Ezekiela 28

1KE ame o but minya könya hofuc ho Iehova, ame ha, ka habe, 2Nokon at lö, ha thö ka je tuhan Turo, ka habe, Walang hna ha hnen Than Iehova, ka habe, Anyin ae bi gan hnyekom, ke u je ha, ka habe, Inya ang ke khong, me oge me Aba hnyi tap taben Khong hnyi wanben je köiö; ke so bi u thibi at ke ca Khong, ke u je oûco hnyekom me hnyekon Khong: 3ke wâ bi, u at ae metâ hu Daniela; ke ba ke ûnyi ae iyong adre me ikhâlâ gam: 4ke hu but gam omjeû hnen ânyâm metâ me hnâm hna wâhmakhmeto, ke hu gol me sileva hnyi je tang omjehem: 5u je hia but osehia ânyâm ta je ûnyi hnen ûganiny ânyâm metâ, ke hnâm hna ûcû, me bi gan hnyekom hnen tang omjehem: 6anyin a wale, walang hna ha hnen Than Iehova, ka habe, Anyin a u je oûco hnyekom me hnyekon Khong; 7wâ bi, haba can eling, me oge me he ka oâ köu je atkanyua, tavat adre me outen hnyi ta je hnyei: ke adre me he ka oc anyidra je hele vat me okongoâ hmanenanginy ânyâm metâ, kʼ adre me he bi ka oikikiâ ânyâm hmanenang. 8Ödra adre me he ka ohnyikönö u ka hnyi thop; me u me he ka mok helâ me imekiny tavat adre me hlingâ hnyi wanben je köiö. 9Hawa, u me he bala ka labö ha hnyi hnyimakan at ame hlingö u, ka habe, Iny Khong? ke u at bi, ke ca Khong hnyi hnyamen at ame okongu u. 10Me u me he bi ka mok helâ me imekiny tavat adre me ca peritomon, ge hnyamen ta je atkanyua: anyin oge hia but ha, haingen Than Iehova.

11Ke ame o but minya könya hofuc ho Iehova ame ha, ka habe, 12Nokon at lö, hai thö khumöng tenge ge thaniny Turo, me ha kâu, ka habe, Walang hna ha hnen Than Iehova, ka habe, U hnân okeceâ haten ae bekhot, ae unöngöt ge metâ, ke bekhot hmanenanginy. 13U je mwi but Edena hnyi hnyaban Khong; adre tubi u ge je veto hia ae ûnyi hnathu, wale sadio, me topazio, me aloma, me berulo, me soama me jasepi, me safairo, me semerado, me bereketh, me gol: e bi unyâm hna huliwan ânyâm je pate me je utkowi; adre penapena hnyi wanbâm hnyi bong adre up u hnyin. 14U kerubi adre hû a at ame tube; ke oge otilö u, me me hu hnyabam hnyi bucen ae kap anyin Khong; u je hia but ngenu hnyi wanben ta je veto meic. 15U je bekhot ut hnyi dem je gethen, hwân hnyi bong adre up u hnyin ke ne o but adre me wâ hwakecin ae kong gam. 16Hnyi ûganiny hnâm hna ûco adre me öunöngöti u ge ûokonguny, ke u je ânyâ hulo: anyin a wale oge hia but hagutö u ûnyi hnyi hon bucen anyin Khong; ke oge hia but ohiö u, kerubi at ame tube, ûnyi hnyi wanben je veto meic. 17E bi gan dut hnyekom ge ânyâm hmanenang, e monu but ânyâm metâ hnen ânyâm mec: oge hia but khûö u hnyikânâi, oge hia but ip u hnyi hnyimakan je than mʼ adre me he ka ö u thö. 18Hnyi ûganiny ânyâm je hulo, wale hnyi ûkongon hnâm hna ûco, u je hia but okongoâ ânyâm je dok ae kap; i anyin a wale oge hia but oâ meic hnyi wanbâm, e ame hia but ön u, ke oge hia! but wiö u me dröu but hon kânâ hnyi hnyimakodra hia adre me ō u. 19Adre me he ka uthmâhmâ gam wale tavat adre me wâhmakhmetu u hia hnyi ta je hnyei: u me he ka hnân hângâ, ke u me ca he hmetu ka manen nyiele balua.

20Ke ame o but könya hofuc ho Iehova, ame ha, ka habe, 21Nokon at lö, hnyimâkâm dö ka Zidona, me perofeta ûcon, 22me ha, ka habe, Walang hna ha hnen Than Iehova, ka habe, Wâ bi, ûcûk u Zidona; kʼ adre me he ka oganö nya hnyi wanbâm, mʼ adre me he ka wâ a inya Iehova, iny ka hia but owisa kâu, ke ka hia but okabi nya hnyin. 23Anyin oge me he ka kunâ kâu mok ae cap ke dra hnyi deny je gethen; kʼ ame he tavat aat ka ta hnyi wanben, ke hele vat bi hnyi je ke keihen hia; mʼ adre me he ka wâ a inya Iehova. 24Ke ame ca he hmetu lap anyi Isaraela ka hu iwadekong ame dâ ke ûdö ae ocen ûnyi gadra igigili ödra, wale hnyat hûköti ödra; ke adre me he ka wâ a inya Than Iehova.

25Walang hna ha hnen Than Iehova, ka habe, Iny ka hia but ûkhacaköuâ lap anyi Isaraela ûnyi hnyi je hnyei a je hnyei adre ovesei ödra ka hnyin, kʼ adre hia but okabi nya bi hnyi hnyimakan ta je hnyei, me adre me he ka labâ idra waleji oge me ham ka athnyabaik a Jekob. 26Ke adre me he bi ka laba khotkic hnyin e; eke, adre me he ka up uma, me belöki vine, me laba khotkic; iny ka hia but bi hwaban kodra hia tavat adre me hûköti ödra igigilo; ke adre me he ka wâ a inya Iehova Khongudrin.

Currently Selected:

Ezekiela 28: IAAI

Highlight

Copy