Ezekiela 30
30
1KE ame o but minya könya hofuc ho Iehova, ame ha, ka habe, 2Nokon at lö, perofeta thö, me ha, ka habe, Walang hna ha hnen Than Iehova, ka habe, Kuku tenge thʼ öbun, Ekölö ge bong! 3Anyin ae hakekeny jut bong, e hakekeny jut bong bongu Iehova, bong ae khömet; a ûen hobi kâu ta je hnyei. 4Ke ame he ka o hele vat hnyi Aigupito, kʼ ame he ka hu hloûhloû hnyi Aithiop, e ka ta but ta je komok hnyi Aigupito; ke adre me he ka hom aten ae se hia, ke adre me he ka thö je taben e. 5Ke ame he bi ka tha ta mödra ge hele vat at Aithiop, me Futa, me Luda, me tavat hia ae ve bongon, me Kubu, me tavat aten hnyei adre me ûhihinyköu.
6Walang hna ha hnö Iehova, ka habe, Ame he minya ka ta tavat adre me hadruâ Aigupito, ke ame he ka hnyikânâ biganiny maniny man, hwân hnyi tap tue hnyi Seveni, adre me he ka ta hnyi wanben e ge hele vat, haingen Than Iehova. 7Ke ame he ka wau idrin hnyi wanben je hnyei a wau, ke ame he je tauniny ka laba hnyi wanben je taun ae ba aten. 8Ke adre me he ka wâ a inya Iehova, iny ka hia but hu meic hnyi Aigupito, me kot hia tavat ûhadruo. 9Hnyi ûen eling ame he ka he but je ûthumetu ûheny unyik adre tabâ je hu he ka ootâ at Aithiop tavat adre me laba sot; ke adre me he ka hu vec helâ me je bonginy Aigupito; anyin a wâ bi, e but ang.
10Walang hna ha hnen Than Iehova, ka habe, Oge me he ka oumo tavat ae se hia hnyi Aigupito a deny hnyamö Nebukaneza than Babulona. 11Adre me he ka oâ e tha e me lakeiny, a oti ödra hnen je hnyei, he ka ohia hnyei; ke adre me he ka oc anyidra je hele vat ûcon Aigupito, me öunöngötâ hnyei ge je komok. 12Ke oge me he ka ohmö je wagewe, me ûco hnyei ka hnyi hnyamen tavat ae kong; ke oge me he ka oba wan hnyei, me ta je ûnyi hia hnyin ge hnyamen je atkanyua: inya Iehova at ame ha.
13Walang hna ha hnen Than Iehova, ka habe, Oge me he minya ka ohia je khong, me bi obiny je idola hnyi Nofi: ke ame ca he hmetu ka hu thaniny hnyei Aigupito; ke oge me he ka okûâ ot hnyi hnyei Aigupito. 14Ke oge me he ka oba wan Patherusi me hû meic hnyi Zoana, me bi hwaban ka No. 15Ke oge me he ka hingâlâ anyik hmonyin hon Sina, wale singiny Aigupito; ke oge me he ka subâ degecâ tavat ae se hia hnyi No. 16Ke oge me he ka hû meic hnyi Aigupito; ame he ka vec gan hmâ Sina, ke adre me he ka thuthu hmetro No: kʼ ame he ka hu je iwahnaimiöny me Nofi hnyi selany. 17Ame he ka ta wahidrouiny Aven me Pibeseth ge hele vat: kʼ ame he ka bâ je hnyei eling. 18Ke ame he ka olidrâ lany hnyi Tapanesi, iny ka he ka thamuâ eling je hna ûhûkâlâköuâ anyin Aigupito, ke ame he ka o obiny hmanenanginy maniny man; ke haba e, me adre me he ka tube e hnen ûlâ; kʼ ame he lakon wahlu ka bâ. 19Helâe oge me he ka bi hwaban hnyi Aigupito, mʼ adre me he ka wâ a inya Iehova.
20Hnyi huna a eleveniny hnyi tehi a bân, hnyi bong a seveniny tehi, ame o but könya hofuc ho Iehova, ame ha, ka habe, 21Nokon at lö, oge hia but thu benyi Farao than Aigupito; ke wâ bi, adre me ca lan e he ka bi bubunyin, ke ca ge mano me lan e, me me hwege hmetu e hnân he ka hok hele vat. 22Anyin a wale, walang hna ha hnen Than Iehova, ka habe, Wâ bi, ûcûk u Farao than Aigupito, me oge me he ka thu li benyin, wale at ae hwege ke at minya adre hia but thu; ke oge me he ka okolo hele vat ûnyi hnyi hnyamen. 23Ke oge me he ka oveseâ at Aigupito unyin tavat, me obʼ ödrin ka hnyi ta je hnyei. 24Ke oge me he ka ohwegiâ li hnyamen than Babulona, me ham anyik hele vat ka hnyi hnyamen: ke oge me he ka thu li benyi Farao, me e ame he ka mâng hnyi hnyimakan helâ me imânginy tavat adre me kot moko. 25Ke oge me he ka ogöranyâ li hnyamen than Babulona, kʼ ame he bi ka him li benyi Farao; ke adre me he ka wâ a inya Iehova, iny ka hia but ham anyik hele vat ka hnyi hnyamen than Babulona, ke e ame he ka hai hon hnyei Aigupito. 26Ke oge me he ka oveseâ at Aigupito unyin tavat, me obʼ ödra ka hnyi ta je hnyei, mʼ adre me he ka wâ a inya Iehova.
Currently Selected:
Ezekiela 30: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
