Daniela 1

1HNYI huna a kuniny musi a Jehoiakima than Juda, haba Nebukaneza than Babulona ame o hnyi Jerusalema me thelöng e. 2Ke haba Than ame hnö Jehoiakima than Juda ka hnyi hnyamen, tha e me ke je omjehen uma umen Khong; me e ame sukhöûnâ ka hnyi hnyei Sinara ka hnyi uma umen khongon: ke e ame ip je omjehen ka hnyi uma omjeû umen khongon. 3Ke ame ha than kö Asepenaza at ame muso anyin je eunuka, he ka hom ke je lakon Isaraela, a je mâtrâniny than ke je hnyat ae nua; 4a je thoth ae ba hnyikongudrin, hnyat ae hmanenang he ka wâ, ke hnyat ae khanʼ ödrin je metâ hia, kʼ ödrin e wâhmakhmeto, ke tremângâ je hna ûne, hnyat ae ûcû he ka tot hnyi uma umen than; me hamen be ka nʼ ödrin ge ûne ke hwen Kaledaia. 5Ke haba than ame khenâ ködrin jeû an than hnyi taogo bong, ke waina a belen, me adre me he ka hat ödrin hnyi kun ta huna; me hwaban e me ödrin e he ka tot hnyi hnyimakan than. 6Ke wale unyidra, a hanen lakon Juda, Daniela, ke Hanania, ke Misaela, ke Azaria. 7Ke haba tuhan je eunuka ame hwenyi iödrin: ke e ame hwenyi iö Daniela, me Beletisaza; ke Hanania, me Saderaka; ke Misaela, me Mesaka; ke Azaria, me Abedengo. 8Ke e mou hnyi hnyeku Daniela a gʼ ame ca he ka okongoâ e hnen jeu than, ke waina a belen: anyin a wale e ame sumâtâ tuhan je eunuka, me me ca ka hamen bi okongoâ e. 9Ke haba Khong ame okûâ he ka betenge me hnyok kö Daniela hnen tuhan ta je eunuka. 10Me haba tuhan ta je eunuka ame ha kö Daniela, ka habe, Iny ot ge than a tuhok, at ame khenâ ö ʼbun jeû ke belibun: ke anyin a ieû e ame he bi ka wâ je hnyimaköbun ae hlöuhlöu, me ca helâ me hnyimakan wahidröu a tha dö möbun? me öbun e he ka bi joniny bok ka than. 11Ke haingö Daniela kö Meleza, wale at a otilâ tuhan je eunuka hu Daniela me Hanania me Misaela me Azaria, ka habe, 12Më cubic ohmun a lathnyabaem hnyi je bong a ten; me adre me he ka ha ö ʼhmun ge je khölak, me habelihmun ge köiö. 13Ke u me he ka wâhmakhmeto je hnyimaköhmun, me hnyimakan wahidröu hnyat adre me hnyi an jeû an than; ke ânyâ thö kohmun a lathnyabaem hoton hnâm hna he ka wâ. 14Me e ame ling ödrin hnyi ûnyi eling, me cubic ödrin hnyi je bong a ten. 15Ke ame um dö je bong a ten, me adre me wâ je hnyimaködrin ae hmanenang, ke gan je unyidrin, hon hnyimakan wahidröu hia hnyat adre me an jeû an than. 16Me haba Meleza ame hom hmetu jeû an than, me belidrin waina, me ha ö ʼdrin bi ge je khölak. 17Ke haba je hidröu eling a vak, me Khong ame ham ködrin wâhmakhmeto me wâûnykûme hnyi je ûne me metâ hia: ke haba Daniela ame metâ hnyi je hna omanenâ hia me ta je bwi. 18Ke ame um dö je bong waleji hnen than hna thu bongon he ka hum ödrin, me haba tuhan je eunuka ame hum ödrin ka hnyi hnyimakö Nebukaneza. 19Ke haba than ame ûhnenamö mödrin; ke ba ke at gadra hia adre me wâ ae ûcû me Daniela, me Hanania, me Misaela, me Azaria: anyin a wale ödrin e tot hnyi hnyimakan than. 20Ke haba hnyi ta ûnyi hia ge metâ me wâhmakhmeto, wale ame hnei ödrin gan than, e ame ö ʼdrin a ten beonuâ anyidrin metâ hon metâiny ta je magoi hia me tavat bihihwakecin hnyi dokhon dokhu hia. 21Ke e bi Daniela ke ne o but hnyi huna a bâni Koreso than.

Currently Selected:

Daniela 1: IAAI

Highlight

Copy