Ezekiela 36

1KE haba u, nokon at lö, perofeta thö ka je buceniny Isaraela, me ha, ka habe, Je buceniny Isaraela lö, long ju hofuc ho Iehova. 2Walang hna ha hnen Than Iehova, ka habe, Anyin a iwahnaihmiony ame hia but ha gam, ka habe, Öhö! ihmun dut je dok ae gorany a je dok kâû adrem: 3anyin a wale perofeta thö, me ha, ka habe, Walang hna ha hnen Than Iehova, ka habe, Can, anyin adre me oba wan gabun, ke ön öbun hnyi je ke keihen gabun, mʼ öbun e iny je kolon ta je hnyei, ke adre me hai öbun hnen tavat fufuc, kʼ adre me haikongu öbun hnen tavat: 4anyin a wale, öbun je buceniny Isaraela lö, long ju hofuc hwan Than Iehova, ka habe, walang hna ha hnen Than Iehova ka ta je bucen me ta je hut me je deny köiö, me je hnyigöulen bucen, me je hnyebuba ae ba aten, me je taun adre me hna degecâ, wale a hnân söh me oû hnen kolon ta je hnyei igigilo: 5anyin a wale, walang hna ha hnen Than Iehova, ka habe, Haba hnyi meiciny anyik ciâ oge hia but ha ka je kolon je hnyei, me ka Edoma hia, waleji adre hom ik hnyei me me idra a hnyi senyin hnyok ae bekhot, me hnyi hûkhötiâ hnen oûnykûm, he ka hna degecâ e hnân söh: 6anyin a wale perofeta thö ka hnyei Isaraela, me ha ka je bucen me je hut, me je deny köiö me je hnyigöulen ta je bucen, ka habe, Walang hna ha hnen Than Iehova, ka habe, Wâ bi, inya oge hia but ha hnyi anyik ciâ, me anyik hmönyin, anyin ame hihmehmʼ öbun ta je hnyei; 7anyin a wale, walang hna ha hnen Than Iehova, ka habe, Oge hia but hai hnyamok, haingök, E hnathu ame he je hnyei igigili öbun ka hmehma ka unyi gadra bi. 8Ke haba öbun, je bucen Isaraela lö, ame he ka vhei anyibun ta je anginy, me wa hobi kâu lakeik a Isaraela; anyin a ödra hakekeny jut he ka o. 9Anyin a wâ bi, inya oge me tha e möbun, ke oge me he ka hwio köbun, ke adre me he ka trohnen me belöki öbun: 10ke oge me he ka osehia tavat unyibun, lap hia anyi Isaraela, wale hia thibut: ke adre me he ka labâ je taun, me op je dok ae ba wan: 11ke oge me he ka osehia tavat me meno unyibun; ke adre me he ka osehia me si: ke oge me he ka olabʼ öbun helâ me bongubun ehac, me ânyâ gan hmâ so köbun hon ehac a bânʼ me öbun e he ka wâ a inya Iehova. 12Eke, oge me he ka ovheno tavat hubun, wale lakeik a Isaraela; ke adre me he ka hum u me idra, ke u me he ka hnân jekhoûdra, ke u me ca he hmetu ka oba lakudra. 13Walang hna ha hnen Than Iehova, ka habe, Anyin adre me ha köbun, ka habe, U bi hnyei, at ame an tavat me oba lakon hnyei; 14anyin a wale u me ca he hmetu ka an tavat, me öba lakon em hnyei, haingen Than Iehova; 15ke oge me ca he hmetu ka ha gam hmehma anyin ta je hnyei, ke ame ca he hmetu je hnyei ka haikongu u, ke u me ca he hmetu ka othöâ em hnyei, haingen Than Iehova.

16Ke ame o but minya könya hofuc ho Iehova ame ha, ka habe, 17Nokon at lö, hnyi ûen waleji ame laba at Isaraela hnyi idra hnyei, me adre me okongoâ ge hwakecidra me hnödra hna ânyâ: haba hwakecidra hnyi hnyimakök me helâ me ûkonginy momo ame hom bongon omomo. 18Anyin a wale oge me hingâlâ anyik hmönyin hudra, can dra adre hia but hingâlâ hon kânâ, ke can adre me okongoâ e hnen khongudrin je khong: 19me oge me ovesei ödra unyin ta je hnyei, me adre me obʼ ödra unyin tavat: ke oge me bi hwaban kodra hoton hwakecidra ke hnödra je hna ânyâ. 20Ke hnyi ûen adre me o ka hnyi je hnyei, waleji adre me he ka hnyin, me adre me okongoâ iök ae kap; anyin ame ha tavat gadra, ka habe, Ta je atö Iehova ang, kʼ adre me he but ûhedra hnyi iny hnyei. 21Ke so bi oge me betenge, can iök ae kap waleji ame haikongoâ hnen lap anyi Isaraela unyin ta je hnyei, a je hnyei adre me he ka hnyin. 22Anyin a wale ha thö ka lap anyi Isaraela, ka habe, Walang hna ha hnen Than Iehova, ka habe, Lap anyi Isaraela lö, oge me ca ânyâ e can öbun, ke so bi can iök ae kap, waleji öbun e hia but haikongoâ hnyi ta je hnyei, waleji öbun e he ka hnyin. 23Ke oge me he ka okabâ iök ae gan, waleji adre me haikongoâ unyin ta je hnyei, wale öbun e hia but haikongoâ hnyi wanbödra; me ame he je hnyei ka wâ a inya Iehova, iny ka okabi nya bi gabun hnyi hnyimaköbun, haingen Than Iehova. 24Anyin a oge me he ka hum öbun unyin tavat, me ûkhacaköu öbun ûnyi hnyi je hnyei hia, me hum öbun ka hnyi ibun. 25Ke oge me he ka dukâiʼ öbun ge köiö ae alai mʼ öbun e he ka kalaöt ut: ke oge me he ka obosoi öbun ûnyi hnyi hwakecibun ae ikiki hia, me khongubun je khong hia. 26Ke oge me he bi minya ka ham köbun hnyok ae teb ûnyi, me ip hanu ae teb ûnyi eû hnyibun; ke oge me he ka hom hnyok ae veto ûnyi hnyi je unyibun, ke oge me he ka ham köbun hnyok ae utiö. 27Ke oge me he ka ip hanuk eû hnyibun, me wi öbun he ka vheno anyik je hnanyibu, mʼ öbun e he ka tuö hnok je hna owisa, me ânyâ. 28Me öbun e he ka laba hnyi hnyei waleji oge me ham ka lakamöbun; ke öbun e he ka lakeik, ke oge me he ka Khongubun. 29Ke oge me he ka omeli öbun ûnyi hnyi hwakecibun ae ikiki hia: ke oge me he ka hawa hwit, me osehia e, ke oge me ca he ka kunâ köbun hmiâ. 30Ke oge me he ka osehia ta je wan ûö, me jeûiny kânâ, mʼ adre me ca he hmetu ka haikongu öbun can hmiâ unyin ta je hnyei. 31Ke öbun e he ka ûnykûme ta je hwakecibun ae kong, me hnobun je hna ânyâ ae ca so; ke öbun e he ka hûköti öbun bi hnyi hnyimaköbun bi can anyibun ta je hulo me hwakecibun ae ikiki. 32Oge ca ânyâ e can öbun, e so öbun e tremângâ e, haingen Than Iehova: hamöbun he ka hmehma me hlohlo can ta je hwakecibun, lap anyi Isaraela. 33Walang hna ha hnen Than Iehova, ka habe, Haba hnyi bong oge me he ka okalaöti öbun ûnyi hnyi anyibun je hulo hia, me oge me he minya ka olabʼ öbun hnyi je taun, ke adre me he ka op je dok ae ba wan. 34Ke adre me he hmetu ka belökâ kânâ ae ba wan, ke so bi, e ba wan ehac hnyi hnyimakodra hia adre me he hnyin. 35Ke adre me he ka ha, ka habe, Haba hnyei ang waleji ae ba wan, me ûcû bi me hnyei Edena; ke adre up haginy me labâ je taun waleji ae ba wan, me ba aten, me ve ta ûnyi. 36Me ame he ka khana hnen je hnyei a je kolon igigili öbun, a inya Iehova at ame op hmetu je hnyaba adre hota degecâ, me belökâ je dok ae ba wan: inya Iehova at ame ha, ke oge me he ka ânyâ.

37Walang hna ha hnen Than Iehova, ka habe, Can ûnyi e, hamen lap anyi Isaraela he ka elâm unyik, he ka ânyâ hobi kodra; oge me he ka osehiʼ ödra helâ me hnahat mamoe. 38Âdre me he ka öunöngotâ je taun wale ae ba wan hnen ta je deö at, helâ me hnahat meno hobi kâu taben bi hut, ke helâ me hnahat meno hnyi Jerusalema hnyi je bijeû adre thu: me adre me he ka wâ a inya Iehova.

Currently Selected:

Ezekiela 36: IAAI

Highlight

Copy