule; ke wâ bi, e ve hu hnyeule hnyi vak ta kopiny hnyeule. 22Hnyi vak ta kopiny hnyeule e hu hnyeule adre bi hanen, fâte kubit ibeûen ke twente faiv ûlauen: khaca thibi tulutiny vak ta hnyeule eling hnyi je kopiny. 23Ke e hu hna up veto igigiliö, a igigilo vak eling, ke adre ânyâ je ûnyi hnân öt hmelen je hna up veto igigilo. 24Me e ame ha könya, ka habe, Walang je uma hnân öt, ame he tavat huliwan uma ka ölâ hut anyin tavat hnyin.
Currently Selected:
Ezekiela 46: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
