Ezekiela 42
42
1ME e ame hum nya ka hnyi hnyeule eû, hnyi gethen ka hnyi hwadro: me e ame hum nya ka hnyi hnyeule cicö wanben, ke e cicö hna up uma ame hnyimakan ka hnyi hwadro. 2Cicö ibeûen a wan haded je kubit, ke fifte kubit ûlauen, e bi hwanuma ka hnyi hwadro. 3Cicö dok a twente kubit a hanen hnyeule eiö, ke cicö hna bi hak veto a hanen hnyeule eû, e bi ke deö hnyeule ethö gorany cicö ke deö hnyeule, a kun ta deö hnyeule ethö gorany. 4Ke cicö je hnyeule hna ngenu, ten je kubit ûlauen eiö hnyin, ke gethen a khaca kubit; ke ame hnyimakan ka hnyi hwadro je hwanumen. 5Ke okhulit je hnyeule ethö hon: anyin adre oûhnyûkongoâ ge je deö hnyeule ethö gorany hon deö hnyeule hnyi wanben, me hnyikânâ, hnyi hna up veten uma. 6Anyin a kun ta deö hnyeule, ke ba je hmolominy helâ me je hmolominy je hnyeule: anyin a wale adre me oûhnyûkongoâ at ethö gorany hon at hnyikânâi me at hnyi wanben, hwân hnyikânâ ke ne o but ethö gorany. 7Ke haba hna up hak veto eû hnyou, hnyi baten je hnyeule, a cicö hnyeule eû, hnyi hnyimakan je hnyeule, me fifte kubit ibeûen e. 8Anyin a haba ibeûen je hnyeulen hnyi hnyeule eû, me fifte je kubit: ke wâ bi, wan haded je kubit hnyi hnyimakan uma kap. 9Ke eû hmelen je hnyeule eling gethen adre me dit hnyin jimeyö, wale at ka dit ka hnyin ûheny hnyi hnyeule eû. 10E hu je hnyeule hnyi ûhakiny hna up veten hnyeule e deiö, cicö wanben, ke cicö hna up uma. 11Ke haba gethen hnyi hnyimakan e, me helâ me getheniny je hnyeule ka hnyi hwadrö; haba ibeûen me tha ûcû me ûlauen: ke haba je gethen hia me hoton khaca bongon, me je hwanuma. 12Ke helâ me je hwanumen je hnyeule ka hnyi hwaiöu, me e hu hwanuma hnyi hna hwân gethen, wale gethen cicö hna up hak veto e deiö, a gethen hnân dit ka hnyi je hnyeule. 13Me e ame ha könya, ka habe, Haba je hnyeule ka hnyi hwadrö, ke je hnyeule ka hnyi hwaiöu cicö wanben, me wale je hnyeule ae kap, wale dok ame he tavat bihut ka an hnyin ta je ûnyi ae ti kap, a tavat adre me hakekeny kö Iehova: ke adre me he ka ip eling je ûnyi ae ti kap, me hudiny han, me hudiny hulo, me hudiny monu; anyin a dok e ae kap. 14E ka didro tavat bihut, me ödrin e ca he ka dit ûnyi hnyi dok ae kap ka hnyi hnyeule eû, ke ödrin e he ka mē ip eling je khaûödrin, wale ödrin e huliwa kâu; anyin ae kap ta je ûnyi e: ke ödrin e he ka khavâ ke je ûkhaû, mʼ ödrin e he ka ûhakekenyâ ta je ûnyi anyin tavat.
15Ke e ka hia but tuluto uma eiö hnyin, me e ame hum nya kâû a gethen deny homagöule e deiö, me tuluto e igigilo. 16E ame tuluto ke keihen e jimeyö ge hlowe tulut, a faiv haded je hlowe, hoton hlowe tulut igigilö. 17E ame tuluto ke keihen ka hnyi hwadrö, a faiv haded je hlowe, hoton hlowe tulut igigilö. 18E ame tuluto ke keihen ka hnyi hwaiöu, faiv haded je hlowe, hoton hlowe tulut. 19E ame hwio ka hnyi ke keihen ka hnyi jimeû, me tuluto faiv haded je hlowe hoton tulut hlowe. 20E ame tuluto e hnyi vak ta ke keihen: ke e hu hak veto adre op e igigilo, faiv haded ibeûen, ke faiv haded ûlauen, me me hu hnyigöulen dok ae kap me dok ca kap.
Currently Selected:
Ezekiela 42: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
