Ezekiela 39
39
1KE haba u, nokon at, perofeta thö ûcon Gog me ha, ka habe, Walang hna ha hnen Than Iehova, ka habe, Wâ bi, ûcûk u Gog lö, tuhan Rosha, me Meseka, me Tubala: 2ke oge me he ka ohmetu u, me lili u, me oi u ûhem hnyi hwadro hmönyin; ke oge me he ka hum u ka hnyi je bucen Isaraela: 3ke oge me he ka kot degecâ ânyâm cafana ûnyi hnyi hnyamâm a mem, me okolo ânyâm je fana ûnyi hnyi hnyamâm a metâm. 4Û me he bi ka ta hnyi je bucen Isaraela, u, ke ânyâm je deö vat hia, me ta je hnyei unyâm: oge me he ka hnö u ka ta je meno ame gâ a ödra behan, me menoiny hnyot he ka an. 5U me he ka ta hnyi ta hnyei: anyin oge hia but ha, haingen Than Iehova. 6Ke oge me he ka kunâ meic kö Magog, me ka tavat adre me laba khotkic hnyi je bomene: me adre me he ka wâ a inya Iehova. 7Ke oge me he ka omanenâ iök ae kap hnyi wanben ik hnyei a Isaraela; ke oge me ca hnʼ ödra hmetu he ka haikongoâ iök ae kap: ke ame he je hnyei ka wâ a inya Iehova a kabi Isaraela. 8Wâ bi, ame o but, kʼ ame he ka hwâdâ but, hangen Than Iehova; walang bong waleji oge ha. 9Ke ame he tavat adre me labâ je taun Isaraela ka hû meic, me thong degecâ je ûnyi hnân vat, wale je bec, me je bec ae gan, je cafana me fana, me je ong ö, me je ö, ke adre me he ka thong degecâ ge meic hnyi seven je huna: 10mʼ adre me ca he ka thigö hnyi hnyei, me si utö hnyi hnyot; anyin adre me he ka bi meic ge ta je ûnyi hnân vat: ke adre me he ka söh tavat waleji adre me sei ödra, me hûgûnâ ûnyi ge tavat adre me hûgûnâ gadra, haingen Than Iohova.
11Ke haba hnyi bong eling, oge me he ka hna kö Gog ke dok hnân khon komok hnyi Isaraela, wale hnyigöulen bucen anyin tavat adre me he hnyi ke keihen e deiö hnyi köiö: ke ame he ka hlöng gethen ka tavat adre me he: ke adre me he ka konim Gog me anyin je deö vat hia eling: ke adre me he ka hwenyi ien e Hnyigöulen bucen Hamona-gog. 12Ke seven je tehi ame he lap anyi Isaraela ka labö konim ödra, mʼ adre me obosoâ hnyei. 13Eke, ame he tavat hia thithö hnyi hnyei ka hnyi konim ödra; ke ame he ka hnân olungi ödra hnyi bong adre me oganö nya hnyin, haingen Than Iehova. 14Ke adre me he ka ûca tavat he ka huliwa hmâ he ka vheno hnyei mʼ adre me konâm tavat adre me he, a je kolon hon kânâ, he ka obosoâ e: ke e ka um dö je tehi a seven, adre me he ka elâm. 15Ke haba at ame vheno hnyei ame he ka he hnyin; ke at ka wâ jeien komok, e ame he ka otilâ haten hnyin e, ke ne o but adre hia but konâm e hnen tavat adre me konâm hnyi hnyigöulen bucen a Hamona-gog. 16Ke adre me he minya ka hwenyi ien ke taun, ka habe, Hamona. Helâe adre me he ka obosoâ hnyei.
17Ke haba u, nokon at lö, walang hna ha hnen Than Iehova, ka habe, Ha thö ka je meno hia ame gâ, me je menoiny hnyot hia, ka habe, Ûkhacaköu thö, ke ai öbun; ûkhacaköu ûhebun hnyi je ke keihen hia ka hnyi anyik hut wale oge me hudo hobi köbun, a hut ae gan hmâ walethö hon je bucen Isaraela, mʼ öbun e he ka an utiö me ijem dra. 18Ke öbun e he ka an utioiny tavat ae hwege, ke ijem dren je taben eang hmelen, ke je mamoe baga, me je nokon mamoe, me je got, me je bolok, a je meno hia ae pipikhenya ûnyi hnyi Basana. 19Ke öbun e he ka an pipikhenya me sekubun, me ijem dra me monu but, ûnyi hnyi anyik je hut oge hia but hudo hobi köbun. 20Ke öbun e he ka sekon hnyi anyik laulau ge je hors me je kariota, me tavat hwege, me tavat vat hia, haingen Than Iehova. 21Ke oge me he ka ip anyik hmanenang hnyi ta je hnyei, kʼ ame he je hnyei hia ka wâ hnok hna owisa waleji oge me ânyâ, me hnyamok waleji oge me ip hudra. 22Me ame he lap anyi Isaraela ka wâ a inya Khongudrin, hwân hnyi bong eling ke ne o but nyiele. 23Me ame he ka manen ka ta je hnyei a gʼ adre hwenbâ lap anyi Isaraela can anyidra hulo; can adre me ânyâ hwakecin ae kong könya, me oge me ikhâlâ hnyimakök gadra: me oge me hnʼ ödra ka hnyi hnyamen je iwahnaihmiony mödra, mʼ adre me ta hia but ge hele vat. 24Oge me ânyâ kodra hoton anyidra bo kong, me hnödra hna hanyâûâ; me oge me ikhâlâ hnyimakök gadra.
25Anyin a wale, walang hna ha hnen Than Iehova, ka habe, Oge me he walang ang ka ohmetu Jekob ûheny hnyi hna bâ, me betenge hia ge lap anyi Isaraela; me oge me he bi nya ka ciâ can iök ae kap. 26Ke adre me he ka vheno anyidra hmehma, ke hwakecidra ae kong waleji adre me ânyâ könya, ödra ka he ka Aba hnahic hnyi idra hnyei, ke ba at ame he ka ootʼ ödra; 27ke iny ka hia but ohmetu ödra ûhedra hnyi je hnyei, me ûkhacaköu ödra ûhedra hnyi je hnyei iny je iwahnaihmiony mödra, ke iny kap ut gadra hnyi hnyimakan je hnyei ae se hia. 28Me adre me he ka wâ a inya Iehova Khongudrin, anyin oge me kunʼ ödra ka bâ hnyi je hnyei, ke oge hia but ûkhacaköu ödra ka hnyi idra bi; ke oge me ca he hmetu ka hna degecâ ke at gadra nyiele; 29ke oge me ca he hmetu ka ikhâlâ hnyimakök gadra: anyin oge hia but hingâlâ hanuk hon lap anyi Isaraela, haingen Than Iehova.
Currently Selected:
Ezekiela 39: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
