Daniela 9

1HNYI huna a bâni Dariu nöku Asueru, a mâtrân at Madai, wale adre otilâ me me thaniny dokhu anyin at Kaledaia; 2haba hnyi huna a bâniny anyin musi, inya Daniela oge me wâhmakhmeto ge je tusi numerainy je buna, waleji ge ioiny hofuc ho Iehova kö Jeremia perofeta hnyin, me me he ka hwâdâ je huna a se ven ti waleji hnyi hna öba wan Jerusalema. 3Me oge me bwele thö ka than a Khong me elâm a deny hic me khöû, me ca han, me mano ae gan nân, me hnabadröu. 4Me oge me hic kö Iehova a Khonguk, me omanenâ, ka habe, Than lö, a Khong ae gan ke hna outen, at ame tuö ûhihinyköu me ibetengiö ka tavat adre me hnyok kâu, me vheno anyin ta je hnanyibu; 5öhmun e hia but ânyâ hulo, ke hwakecin ae hwali, ke hwakecin ae kong, ke ûkhin fuc, ke saû ûnyi hnyi hnâm je hna hûna ke hnâm hna owisa: 6ke öhmun e ca hia but long ka lathnyabaem a ta je perofeta, tavat adre me fuc hnyi iâm ka latuhöhmun, ke anyihmun je taben, ke lakamöhmun, ke tavat hia thithö hnyi hnyei. 7Than lö, e unyâm wisa, ke e unyihmun hmehma, helâ me hnyi bong ang; wale a at Juda, ke at Jerusalema, ke at Isaraela hia, a tavat hakekeny ke sâkâu, hnyi je hnyei hia waleji u je obʼ ödra ka hnyin, can hnödra hna hanyâûâ waleji adre hanyâûâ gam. 8Than lö, e unyihmun hmehma, wale latuhöhmun, ke anyihmun je taben, ke lakamöhmun, anyin a öhmun e hia but ânyâ hulo köu. 9E unyin Than a Khonguhmun ibetengiö, kʼ ame thang degecâ hulo; anyin a öhmun e hia but ûkhin fuc kâu; 10kʼ öhmun e ca hia but long hoton ifuci Iehova Khonguhmun, he ka vheno anyin je hnanyibu, waleji e ame ip hnyi hnyimaköhmun a deny lathnyabainy a ta je perofeta. 11Eke, a hia but hanyâûâ ânyâm je hnanyibu hnen at Isaraela hia, kʼ adre me saû but, kʼ adre me ca long ifucâm: anyin a wale, adre hia but hingâlâ huhmun hnaûhango, ke hna khemanyin waleji adre me sihnalimen hnyi hnanyibu anyi Mose athnyabainy Khong; anyin a öhmun e hia but ânyâ hulo kâu. 12Me e ame hia but ohwâdâ hwan hofuc, waleji e ame haiʼ öhmun, ke tavat owisa kohmun, me e ame oâ kohmun ûnyi ae kong hmonyin: anyin adre me ca ânyâ eang hmeledrany hia helâ me hna ânyâ ka Jerusalema. 13Ke ame aat kohmun ta je ûnyi hia ae kong eang, helâ me hna sihnalimen hnyi hnanyibu anyi Mose: ke so bi öhmun e ca hia but sumâtâ betenge anyi Iehova Khonguhmun, me öhmun e hmetu ju ûnyi hnyi ta je hwakecihmun ae kong, me wâ ûnykûme ânyâm hnathu. 14Anyin a wale, a hia but Iehova hmâkâ ûnyi ae kong, me ohwâdâ kohmun: anyin ae wisa Iehova Khonguhmun hnyi anyin ta je huliwa hia e ame ânyâ, kʼ öhmun e ca hia but löng ifucin 15Ke walang ang, Than a Khonguhmun lö, at ame hom lakem ûnyi hnyi hnyei Aigupito ge hnyam ae hwege, ke adre olungi u helâe hnyi bong ang; öhmun e hia but ânyâ hulo, ke kong hwakecihmun.; 16Than lö, ö u ohaûâ but ânyâm hmonyin me ânyâm wathethot ûnyi hnyi ânyâm taun a Jerusalema, ânyâm bucen ae kap, hoton ânyâm wisa: anyin a can anyihmun je hulo, me je hwakecin lakamöhmun ae kong, adre me haikongoâ Jerusalema, me lakem, hnen tavat hia igigili öhmun. 17Ke walang ang Khonguhmun lö, long ju hic hijin athnyabaem, me hnen hna khöû, ke omelamâ thö hnyimâkâm hon ânyâm dok ae kap ae ba wan, ûnyi hnyi ien Than. 18Khonguk lö, tevehlöng ju me löng; hmak dö me wâ a ga ba but wan gahmun, me taun waleji adre wenyö kâu iâm: anyin a öhmun e ip anyihmun je khöû hnyi hnyimâkâm, ca anyin a öhmun wisa, ke ûnyi hnyi ânyâm ta je betenge ae gan hmâ. 19Than lö, löng ju; Than lö, thang degecâ but; Than lö, tevehlöng ju, me ânyâ; ca bec bi; ûnyi gam e Khonguk lö, anyin adre wenyö iâm hon taun me lakem.

20Ke inya oge me tiga fuc, me hic, me omanenâ anyik hulo, me hulo anyin je liamekeiny mönya a at Isaraela, me ip gaga hnyi hnyimakö Iehova Khonguk anyik khöû hobi kâu bucen ae kap anyin Khonguk; 21eke, inya oge me tiga fuc me hic, me haba Gaberiela, waleji oge bok ka wâ hnyi hna omanenâ, ame gâ logot, me kalö nya hnyi ûen adre labö bi hut hnyi sahac. 22Ke e ame nö nya me ûhnenamö mönya, me ha, ka habe, Daniela lö, oge me o but walang ang he ka ometo u, me okhanö u. 23Haba hnyi ûen u je hwân ka khöû, adre me hûna, me oge me o but he ka thumetu u; anyin adre me ti betenge gam; anyin a wale, wâ ûnykûme thö ûnyi eling, me wâhmakhmeto hna omanenâ. 24Sevente je wik adre me thu ka hnyi em hnyei, ke ânyâm taun ae kap, mʼ adre me obekhötâ hna hanyâûâ, me bi obiny je hulo, me tube hwakecin ae monu, mʼ adre me oâ wisa a nyiele balua, me ohmâ haten hna omanenâ ke hna perofeta, me hû dok ae ti kap. 25Wâhmakhmetoâ thö, ke wâ ûnykûme, a haba hwân hnyi hna hûna he ka ohâtâ me op hmetu Jerusalema ke ne o but at adre hû, a than, me ame he ka seven ta wik: ke haba sikste tu je wik me adre me he ka ânyâ hmetu e, wale je gethen ke köiö igigilo, hnyi ûen adre ovecâ. 26Ke hwaban ta je wik a sikste tu, me adre me he ka subâ degecâ at adre me hû, ke ba ûnyi gan: ke haba lakeiny than ame he ka o, mʼ adre me he ka ohia taun ke dok ae kap; ke ame he ka obiny e ge di, kʼ ame he ka hu vat ke ne o but obiny; kʼ adre me ohmâ but he ka öba wan. 27Ke e ame he ka ohmâ ûhihinyköu ka tavat ae se hia hnyi wik a khaca; ke haba hnyi hafiny wik, me e ame he ka bi obiny hut ke bwihlany; ke ame he ka o at ame öba wan, kʼ ame he ka tabâ labenyin ta je ûnyi ae ikiki; ke adre me he ka hingâlâ hmönyin hon at ame öba wan, ke ne o but ame bekhot ûnyi adre ohmâ.

Currently Selected:

Daniela 9: IAAI

Highlight

Copy