Joanes 8

1Is apan a Iesu an nedoon Olivet. 2Is wat lahlah an nuhialeg, is lep apan aien anliin neom ahlap, eris ahtag pan ehelen natimi asega; is ateucse aien, um esege imi ra. 3Eris imyiapan ehelen intakata is ethi a ilpu atimi esege im ilpu Farisi, eris ecet yin nagovaig ingaijid, um ati yin an nibla atimi, 4um ika ehelen, Ak Natimi esege, et mun ago ingaijid intakata ineigki, eris mun idim ecet yin. 5Is ika a Moses an tas alep o un, uhpu asji ra sji eigki irai hat era ago nedo ineigki ara: na ikha aiek? 6Eris asan tas ineigki ara par oop yin, mika eri asan tas has vai yin. Ja is atpuse a Iesu um ahgesahges an nobohtan an nupsikman. 7Eris wat imyiisjis ara um ahodai yin, is atidaijai aien, um ika ehele ra, Aien et ti ago nedo has aien iramia, etmu upyi hup aien um asji yin an hat. 8Is lep atpuse aien um ahgesahges an nobohtan. 9Eris wat atahaijeg intas ineigki ara, is ehcamai inliinmopura ara, eris alau ijo athiathi ara asega, um atupun irai ilpu atimi tas alep um yetpan irai tup atimi: is amen ache a Iesu, im intakata iyehki an lah. 10Is lep atidaijai a Iesu, jam eti ecet tah, intakata iyehki ache, is ika ehelen aien, Ak intakata ineigki, era mun han eda a ilpu atimi atijai itai iram? et mun asuptecnaig nimtan nedo has unyum tah, ka o’o? 11Is um ika aien, O’o, ak Natimarid. Is um ika ehelen a Iesu, Inki ti asuptecnaig nimtan nedo has unyum ainyak: atga unyum aiek, um jim lep ago nedo has.

12Is lep tas ehele ra a Iesu, um ika, Ek itai lah an nobohtan ainyak: aien etpu apitac nyak aien, inyi ti atga an naupat aien, etpu leh nitai lah aien, um umoh. 13Eris um ika ehelen a ilpu Farisi, Na mun asuptecnaig euc aiek; et eti inivaijec intas asuptecnaig euc unyum. 14Is tas a Iesu, um ika ehele ra, Ek asuptecnaig nyak ainyak, et inivaijec intas asuptecnaig nyak unyak: ek ato ainyak inuarin ineig kis ahes iran ainyak, im lep napan unyak iran; ja eka eti ato aijaua inuarin ineig kis ahes iran ainyak, im lep napan unyak iran: 15eka aktaktai va atimi aijaua et idivaig nedo an nobohtan; ja ek eti auanaktaktai naico vaig tah ainyak: 16ja el ek aktaktai va atimi ainyak, et inivaijec naktaktai unyak: ek eti tup echim amen ainyak, ja ainyak im Etmak is abrai nyak aien: 17eris lep aged an tas alep unyimia mika, et inivaijec intas asuptecnaig o natimi et ero: 18ek asuptecnaig nyak ainyak, et lep asuptecnaig nyak a Etmak is abrai nyak aien. 19Eris um ika ehelen ara, Etmam yek eda? Is um ika a Iesu, Eka eti ato nyak aijaua, im lep Etmak: el eka ato nyak aijaua, el eka lep ato Etmak aijaua. 20Is asan tas iji eigki a Iesu an nesege o un, an nuarin ikni mune iran anliin neom ahlap: ja is eti arop iran tah natimi; is eti fi yetpam naopan o un.

21Is ika ehele ra a Iesu, Ekpu atga unyak ainyak, ja akupu ahilek nyak aijaua, akupu emesmas an nedo has unyimia aijaua: inyi ehka vai caua napanvaig an nuarin ineig ekpu apan iran ainyak. 22Eris ika a nupu Jutaia, Etpu ispun atgei yin aien, ka o’o? is ika aien, Inyi ehka vai caua napanvaig an nuarin ineig ekpu apan iran ainyak. 23Is um ika ehele ra aien, Eka ahes sepamki aijaua; kis ahes jipagko ainyak: eka atimi an nobohtan aijaua; ek eti atimi an nobohtan ainyak: 24ek mun idim asaig ehelemia ainyak mika, akupu emesmas an nedo has unyimia aijaua: el eka eti imyiisjis ninivaijec aijaua, nikavaig, ek atimi iyehki ainyak, akupu emesmas an nedo has unyimia aijaua. 25Eris um ika ehelen ara, Aiek di aigki? Is um ika ehele ra a Iesu, Ek tup ethi ache ainyak kis upyi aniv nyak ehelemia ainyak: 26ek ato niji itai et ahinag ainyak par asaig um ated caua iran: ja aien is abrai nyak aien, et inivaijec aien; ek asuptecnaig ehele atimi an nobohtan ainyak nitai iji eigki kis atahaijeg ehelen ainyak. 27Eris eti ato ara, nikavaig, is tas ehele ra aien vai Etman. 28Is um ika ehele ra a Iesu, Aku wit atijai Inhal o natimi aijaua, akupu ato aijaua, nikavaig, et atimi iyehki ainyak, im lep ineig, nikavaig, ek eti ispuk ago tah nitai ainyak; ja ek asaig nitai iji eigki ainyak is esege imtak a Etmak: 29aien is abrai nyak aien et amen ehelek aien: et eti ude nyak a Etmak; ek ago nitai iji eigki ainyak irai iji adiat et merit vaig aien.

30Is wat asan tas iji eigki aien, eris asgeig iran natimi is ahinag. 31Is um ika a Iesu ehele nupu Jutaia iji eigki eris eteuc an tas o un ara, El eka apol ipjin an tas unyak aijaua, el eka idim ilpu atimi atahaijeg nyak aijaua; 32im lep ineig, akupu ato intas inivaijec aijaua, etpu ahiyi caua intas inivaijec. 33Eris um ika ehelen ara, Ecra ilpu mapoi Ebraham aijama, ecris idim eti aheca o un tah natimi aijama: na auri aiek par ika, Uhpu ahiyi caua?

34Is um ika ehele ra a Iesu, Et idim inivaijec ineig ek asaig ehelemia ainyak mika, Aien et ago nedo has aien, et aheca u nedo has aien. 35Et eti amense an nimnim naheca o un tah irai iji adiat: ja et amense a inhal o un irai iji adiat. 36El et ahiyi caua a Inhal o Atua, nhpu idim eti lep arore caua. 37Ek ato ainyak, nikavaig, eka ilpu mapoi Ebraham aijaua; ja eka merit aijaua mika aki atgei nyak, va nitai ineigki, nikavaig, et eti amen anliinmopomia intas unyak. 38Ek asuptecnaig nitai iji eigki ainyak, kis ecetai ehele Etmak ainyak: ja eka ago nedo ineigki aijaua, akis ecetai ehele etmamia aijaua. 39Eris tas ara, um ika ehelen, Et idim etmama a Ebraham. Is um ika ehele ra a Iesu, El eka ilpu hal o Ebraham aijaua, el eka ago nedo o Ebraham aijaua: 40ja eka idim ika aijaua aki atgei nyak, natimi asan tas inivaijec ineig ehelemia, kis atahaijeg ehele Atua ainyak: is eti ago nedo ineigki a Ebraham: 41eka ago nauritai o etmamia aijaua.

Eris um ika ehelen ara, Ecra eti ilpu halav an nefalaig aijama; et idim Etmama a Atua. 42Is um ika ehele ra a Iesu, El et Etmamia a Atua, el et aiyu inliinmopomia aijaua vai nyak: kis ahes ehele Atua ainyak par ham; kis eti tup ispuk ham ainyak, ja is abrai nyak aien. 43Eka auri aijaua par eti ato intas unyak? va nitai ineigki, nikavaig, et ehka vai caua nahaijegvaig intas unyak. 44Akis ahes ehele etmamia Tiapolo aijaua, eka merit aijaua nagovaig inmerit o etmamia: is atimi atgei atmas aien itu acen um imyihum pam an naopan ineig, et eti apol an nitai inivaijec aien, et idim efaifa aien. Nedo o un ineig par asan tas ahcil: et idim atimi ahcil aien, um lep etma atimi ahcil. 45Ek tas inivaijec ehelemia ainyak, ja eka eti eteuc an tas unyak aijaua. 46Et ehka vaig tah caua par ika ek ago nedo has ainyak. Ek wat asan tas inivaijec ehelemia ainyak, eka auri aijaua par eti eteuc an tas unyak? 47Aien et atimi o Atua aien, et ahaijeg intas o Atua aien: eka eti ahaijeg aijaua, va nitai ineigki, nikavaig, eka eti ilpu atimi o Atua aijaua. 48Eris tas a nupu Jutaia, um ika ehelen, Et inivaijec intas unyima, nikavaig, na upu Samerya aiek, et lep amen ehelum a nagelo has. 49Is um ika a Iesu, Et eti amen ehelek a nagelo has; ek idim eccen vai Etmak ainyak, ja eka amcel vai nyak aijaua. 50Ek eti ahilek nimyiahpas nyak ainyak: ja et ahilek tah et ethi, um aktaktai nyak. 51Et idim inivaijec ineig ek asaig ehelemia ainyak mika, El et apol an tas unyak tah natimi, inyi idim eti mas aien. 52Eris um ika ehelen a nupu Jutaia, Ecra idim ato aijama mika, et amen ehelum a nagelo has: is mas a Ebraham, im lep ilpu profeta; ja na ika aiek, El et apol an tas unyak tah natimi, inyi idim eti mas aien: -- 53na esjilid aiek irai etpoija Ebraham is mas aien, ka o’o? eris lep emesmas a ilpu profeta: na ika aiek, aiek di aigki? 54Is um ika a Iesu, El ek imyiahpas nyak ainyak, el et takitai nimyiahpas nyak unyak: aien et imyiahpas nyak aien et Etmak aien; aien aigki eka ika aijaua vai yin, et Atua unyimia aien: 55eka mun eti ato yin aijaua; ja ek ato yin ainyak: el ek ika ainyak, Ek eti ato yin ainyak, el ek atimi ahcil ainyak um idivai caua: ja ek ato yin ainyak, um apol an tas o un: 56is imyiacitak a etpomia Ebraham nalmoivaig nadiat unyak: is almoi aien, um cediaig. 57Eris um ika ehelen a nupu Jutaia, Et eti fifte inmesese iram, is ehka vai euc nalmoi Ebraham vaig. 58Is um ika ehele ra a Iesu, Et idim inivaijec ineig ek asaig ehelemia ainyak mika, an naopan iyehki is pam eti eteuc a Ebraham, EK TUP ETEUC AINYAK. 59Eris arapse vai hat ara mika eri asji yin: ja is atpuh a Iesu, um ahes anliin neom ahlap, um tiblaitibla atimi, um alau ijo, um atga o un.

Currently Selected:

Joanes 8: ATY1863

Highlight

Copy