Amosa 8
8
1WALANG hna omanenâ könya ge Than Iehova: ke wâ bi tang wan ûö ae mat. 2Ke e ame ha könya, ka habe, Amosa lö, ieû u je wâ? Me haingök ka habe, tang wan ûö ae mat. Me haingo Iehova könya, ka habe, A o but obiny ka lakeik a at Isaraela; oge me ca he hmetu ka he me digic ödra. 3Ke haba je khu-möng hnyi uma kap, me ame he ka helâ me kuku tenge hnyi bong eling, haingen Than Iehova: kʼ ame he ka se hia ta je komok; kʼ adre me he ka khûâ hnyibu ödra hnyi je dok hia. 4Long ju hofuc ang öbun tavat öbun e beutâ ta je theduoc, me ota tavat ae vec hnyi hnyei, 5haingodra, ka habe, ame he ka um kehö manen a tehi, mʼ ate me ûcû anyita hwit? ke sabath, mʼ ate me khong tang hwit? ke adre me oûhnyûkongoâ efa kʼ adre ogânâ sekel, kʼ adre omono tulut ge iyawo: 6mʼ ate me ûco tavat ae ba ta ûnyi, hwaban sileva, ke at ae theduoc hwaban li tangen hnyeûca, ke ûco ta je tiren hwit. 7A hia but Iehova khemanyinâ ûnuainy Jekob, ka habe, E hnathu oge me ca he balua ka hnying anyidra ta je huliwa. 8Hawa, ame ca he tavat ka öbubuny can eling, ke tenge hia tavat adre me labâ e? eke, e ame he bi ka khibi hia helâ me Wagewe; ke e ame he ka bwebwelâ, kʼ ame he ka dit hmetu ju, helâ me wageweiny Aigupito. 9Ke haingen Than Iehova, ka habe, Hnyi ûen eling oge me he ka odilâ seûno hnyi jebigo, me olidrâ hnyei hnyi lany. 10Ke oge me he ka wia anyibun je bijeû ka hnyi tenge, me anyibun je khumöng hia ka hnyi, tenge thungaû; ke oge me he ka oâ ka hnyi ta je hnyin hia mano ae gan nân, me ohadreûâ ta je ban hia; ke oge me he ka wia e helâ me hwatenge can nokon a khaca, me obiny e helâ me bong vec. 11Haingen Than Iehova, ka habe, Wâ bi ame he ka o je bong, me oge me he ka kunâ hmiâ ka hnyi hnyei, ca hmiâ ge ba han me köiö, ke hmiâ bi ge hofuc ho Iehova. 12Ke adre me he ka he monu ûnyi hnyi ke köiö ka, hnyi ke köiö, ke ûhedra hnyi hwadro ke ne o but jimeyö; adre me he ka wadring monu he ka elâm hofuc ho Iehova, ke adre me ca he bi ka wâ. 13Hnyi bong eling ame he wahlu ae hmanenang me wahidröu ka momonu ge beic. 14Tavat adre me khemanyinâ hulöiny Samaria me ha, ka habe, Dana lö, kia inya Khongom; ke kia inya gethen ûheny Bere-seba; ke adre me he ka ta, ke adre me ca he hmetu bi ka tot.
Currently Selected:
Amosa 8: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
