Ezekiela 43
43
1HWABAN dö e, me e ame hum nya ka hnyi homagöule, wale homagöule e jimeyö: 2ke wâ bi ame o but hmanenanginy Khongu Isaraela ûheny jimeyö: ke haba hwan helâ me hwan ta je köiö: ke ame hadröngöc hmeledrany ge hmanenanginy. 3Ke haba imaneniny, me helâ me imaneniny oge me wâ, waleji oge wâ hnyi ioik he ka ohia taun; ke haba je hna omanenâ me helâ me hna omanenâ waleji oge wâ hnyi wagewe Kebara: me oge me ta hnyikânâi. 4Ke haba hmanenangi Iehova ame didro hnyin uma a gethen hnyi homagöule e jimeyö. 5Ke haba hanu ame köp nya göranyai, me hum nya ka hnyi hnyeule eiö hnyin; ke wâ bi ame unöngötö uma ge hmanenangi Iehova. 6Ke oge me long ke at ame fuc könya ûnyi hnyi hnyin uma; ke ame tha tot mönya at. 7Ke e ame ha könya, ka habe, Nokon at lö, walang hnen anyik theron, me hnen li hnyeûcak, wale oge me he ka laba hnyin unyin je lakon Isaraela nyiela balua: ke ame ca he hmetu lap anyi Isaraela ka okongoâ iök ae kap, ödra, me latuhödra, hnen anyidra bi ûnyi monu, me hnen unyin latuhödra ae mok hnyi anyidra je dok ae gorany; 8me hnyi hnödra hna ip baten hwanumödra hnyi baten hwanumök, me uthwanumödra hnyi baten uthwanumök me ba hnyigöulök mödra, ke hna up hak veto thibi; ke adre hia but okongoâ iök ae kap ge anyidra ta je ûnyi ae ikiki waleji adre me ânyâ; anyin a wale oge hia but ohiʼ ödra hnyi anyik hmönyin. 9Walang ang, e so adre me degec sâkâû ai gak, anyidra bi ûnyi monu, me je unyin latuhödra ae mok, ke oge me he ka laba unyidra nyiele balua.
10Nokon at lö, hamâm he ka omanenâ uma ka lap anyi Isaraela mʼ adre me he ka hmehma ge hwakecidra ae kong: ke hnʼ ödra bi he ka tuluto tulut. 11Ke adre me ne he bi ka hmehma ge hnödra hia je hna ânyâ, me omanenâ thö kodra tulutiny uma, me bongon, me je gethen hnân didrut me didro, me ta je tulutiny hia, me ta je hna hûna gan, me ta je bongon, ke sihnalimen ju e hnyi hnyimakodra: mʼ adre me he ka tuö je tulutiny hia, me je hna hûna gan hia, me ânyâ. 12Walang hnanyibuiny uma: haba hnyi ban bucen, me ame he bi ka ti kap hnen e hia igigilo. Wâ bi, wale thibi e hnanyibuiny uma.
13Ke walang tulutiny taben hut ge je kubit: (haba kubit, me khaca kubit me hnyam:) a khaca kubit hnyi hnyin, ke khaca kubit ûlauen, ke hâhâ baten e igigilo, me khaca hnyam: me ame he ka bi taben e hnân taben bi hut. 14Ke haba hwân hnyi hnyin, eû hnyi kânâ, ke ne o but hnyi dok ame silöû eû, me lo li kubit, ke khaca kubit ûlauen; ke hwân hnyi dok ame silöû wale ae ûhnyûkong ke ne o but hnyi dok ae silöû wale ae gan, me vak ta kubit, ke khaca kubit ûlauen. 15Ke vak ta kubit taben hut göranyai: ke hwân hnyi hnabadröuiny taben hut ke ethö, me ame he ka hu vak ta baitoiny. 16Ke haba hnabadröuiny taben hut, me ame he ka twelv kubit ibeûen, ke twelv ûlauen, ke khaca thibi tulutiny je ke keihen a vak. 17Ke haba dok ame silöû me ame he ka fotin kubit ibeûen, ke fotin ûlauen hnyi je ke keihen a vak; ke haba baten igigilo e, me ame he ka haf kubit; ke khaca kubit hnyin e igigilo; ke haba wacûatiny, me ame he ka hnyimakan deiö.
18Ke e ame ha könya, ka habe, Nokon at lö, Walang hna ha hnen Than Iehova, ka habe, Wale je hnanyibuiny taben hut hnyi bong adre me he ka tibet e hnyin, hnân hudo hnyin e je hudiny leû, me dukâiâ dra ka hnyi hon. 19Ke u me he ka ham nak bolok hnân hudiny hulo, ka tavat bihut a at Levi je mâtrâni Zadoka, tavat adre me hakekeny könya, haingen Than Iehova. 20Ke u me he ka hom hanen dren e, me kina hon vak ta baitoiny, me hon vak ta kopiny dok ame silöû, me hon baten igigilo: helâe u me he ka obosoâ e me bi hwaban anyin möt. 21U me he ka hom minya bolok hudiny hulo, ke e ame he ka thong degecâ e hnyi dok adre kû hnyi uma, hoton dok ae kap. 22Ke haba hnyi bong a loiny u me he ka hudo got baga ae ba hnyikongon hnân hudiny hulo; ke adre me he ka obosoâ taben hut, helâ me hna obosoâ e ge bolok. 23Ke u ka hia but obosoâ e, u me he ka hudo nak bolok ae ba hnyikongon, me mamoe baga ae ba hnyikongon ûnyi hnyi hnahat meno. 24Ke u me he ka ûhakekenyi ödru hnyi hnyimakö Iehova, ke ame he tavat bihut ka khûö sâlt hudru, ke adre me he ka hudi ödru kö Iehova hnân hudiny leû. 25Seven je bong u me he ka penapena got hnân hudiny hulo ke bong me ka bong: ke adre me he minya ka penapena nak bolok me mamoe baga ûnyi hnyi hna hat meno, ae ba hnyikongon. 26Seven je bong adre me he ka bi hwaban möt anyin taben hut, me obosoâ; adre me he ka okabâ e helâe. 27Ke at ka hia but ohwâdâ je bong, ke hwân hnyi bong a eitiny ke ne o but nyiele, me ame he tavat bihut ka hudo hon taben hut anyibun je hudiny leû, me anyibun je hudiny ûsoköu; ke oge me he ka köp öbun haingen Than Iehova.
Currently Selected:
Ezekiela 43: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
