Daniela 2

1HNYI huna a loiny musi a Nebukaneza, haba Nebukaneza ame bwo je bwi; me ame hlohlo hnyekon, me e ame ca mokut bi. 2Me haba than ame ûkhu-nöng he ka hom je magoi, ke tavat bihihwakecin, ke tavat tren khong, ke tavat Kaledaia, he ka omanenâ ka than je bwiny. Me ödrin e o but me tot hnyi hnyimakan than. 3Ke haingen than ködrin, ka habe, Oge hia but bwi, kʼ ame hlohlo hnyekuk ae bekhanö nya bwik. 4Me amo fuc at Kaledaia ka than hnyi hwen Suria, me ha, ka habe, E so e möt than nyiele balua; ha thö bwi kohmun a lathnyabaem, me öhmun e he ka omanenâ bongon. 5Ke haba than ame thu me ha ka at Kaledaia, ka habe, E hia but gak ûnyi: ke öbun e ne ca he bi ka omanenâ könya bwi, ke bongon e, me adre me he ka subâ omomonu öbun, mʼ adre me he ka wia umöbun je uma me hnân digic thatûnyi. 6Ke so bi öbun e ne he ka omanenâ bwi me bongon e, awe, öbun e he ka hu ûnyi gak je bwihlany me hwaban, kʼ adre me he ka ogânʼ öbun: anyin a wale omanenâ thö könya bwi me bongon e. 7Me adre me thu hmetu a loiny me ha, ka habe, E so ame he than ka ha bwi ka lathnyabaem, mʼ öhmun e he ka omanenâ bongon e. 8Ke haba than ame thu, me ha, ka habe, Inya oge me wâ but a öbun e he ka obecâ ûen, anyin ae khanʼ öbun dut a gʼ ame hia but gak ûnyi. 9Ke öbun e ne ca he ka omanenâ bongon bwi, me khaca thibi hnanyibu köbun: anyin a öbun e hia but penapena thoi me iyawo he ka ha könya, ke ne o but adre me hwio ûen: anyin a wale ha thö könya bwi, me me khanö nya thö ae khanʼ öbun he ka omanenâ bongon e. 10Me haba at Kaledaia adre me thu hnyi hnyimakan than, ka habe, E ba at eang hmeledrany ae khana he ka omanenâ ûnyi anyin than; anyin ae ba than, ke taben, ke at musi ame hia but elâm ûnyi a helâe unyin je magoi ke tavat bibihwakecin ke at Kaledaia. 11Ke haba ûnyi ame elam than, me e ti hmak, ke ca khana bi ke at he ka omanenâ e hnyi hnyimakan than, ke so thibi je khong, a tavat adre me ca tha laba me tavat. 12Anyin a wale than ame hmonyin me wathethot gan hmâ, me ûkhûnöng he ka ohia tavat hia ae metâ hnyi Babulona. 13Ke adre me haimemenâ hnanyibu, ke adre me he ka hlingâ tavat ae metâ; ke adre me elom Daniela me je lahanen he ka hlingʼ ödrin. 14Haba Daniela ame thu hnyi wâhmakhmeto me metâ kö Arioka taben tavat tue anyin than, at ame he he ka hlingâ tavat metâ hnyi Babulona; 15me e ame ha kö Arioka a taben unyin than, ka habe, anyin a ieû ae logot hnanyibu ûnyi ge than? Haba Arioka ame omanenâ ûnyi eling kö Daniela. 16Haba Daniela ame didro me sumâtâ ge than he ka hna kâu ûen, me me he ka omanenâ bongon bwi ka than.

17Haba Daniela ame he ka hnyi umen uma me omanenâ ûnyi eling kö Hanania, me Misaela, me Azaria a je lahanen: 18mʼ ödrin e he ka sumâtâ betenge ûnyi ge Khongon drany hnyi ûnyi eling ae iyong; me me ca tha he Daniela me je lahanen ka mok tha ödrin me tavat ae metâ hnyi Babulona. 19Me adre me omanenâ kö Daniela hnyi hna omanenâ huyi lit ûnyi eling ae iyong. Me haba Daniela ame haisoâ Khongon drany. 20Ke haingö Daniela, ka habe, E so adre me haisoâ ien Khong nyiele nyiele balua; anyin a e unyin metâ me man: 21ke e ame wia je huna me je ûen: e ame hom but je than me otilâ je than: e ame ham metâ ka tavat ae metâ, me wâhmakhmeto ka tavat wâhmakhmeto: 22e ame omanenâ je ûnyi ae dit ke iyong: e khana ta je ûnyi hnyi menekholom, ke ame tha laba mö lany. 23Inya oge me ole me oganö u Khongon lakamök, u at a ham könya metâ me man, ke u je hia but omanenâ könya walang ang hnöhmun hna sumatö u: anyin a u je hia but omanenâ kohmun ûnyi anyin than. 24Anyin a wale Daniela ame he kö Arioka, wale a kunâ than he ka hlingâ tavat ae metâ hnyi Babulona: e ame he me ha kâu, ka habe, Ca he ka hlingâ tavat ae metâ hnyi Babulona: hum nya thö ka hnyi hnyimakan than, me oge me he ka omanena bongon ka than.

25Me haba Arioka ame ie hum Daniela ka hnyi hnyimakan than, me ha helâng kâu, ka habe, Oge me wâ at a hanen bâ anyin at Juda, me ame he ka omanenâ bongon ka than. 26Ke haingen than kö Daniela, adre hwenyi ien Beletisaza, ka habe, Hawa, e khanö u he ka omanenâ könya bwik bwi oge me bwo me bongon e? 27Me Daniela ame thu hnyi hnyimakan than me ha, ka habe, Haba ûnyi ae iyong wale u je elâm, than, ke ca khana bi tavat ae metâ, ke tavat bihihwakecin, ke je magoi, ke tavat tren khong he ka omanenâ ka than; 28ke so bi, e hu Khong hnyi drany at ame omanenâ ta je ûnyi ae iyong, me e ame hia but thumetu u Nebukaneza than, ta je ûnyi ame he ka o nyiele. Walang bwem ke ûnyi eji u je wâ hon hnâm hna mokut: 29haba u, than lö, ame o but hnâm je hna ûnykûme hon hnâm hna mokut, wale ta je ûnyi ame he ka o nyiele: ke haba at ame omanenâ ta je ûnyi ae iyong ame thumetu u ge ta je ûnyi ame he ka o. 30Ke haba inya, me adre me ca omanenâ könya ûnyi ang ae iyong can a iny metâ hon tavat hia ae möt, ke so bi hnân omanenâ bongon ka than, me me khanö u thö je ûnykûmenen hnyekom. 31Than lö, u je wâ, me wâ bi hnatheat ae gan. Ke haba hnatheat eling, wale ae gan, ke ti so hmonyin hmanenanginy, me ame tot hnyi hnyimâkâm; ke hnân outen e at ka wâ. 32Ke haba ban hnatheat eling, me gol ae so, ke haba ûlainy ke li benyin, me sileva, ke haba hnyekon ke li jevan, me bras, 33ke haba li can, me fao, ke haba li hnyeûcan, me fao ke keihen ke kânâ kece ke keihen. 34Ke u je wâ ke ne o but ame manen dö veto adre so ke ca hnen hnyam, kʼ ame kot hnatheat hnyi li can a fao ke kânâ kece, me ame omomonu but. 35Me ame tha omomonu but fao, me kânâ kece, me bras, me sileva, me gol, me helâ me unen hwit hnyi hna huje hwit hnyi honivakeny; ke haba ang ame tûâ degecâ, ke ba hmetu bi hnen: ke haba veto, at ame kot hnatheat, me e ame wia me bucen ae gan hmâ, me ame öunöngötâ hmeledrany hia. 36Wale bwi; ke ohmun e he ka omanenâ hnyi hnyimakan than bongon e. 37U than lö, thaniny ta je than, ke Khongon drany ame ham köu dokhu, me man, me tang hwege, me hmanenang; 38Ke e ame hia but hna ka hnyi hnyamâm je menoiny hnyot, me je meno ame gâ ethö, hnyi je dok hia ame laba hnyin lakon tavat, ke e ame hna köu he ka musi ödra hia: haba u, waleji ban a gol. 39Ke hwabâm dö ame he ka kû ke dokhu ae ûhnyûkong hmelâm; ke ke dokhu minya a kuniny, a bras, e ame he ka muso hmeledrany hia. 40Ke haba dokhu a vakiny ame he ka hwege helâ me fao: anyin a haba fao at ame omomono me hom oûnyûkongoâ ta je ûnyi hia: ke helâ me fao ame oamemâ ta je ûnyi hia eling, helâe e ame he ka omomono me oamemâ. 41Ke anyin a u je wâ li hnyeûca me je bacan, a kânâ hnân up kaia hanen, ke fao hanen, me adre me he ka subâ luâ dokhu; ke so bi, ame he ka e unyin hwegien fao, anyin a u je wâ fao adre ûhaniken me kânâiny kaia. 42Ke haba je bacan a fao me kânâ kece hanen, helâe ame he ka hwege ke keihen dokhu, me ngâ ke keihen. 43Ke u je wâ fao adre ûhaniken me kânâiny kaia, adre me he ka ûhaniken me je mâtrâniny at; ke adre me ca he ka ûkeceköu bi, helâ me fao ame ca tha hûjö me kânâ ae kece. 44Ke haba hnyi je bong bongon je than eling, me ame he Khongon drany ka oâ ke dokhu a gʼ adre me ca he ka ohia nyiele balua, ke adre me ca he ka hna dokhu eling ka ke hnyei; ke e ame he ka kot omomono me ohia ta je dokhu hia eling, ke e ame he ka tethmâ nyiele balua. 45Anyin a u je wâ a gʼ adre sö veto ûnyi hnyi bucen, ke ca hnen hnyam, me e ame kot omomono fao, me bras, me kânâ ae kece, me sileva, me gol; haba Khong ae gan ame omanenâ ka than ta je ûnyi ame he ka o nyiele: ke e hnathu bwi, ke hmâ bi hna ha bongon. 46Me haba Nebukaneza than ame ta ju hnyikânâi me nom kö Daniela, me ûkhû-nöng he ka ham bwihlany me je ûnyi ae bo so kâu. 47Ke haingen than kö Daniela, ka habe, E hnathu, haba Khongubun me Khongon ta je khong, ke Tuhan ta je than, ke at ame omanenâ ta je ûnyi ae iyong, anyin ae khanö u he ka omanenâ ûnyi e ae iyong. 48Me haba than ame ogöranyi Daniela, me ham kâu je bwihlany ae gan, me otilâ e he ka muso hnyei Babulona hia, me wia e me taben ae beönua hon tavat ae metâ hia hnyi Babulona. 49Ke Daniela ame sumâtâ than, me e ame otilö Saderaka, ke Mesaka, ke Abedenego hon ta je ûnyi hnyi hnyei Babulona: ke haba Daniela ame laba hnyi homagouleny than.

Currently Selected:

Daniela 2: IAAI

Highlight

Copy