Ezekiela 37

1KE ame o but huk hnyamö Iehova, ke e ame hum nya hnyi hanu Iehova, me ip nya hnyi wanben hnyigöulen bucen; ke e unöngöt ge je jö; 2ke e ame hum nya eling igigilo, ke wâ bi, e ti se hia je jö eû hnyi hnyigöulen bucen; ke wâ bi e ti löulöu but je jö. 3Ke e ame ha könya, ka habe, Nokon at lö, hawa, e khana je jö eling he ka möt? Me haingök, ka habe, Than Iehova lö, e manen köu. 4Ke e ame ha minya könya, ka habe, Perofeta thö hon je jö ejo, me ha kodra, ka habe, Je jö ae löulöu but lö, long ju hofuc ho Iehova. 5Walang hna ha hnen Than Iehova ka je jö ang, ka habe, Wâ bi oge me he ka odilâ homenâ ka hnyi je hnyibun mʼ öbun e he ka möt dö. 6Ke oge me he ka ip je toiny unyibun, me bi vibun, me lan öbun ge unen, me odilâ homenâ hnyi hnyibun, mʼ öbun e he bi ka möt; me öbun e he ka wâ a inya Iehova. 7Me oge me perofeta helâ me hna hûna könya: ke oge me tiga perofeta, me e hu mede, ke wâ bi hwiöi, me ame ûheköu ta je jö, a ke jö ka ke jö. 8Ke inya oge me wâ, me wâ bi, e hu gadra ta je tö, kʼ ame kû viny, kʼ ame lan bi e ge unen: ke ba homenâ eû hnyidra. 9Me e ame ha könya, ka habe, Nokon at lö, perefota thö ka ang, perofeta thö me ba ka ang, ka habe, Walang hna ha hnen Than Iehova, ha habe, Homenâ lö, aiö u ûnyi hnyi je ang a vak, me menâ ka hnyi hon je hna hlingâ ejo, mʼ ödrin e he ka möt bi. 10Me oge me perofeta helâ me hnen hna hûna könya, me ame dit hnyi hnyidrin homenâ, mʼ ödrin e möt dö, mʼ adre me tot ge cadra, a utbavat ae gan hmâ hmonyin. 11Me e ame ha könya, ka habe, Nokon at lö, haba je jö eling, me wale lap anyi Isaraela hia: wâ bi, adre me ha, ka habe, E löulöu but je jeiöhmun, ke hia but anyihmun geju; kʼ adre hia but subâ degeci ohmun. 12Anyin a wale, perofeta thö me ha kodra, ka habe, Lakeik lö, wâ bi, oge me he bi nya ka khong ta je hubun, me höi öbun ûnyi hnyi je hubun, haingen Than Iehova; ke oge me he ka hum öbun ka hnyi hnyei Isaraela. 13Me öbun e he ka wâ a inya Iehova, lakeik lö, iny ka hia but khong je hubun, me höi öbun ûnyi hnyi je hubun. 14Ke oge me he ka ip hanûk eû hnyi hnyibun, ke öbun e he ka möt, ke oge me he ka ip öbun hnyi ibun hnyei: me öbun e he ka wâ a inya Iehova at ame ha e, me ânyâ e, haingö Iehova.

15Ke ame o minya könya hofuc ho Iehova ame ha, ka habe, 16Nokon at lö, hom dö ke ong utö, me sihnalimen hon e, ka habe, Hnân hobi kâu Juda, me lakon Isaraela a je lahanen: ke u ma hom dö ke ong utö minya me sihnalimen hon e, ka habe, Hnân hobi hâu Iosefa, ong utö anyin Eferaima, me hobi kâu lap anyi Isaraela a je lahanen: 17ke ûhûjaköuâju me me khaca thibi utö, mʼ ödra me khaca thibi hnyi hnyamâm. 18Ke e ka ha köu lakon em hnyei, ka habe, Hawa, u me ca he ka omanenâ kohmun bongon ta je unyi et 19me u me he ka ha kodra, ka habe. Walang hna ha hnen Than Iehova, ka habe, Wâ bi oge me he ka hom ong utö anyin Josefa a e hnyi hnyamen Eferaima, me je tribu Isaraela a lahanen; ke oge me he ka tha ip mē, wale ong utö anyin Juda, me wia me me khaca thibi utö, ke adre me he ka khaca hnyi hnyamok. 20Ke haba li ong utö waleji u je sihnalimen hon me ame he ka e hnyi hnyamâm hnyi hnyimakodra. 21Ke ha thö kodra, ka habe, Walang hna ha hnen Than Iehova, ka habe, Wâ bi, oge me he ka hom je lakon Isaraela ûnyi hnyi wanben je hnyei, wale adre me be ka hnyin, me ûkhacaköu ödra ûhedra e he, ke oge me he ka hum ödra ka hnyi idra hnyei: 22ke oge me he ka wiʼ ödra hnân hnyei a khaca hnyi kânâ, hnyi je bucen Isaraela: kʼ ame he than a khaca ka tuhödra hia: kʼ adre me ca he hmetu ka lo li hnyei, ke adre me ca he hmetu bi ka kia luâ me me lo li dokhu: 23ke adre me ca he hmetu bi ka kong ge anyidra je idola, me anyidra ta je ûnyi ae ikiki, me hnödra je hna hanyâûâ hia: ke oge me he ka omeli ödra ûnyi hnyi je hnyabadra hia waleji adre ânyâ monu hnyin, ke oge me he ka obosoi ödra: helâe adre me he ka lakeik, ke oge me he ka Khongudrin. 24Ke ame he Davita athnyabaik ka bi tuhödra; ke ame he ka khaca at ama tuhödra helâ me hnahat mamoe: kʼ adre me he ka vheno hnok je hna owisa, me tuö anyik je hnanyibu, me ânyâ. 25Me adre me he ka labâ hnyei waleji oge me ham kö Jekob athnyabaik, waleji a labâ ge lakamöbun; kʼ adre me he ka labâ e, ödra, me lakudra, me laöbidra nyiele balua: kʼ ame he Davita athnyabaik ka tuhödra nyiele balua. 26Ke oge me he ka ânyâ mʼ ödra ûhihinyköu ûsoköu: me ûhihinyköu a nyiele balua mʼ ödra: me oge me he ka ti ödra, me osehiʼ ödra, me ip unyidra anyik dok ae kap nyiele balua. 27Me ame he ka laba unyidra umök uma mano; ke oge me he ka Khongudrin, kʼ adre me he ka lakeik. 28Me ame he je hnyei ka wâ a inya Iehova at ame okabi Isaraela, e ka e bi unyidra anyik dok ae kap nyiele balua.

Currently Selected:

Ezekiela 37: IAAI

Highlight

Copy