Daniela 10

1HNYI huna a kuni Koreso than Peresi, me adre me omanenâ ke ûnyi kö Daniela, adre hwenyi ien Beletisaza; ke e hnathu ûnyi e, wale vat ae gan, me e ame wâhmakhmetoâ ûnyi e, kʼ ame wâ ûnykûme hna omanenâ. 2Haba hnyi ûen eling, inya Daniela oge me labö tenge hnyi kun ta wik ae bekhot. 3E ba jeû ae so oge me an, kʼ ame ca dit ke utiö ke tap waina hnyi hnyimök, ke oge me ca sûö wakaco ke ne o but hnyi kun ta wik ae bekhot. 4Ke haba hnyi bong a twente foainy tehi a bân, tiga inya hnyi baten wagewe ae gan, a Hidekela, 5inya oge me bwele me wâ, ke wâ bi at ame khavâ mano lino, ke a oweikâ e ge goliny Ufas: 6ke helâ unyin me berulo, ke helâ hnyimakan me hucuce, ke helâ li emakan me li lamepainy meic, ke helâ me bras ae hadröngöc li benyin me li can, ke helâ me hwan tavat ae se hia ifucin. 7Ke hake inya Daniela at ame wâ hna omanenâ eling: ke adre me ca hnyi wâ hna omanenâ ge tavat adre me tha e mönya; ke so bi, ame o but kodra öbubuny ae gan hmâ, me adre me kec dö me lubaduöng. 8Me hake inya biju me oge me wâ hna omanenâ eling ae gan, ke ba hmetu bi hwegiök: ke adre wia anyik hmanenang me oge me kong ut, ke ba but hwegiök. 9Ke so bi oge me long ifucin: he inya oge me tiga long ifucin, me oge me mokut hnying ut, kʼ ame hnyimakök hnyikânâi. 10Ke wâ bi, ame kalö nya hnen ke hnyam me oge me icimöng ge li boucak me li hnyamok. 11Ke e ame ha könya, ka habe, Daniela lö, at adre ti betenge gan, wâhmakhmetoâ thö hofuc oge me ha köu, ke tot wisa thö; anyin adre kunö nya köu: ke a hia but ha könya hofuc eling, me oge me tot öbubuny. 12Ke haingen könya, ka habe, Daniela lö, ca ot bi; anyin a hwân hnyi bong a bân, waleji a mou hnyin hnyekom he ka wâhmakhmeto, me hom ûhnyûkongu u hnyi hnyimakan Khongom, adre long ut ifucâm: ke oge me o but ang ûnyi ge hwâm je hofuc. 13Ke haba thaniny dokhu Peresi ame labö iwatretra mönya twente wan je bong; ke wâ bi, ame o but Mikaela, ke than ae gan he ka hadruo nya: ke oge me laba eling me je thaniny Peresi. 14Ke walang ang oge me o but he ka thumetu u ge ta je ûnyi ame he ka o ka aten em hnyei hnyi je bong a biliny: anyin ae bec je bonginy hna omanenâ. 15Ke a hia but ha könya je hofuc eling, me oge me nom ju hnyikânâi me laba hnyibû. 16Ke wâ bi, ame kâlâ hnyimök ke at helâ me at: me oge me khong ut hnyimök me fuc, me ha ka at ame tot hnyi hnyimakök, ka habe, Than lö, can hna omanenâ, ame takû nya anyik je hlöuhlöu, ke ba but hwegiök. 17Ke ame he ka hawa ka khanö nya a athnyabaem than he ka ûhmenamö mön than? anyin a haba inya, me ba but hwegiök, ke oge me ca menâ hmetu bi. 18Ke ame mâdrö nya hmetu hnen at a helâ me at, me ha hwegiök. 19Ke e ame ha, ka habe, At adre me betenge gan lö, ca he bi ka ot; hnahic ju, hwege thö, eke, hwege thö. Ke a hia but fuc könya, me oge me hwege but, me ha, ka habe, Than lö, ha thö; anyin a u je ohwegiö nya. 20Ke haingen, ka habe, E khanö u ûhek köu? ke oge me he walang ang ka hmetu he ka vat me than Peresi: ke iny ka he but, wâ bi, ame he bi ka o than Heleni. 21Ke so bi oge me he ka ha köu hna sihnalimen hnyi tusiny hnathu: ke ba hiök hnyi ta je ûnyi eling, ke so thibi Mikaela a tuhöbun.

Currently Selected:

Daniela 10: IAAI

Highlight

Copy