Ezekiela 41
41
1ME e ame hum nya ka hnyi uma kap, me tuluto ta je utkhetepiny, siks je kubit ûlauen hnyi ke keihen, ke siks je kubit ûlauen hnyi ke keihen, wale ûlauen uma mano. 2Ke haba ûlauen hwanuma, me ten je kubit; ke haba li baten hwanuma, me faiv je kubit hnyi ke keihen, ke faiv je kubit hnyi ke keihen: ke e ame tuluto ibeûen e, me fâte je kubit, ke haba ûlauen, me twente kubit. 3Me e ame didro ka hnyin me tuluto uthwanuma, me ûsa lo li kubit: ke haba hwanuma me siks je kubit, ke haba ûlauen hwanuma me seven je kubit. 4Ke e ame tuluto ibeûen e, me twente je kubit, ke twente kubit ûlauen, hnyi hnyimakan uma kap: ke haingen könya, ka habe, Walang dok ae ti kap. 5Me e ame tuluto hnyeigeuma, me siks je kubit; ke haba ûlauen je hnyeule hnyi baten me ûsa vak ta kubit igigilo hnyi je ke keihen hia. 6Ke haba je hnyeule hnyi baten uma me kun ta deö, khaca hon khaca, me thote hna ip gaga, ke adre me dit hnyin hna up veto a hanen hnyeigeuma hnân je hnyeule hnyi baten uma, mʼ adre me ohmâ hnyin ke adre me ca ohmâ hnyi hnyeigeuma. 7Ke lau tot ta je hnyeule wale khaca hon khaca igigilo uma; anyin adre me igigilo gaga uma, khaca ethö hon khaca: anyin a wale ame lau tot uma göranyai; ke helâe adre me ölö hwân hnyi hnyeule hnyikânâi ke ne o but hnyi hnyeule ethö a deny hnyeule hnyi wanben. 8Ke oge me wâ minya a gʼ adre ogöranyâ taben uma igigilo: haba taben je hnyeule hnyi baten, me khaca hlowe ae bekhot wale siks je kubit ae gan. 9Haba ûhakiny hna up veto hobi kâu je hnyeule hnyi baten eû hnyou, me faiv je kubit: ke haba kolon adre ip hobi kâu je hnyeule hnyi baten a hanen uma. 10Ke haba ûlauen wanben je hnyeule, me twente je kubit igigilo uma hnyi je ke keihen. 11Ke haba je hwanumen je hnyeule, me ame hnyimen ka hnyi kolon adre ip, khaca hwanuma ame hnyimen ka hnyi hwadro, ke ke hwanuma ame hnyimen ka hnyi hwaiöu: ke haba ûlauen kolon adre me ip, me faiv je kubit igigilo. 12Ke haba hna up uma cicö wanben hnyi ke keihen e jio, me sevente kubit ûlauen; ke haba ûhakiny hna up veten uma, me faiv je kubit igigilo, ke nainte kubit ibeûen e. 13Me e ame tuluto uma, me wan haded kubit ibeûen e; ke haba wanben ke uma, ke hna up veten e, me wan haded je kubit; 14ke haba ûlauen hnyimakan uma, ke wanben e deiö, me wan haded je kubit. 15Ke e ame tuluto ûlauen hna up uma hnyi hnyimakan ke uma wale hnyi hoton e, me je hnyeule gorany hnyi ke keihen, me ke keihen, me wan haded je kubit; me uma kap eiö, me je poretikoiny hnyeule; 16me li bahebetiny hwanuma, me je mamalama adre me hlöng, me je deö hnyeule ethö gorany a je deö a kun, cicö hwanuma adre me tube ge eso ethö igigilo, me hwân hnyi kânâ ke ne o but hnyi je mamalama; kʼ adre me hlöng je mamalama; 17ke ne o but hnyi hon hwanuma, me uma eiö hnyin, me hnyou, me hna up veto hia igigilo eiö me hnyou, ge je tulut. 18Ke adre me bi kerubi me je pama; ke e hu pama wanben ke kerubi me ke kerubi, ke ûsa lo hnyimakan je kerubi; 19me me hu hnyimakan at cicö pama hnyi ke keihen, me hnyimakan nak liona cicö pama hnyi ke keihen: adre ânyâ helâe uma hia igigilo. 20Hwân hnyi kânâ ke ne o but ethö hon hwanuma adre ânyâ je kerubi me je pama hnyi hna up veten uma. 21E ûcû thibi vak ta ke keihen li uthwanumen uma kap; ke haba hnyimakan dok ae kap, e tha ûcû bongon me bongon uma kap. 22Haba taben hut, me utö, ke kun ta kubit ibeûen göranyai, ke lo li kubit ibeûen e; ke utö je kopiny a vak, me taben, me je ke keihen: ke e ame ha könya, ka habe, Walang laulau a e hnyi hnyimakö Iehova. 23Ke ûsa lo li hwanumen uma kap, me dok ae kap. 24Ke ûsa lo li hlinginy li hwanuma, adre me khong veseâ; lo hobi kâu ke hwanuma, ke lo li hlinginy hobi kâu khaca. 25Ke adre ânyâ hnyin, wale hnyin li hlinginy uma kap, je kerubi me je pama, helâji me hna ânyâ hnyin hna up veto; ke e hu je esö ae haki hnyi hnyimakan poretiko hnyou. 26Ke e je mamalama adre hlöng me je pama hnyi ke keihen, hnyi baten poretiko: ame helâe je deö hnyeule hnyi baten uma, me je eso ae haki.
Currently Selected:
Ezekiela 41: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
