Ezekiela 29
29
1HNYI huna a teniny, hnyi tehi a teniny, hnyi bong a twelv, ame o but könya hofuc ho Iehova ame ha, ka habe, 2Nokon at lö, hnyimâkâm dö kö Farao than Aigupito me perofeta ûcon me Aigupito hia thithö; 3ha thö, ke habe, Walang hna ha hnen Than Iehova, ka habe, Wâ bi, ûcûk u, Farao than Aigupito, a tanimo ae gan at ame laba hnyi je wagewiny, at ame hia but ha, ka habe, Haba anyik wagewe me ka anyik bi, ke oge me ka op e hobi könya bi. 4Ke oge me he bi nya ka det hnyimâm ge je wage, ke oge me he ka okeceâ je wâiny ânyâm je wagewe ka hnyi je unâm; ke oge me he ka oi u ûnyi hnyi wanben ânyâm je wagewe, tha u me ta je wâiny ânyâm je wagewe hia adre me kece ka hnyi je unâm. 5Ke oge me he ka hnö u adre digic u hnyebuba ai, u me je wâiny ânyâm je wagewe: u me be ka ta ka hnyi hon kânâ; adre me ca he ka tha ûkhacaköuö u me ûkhöûnâ: oge hia but hnö u hnân an ta je meno hnyi hnyot me ta je meno ame gâ ethö. 6Ke ame he aten Aigupito hia ka wâ a inya Iehova, anyin a ödra uci hlowe ka lap anyi Isaraela. 7Ödra ka köt u hnen hnyam, me u me hmetru, me ovec-hmwiâ je bajebenyidra hia: ke ödra ka ci gam u me hmetru, me öbubunyâ je jevadra hia. 8Anyin a wale, walang hna ha hnen Than Iehova, ka habe, Wâ bi, oge me he ka oâ köu hele vat, me subâ degecâ gam at me meno. 9Ke ame he ka wau hnyei Aigupito me ba aten; ke adre me he ka wâ a inya Iehova: anyin a e ame ha, ka habe, Anyik bi wagewe, ke oge hia but op e. 10Anyin a wale, wâ bi, ûcûk u, me ânyâm je wagewe, ke oge me he ka wia hnyei Aigupito me me ba aten me wau, hwân hnyi tap tue hnyi Seveni ke ne o but hnyi hnyigöulen Aithiop. 11Ke ame ca he ka vheno e hnen je can tavat, ke ame ca he minya je can meno ka vheno e, ke adre me ca he ka labâ e ke ne o but hnyi fâti je huna. 12Ke oge me he ka wia hnyei Aigupito me me wau hnyi wanben je hnyei a wau, ke ame be ka ba aten je tauniny hnyi wanben je taun adre oba wan, ke ne o but hnyi fâte je huna, ke oge me he ka oveseâ at Aigupito ka hnyi je hnyei me obʼ ödra ka hnyi ta je hnyei. 13Ke walang hna ha hnen Than Iehova, ka habe, E ka um dö je huna a fâte oge me he ka ûkhacaköuâ at Aigupito ûnyi hnyi ta je hnyei wale adre ovesei ödra ka hnyin: 14ke oge me he ka ohmeto at Aigupito ûhedra hnyi hna bâ, ke oge me he ka ohmetu ödra ka hnyi hnyei Patherusi, hnyei adre hnöku ödra hnyin; ke adre me he ka dokhu ae hnyikânâ eling. 15E ame he ka hnyikânâ hnyi hmelen je dokhu; ke ame ca he hmetu ka ogöranyâ e bi unyin je hnyei: ke oge me he ka owakhaleti ödra, mʼ adre me ca muso je hnyei. 16Ke ame ca he hmetu ka hnân labageju kâu hnen lap anyi Isaraela, hnân oûnykûmeâ je hulo, ödra ka hwio kodra: ke adre me he ka wâ a inya Iehova.
17Ke haba hnyi huna a twente seveniny, hnyi tehi a bân, ke hnyi bong a baniny tehi, ame o but könya hofuc ho Iehova, ame ha, ka habe, 18Nokon at lö, haba Nebukaneza than Babulona ame ânyâ huliwa ae so hmönyin ûcon Turo hnen anyin je utbavat: e hadreû thö je bödra hia, kʼ ame han hia but je abenyidra; ke so bi e ame ca kap troban, me anyin utbavat, ûnyi Turo, hnyi huliwa e ame ânyâ ûcon: 19anyin a wale, walang hna ha hnen Than Iehova, ka habe, Wâ bi, oge me he ka ham kö Nebukaneza than Babulona hnyei Aigupito; ke e ame he ka hom aten ae se hia, me je hna söh, me ta je omjeû; ke wale hwaban ka anyin je utbavat. 20Oge me ham kâu hnyei Aigupito hwaban anyin huliwa e ame ânyâ kâu, anyin adre me huliwa hobi könya, haingen Than Iehova. 21Hnyi bong eling oge me he ka oâ faoiny meno hobi kâu lap anyi Isaraela, ke oge me he ka hna köu mʼ u ma khong hnyimâm hnyi wanbödra; kʼ adre me he ka wâ e inya Iehova.
Currently Selected:
Ezekiela 29: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
