Ezekiela 34
34
1KE ame o but könya hofuc ho Iehova ame ha, ka habe, 2Nokon at lö, perofeta thö ûcon tavat adre me tuö mamoe hnyi Isaraela, perefota thö, me ha kodra, wale ka tavat âdre me tuö memoe, ka habe, Walang hna ha hnen Than Iehova, ka habe, Ekölö ge tavat tuö mamoe hnyi Isaraela, wale tavat adre me ka ha ödra bi! hawa, ca hanymen bi tavat tuö mamoe he ka han hnahat mamoe? 3öbun e an je pipikhenya, ke khaûʼ öbun ge leûnen, ke hlingâ je at ae pipikhenya; ke so bi, öbun e ca han je mamoe. 4Öbun e ca hia but sihwegiâ ta je meno ae sënyin, ke omelo at ae mok, kʼ öbun e ca ujâ meno ae hmetru jein, kʼ öbun e ca ohmeto je hna obâ, kʼ öbun e ca elâm at ae hia; ke öbun e hia but musi ödra hwege me oveci ödra. 5Ke adre me ovesei ödra anyin ae ba at ame tuö: ke ame ön ödra thö ta je menoiny hnyot, kʼ adre me vese but. 6Haba halek je mamoe adre me he monu hon je bucen me je hut hia ae gorany: eke, ame vese thö halek ta je mamoe hon hmeledrany hia thithö; ke ba at ame elâm me hnö. 7Anyin a wale, öbun tavat tuö mamoe lö, long ju hofuc ho Iehova; 8Haingen Than Iehova, ka habe, Kia inya inya, anyin adre hia but söh hnok hnahat mamoe, ke ka an dut je menoiny hnyot hia halek je mamoe, anyin ae ba at ame tuö, ke adre me ca elâm hnok hnahat mamoe hnen tavat tuö halek je mamoe, ke haba tavat tuö mamoe adre me ka ha ödra bi, me ca han bi hnok hnahat mamoe; 9anyin a wale, öbun tavat tuö mamoe lö, long ju hofuc ho Iehova; 10Walang hna ha hnen Than Iehova, ka habe, Wâ bi, ûcûk tavat tuö mamoe; ke oge me he ka elâm hnok hnahat mamoe unyidra, me obʼ ödra mʼ adre me ca hān hmetu hnok hnahat mamoe; ke ame ca he hmetu tavat tuö mamoe ka ha ödra bi; ke oge me he ka hûgûnâ hnok hnahat mamoe ûnyi hnyi je hnyimödra bi, me me ca ö ʼdra hmetu. 11Ke walang hna ha hnen Than Iehova, ka habe, Wâ bi, hamök he ka elâm hnok hnahat mamoe me elelâm. 12Haba at tuö mamoe ame elam hnahat haleny hnyi ûen e ame tha e me hnahat haleny mamoe adre vese, helâe oge me he ka elâm halek hnahat mamoe, ke oge me he ka hum ödra ûnyi hnyi je dok hia waleji adre vese ka hnyin, hnyi bong ae khömet me menekholom. 13Ke oge me he ka su ödra ûheny unyin tavat, me ûkhacaköu ödra ûheny hnyi je hnyei, me hum ödra ka hnyi idra; ke oge me he ka ha ödra hon je bucen Isaraela, hnyi je deny köiö, me hnyi je ke keihen hnyei adre me labâ. 14Oge me he ka ha ödra hnyi je sajilat ae so, ke ame he ka hnen hagidra hon je bucen ae beû hnyi Isaraela: adre me he ka mokut eling hnyi hak ae so, me han hnyi sajilat ae hât hon je bucen Isaraela. 15Inya oge me he ka han halek hnahat mamoe, kʼ oge me he ka omokuli ödra, haingen Than Iehova. 16Oge me he ka elâm at ae hia, me ohmeto hna obâ me ce ujâ at ae hmetru jein, me ohwegiâ at ae sënyin, ke haba at ae pipikhenya ke at ae hwege, me oge me he ka ohia; kʼ oge me he ka ha ödra ge hna owisa. 17Ke haba öbun hnok hnahat mamoe lö, walang hna ha hnen Than Iehova, ka habe, Wâ bi, oge me owisa ke meno me ke meno, a je mamoe baga tha ödra me je got baga. 18Hawa, ûnyi ae ûhnyûkong köbun wale hnobun hna han hnyi sajilat ae so, me öbun e he minya ka utö bi ge cabun kolon anyibun sajilat? ke öbun e ijem je an ae alai, me ohâeâ bi kolon ge je cabun? 19Me haba halek mamoe, adre me an hnobun hna utö ge cabun, me ijem hnobun hna ohâeâ ge cabun.
20Anyin a wale, walang hna ha hnen Than Iehova, ka habe, hamök a walonya ang, he ka owisa je meno ae pipikhenya me je meno ae delâ. 21Anyin a öbun e hagutâ ge je vhak me je abeny, me kot tavat ae mok hia ge je faoibun, me öbun e ovesei ödra ehele; 22anyin a wale oge me he bi nya ka omelo hnok hnahat mamoe, kʼ adre me ca he hmetu ka sei ödra; kʼ oge me he ka owisa ke meno me ke meno. 23Ke oge me he ka otilâ hudra ke at tuö mamoe e khaca, me e ame he ka ba ödra, a athnyabaik Davita; ke hamen he ka ha ödra; ke e at tuö mamoe kodra. 24Ke inya Iehova Khongudrin, ke Davita athnyabaik tuhödra; inya Iehova at ame ha. 25Ke oge me he ka ânyâ ûhihinyköu ûsoköu mʼ ödrin, ke oge me he ka ohia ta je meno ae kong ûnyi hnyi hnyei: ke adre me he ka laba khotkic hnyi hnyebuba, ke mokut hnyin hnyi hnyot. 26Ke oge me he ka wiʼ ödra ke ta je dok igigili ödra, me me anyik hut ae hnahic; ke oge me he ka öta we hnyi ûen; kʼ ame he ka ta hnahic helâ me we. 27Ke ame he je ûöiny hnyei ka wa, kʼ ame he kânâ ka ham jeûiny, kʼ adre me he ka laba khotkic hnyi idra; me adre me he ka wâ a inya Iehova, iny ka hia but thu je venyâiny hna ûhûkâlaköu ödra, me omeli ödra ûnyi hnyi hnyamen tavat adre me thalu ödra. 28Ke adre me ca he hmetu ta je hnyei ka sei ödra, ke ame ca he ka ön ödra hnen ta je menoiny hnyot; ke adre me he ka laba khotkic, ke ba at ame he ka ooti ödra. 29Ke oge me he ka okûâ hobi kodra ke ûö ae lung, ke adre me ca he hmetu bi ka ohiʼ ödra ge hmiâ hnyi hnyei, ke ame ca he hmetu bi ta je hnyei ka ohmehmai ödra. 30Ke adre me he ka wâ a inya Iehova Khongudrin ame tha e mʼ ödra, ke haba ödra, wale lap anyi Isaraela, a je lakeik, haingen Than Iehova. 31Ke haba öbun halek je mamoe, je mamoeiny ta ik, öbun je at, ke inya Khongubun, haingen Than Iehova.
Currently Selected:
Ezekiela 34: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
