Ezekiela 45
45
1KE haba khaca, öbun ka he ka khenâ ibun hnyei, me öbun e he ka ham kö Iehova bwihlany ong dok ae kap ûnyi hnyi hnyei: haba ibeûen e, me twente faiv thauzan je hlowe, ke ten thauzan ûlauen: kʼ ame he ka kap e hnyi hnyigöulen hia igigilo. 2Ke haba, ke keihen e adre me he ka ip hnân dok ae kap me faiv haded ibeûen, ke faiv haded ûlauen, khaca thibi tulutiny vak ta ke keihen igigilo; ke fifte je kubit utkânâ igigilo. 3Ke haba hnyi hna tuluto eling u ma he ka tuluto twente faiv thauzan ibeûen, ke ten thauzan ûlauen: ke ame he ka e hnyin e dok ae kap, wale ae ti kap. 4E bi dok ae kap hnyi hnyei; me hobi kâu tavat bihut tavat adre me huliwan dok ae kap, tavat adre me hakekeny he ka huliwa kö Iehova; ke ame he ka hnân hnen umödra je uma, mo hnen ae kap hnân dok ae kap. 5Ke haba twente faiv thauzan ibeûen me ten thauzan ûlauen, me hobi kâu at Levi, tavat adre me huliwa hnyi uma, me me hwaje-köûdra me hobi kâu je hnyeule a twente. 6Ke öbun e he ka kû kânâ iny taun, faiv thauzan ûlauen, ke twente faiv thauzan ibeûen, hnyi baten bwihlany a utkânâ ae kap: ke wale hobi kâu lap anyi Isaraela hia. 7Ke haba dok hobi kâu than, me ame he ka e hnyi ke keihen me ke keihen bwihlany ae kap, me kânâ iny taun, cicö bwihlany ae kap, me cicö kânâ iny taun, hnyi ke keihen hnyi jimeû e jio, ke hnyi ke keihen jimeyö e deiö: ke haba ibeûen ame he ka helâ me ke jekhoû, hwân hnyi hnyigöulen ka hnyi jimeû ke ne o but hnyi hnyigöulen e jimeyö. 8Ke haba kânâ ame he ka hnân iny bi hnyi Isaraela: ke adre me ca he hmetu je than unyik ka hom ûhnyûkongo lakeik; ke adre me he ka ham kânâ ka lap anyi Isaraela hoton anyidra ta je tribu.
9Walang hna ha hnen Than Iehova, ka habe, Je than Isaraela lö, soju; degec ut öbun ûokonguny, ke sei, me anyâ thö ûnyi ae ûcû me ûnyi ae wisa; ohia ju hnobun hna musi hwege hon lakeik, haingen Than Iehova. 10Öbun e he ka hu tulut uhni ae wisa, me efa ae wisa, me bath ae wisa. 11Ame he ka khaca thibi tulutiny efa me bath, me me hu hnyi bath ke keihen a libenyitainy homer, me efa ame he ka ke keihen a libenyitainy homer: ame he tulut ka hnu hoton homer. 12Ke haba sekel me ame he ka twente je gera: twente je sekel, twente faiv je sekel, fiftin je sekel, wale anyibun mina. 13Walang bwihlany öbun e he ka hudo; ke keihen a siksiny efa ûnyi hnyi homer hwit, ke öbun e he ka ham ke keihen a siksiny efa ûnyi hnyi homer bali: 14ke haba jekhoû adre me ha ge wakaco, haba khaca bath wakaco, me wale ke keihen a libenyitainy ûnyi hnyi hnyin kori, wale ten je bath a khaca homer; anyin a haba ten je bath, me wale homer: 15ke khaca nokon mamoe ûnyi hnyi hnahat meno hnyi lo li haded, ûnyi hnyi je sajilat ae hoso hnyi Isaraela; hnân hudiny han me hudiny leû, me je hudiny ole, hnân ûcû melidra, haingö Iehova. 16Ke ame he tavat hia thithö hnyi hnyei ka ham bwihlany eling hobi kâu than Isaraela. 17Ke hamen than he ka ham je hudiny leû, me je hudiny han, me je hudiny ic, hnyi je bijeû, ke hnyi ûen bi a manen hnyin je tehi, ke hnyi je sabath, ke hnyi je bijeû hia adre thu anyin lap Isaraela: e ame he ka penapena hudiny hulo, ke hudiny han, ke hudiny leû, ke ta je hudiny ole, hnân he ka bi hwaban melen lap anyi Isaraela.
18Walang hna ha hnen Than Iehova, ka habe, Hnyi tehi a bân, hnyi bong a bâniny tehi, u me he ka hom nak bolok ae ba hnyikongon; me u me he ka obosoâ dok ae kap. 19Ke ame he at bihut ka hom hanen dren hudiny hulo, me kina hnyi je uthwanumen uma, ke hon je kopiny a vak dok ame silöû hnyi taben hut, ke hon ta je uthomagöuleny hnyeule eiö. 20Ke u me he ka ânyâ helâe hnyi bong a seveniny tehi hobi kâu at ame hau, ke hobi kâu at ae ba hnyok: mʼ öbun e he ka bi hwaban melen uma helâe. 21Ke hnyi tehi a bân, hnyi bong a fotininy tehi, me öbun e he ka ânyâ paseka, seven je bonginy bijeû; kʼ adre me he ka han areto adre ca levenâ.
22Ke hnyi bong eling ame he than ka penapena hobi kâu bi, ke hobi kâu tavat hia aten hnyei, bolok hnân hudiny hulo. 23Ke haba hnyi je bong a seven hnyi bijeû, me e ame he ka penapena hudiny leû hnyi je bong hobi kö Iehova, a seven ta bolok, ke seven ta mamoe baga ae ba hnyikongon hnyi ta bong a seven; ke ûsa khaca got baga hnyi ke bong me ke bong hnân hudiny hulo. 24Ke e ame he ka penapena hudiny han, khaca efa hobi kâu bolok, ke khaca efa hobi kâu mamoe baga, ke khaca hin wakaco hobi kâu efa. 25Hnyi tehi a seveniny, hnyi bong a fiftininy tehi, hnyi bijeû e ame he ka ânyâ helâ me hnyi je bong a seven; hoton hudiny hulo, me hudiny leû, me hudiny han, me hoton wakaco.
Currently Selected:
Ezekiela 45: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
